Read Chol Isaias 37 Bible Online

Isaias 37 - Chol bible

Isaias 37

¹Jini rey Ezequías tsi' laj ubi. Tsi' jet' tsili i bujc. Tsi' lʌpʌ coxtal che' bajche' i tilel jini ch'ijiyemo' bʌ i pusic'al. Tsa' majli ti' yotot lac Yum.

²Tsi' choco majlel jini año' bʌ ñuc bʌ i ye'tel ti' tojlel, jiñobʌch Eliaquim am bʌ ti' wenta i yotot rey, yic'ot jini secretario i c'aba' Sebna yic'ot jini ñoxobix bʌ motomajob. Tsi' chocoyob majlel ba'an jini x'alt'an Isaías (i yalobil Amoz) laj lʌpbilob i cha'an coxtal.

³Tsa' c'oti i yʌlob: Che'ʌch woli' yʌl jini rey Ezequías: “Wen wocol bajche' añon lojon wʌle. Wolic tic'lʌntel lojon. Wolic peq'uesʌntel lojon. Lajalon lojon bajche' x'ixic woli bʌ ti bajq'uel che' i yorajlelix mi' yilan pañimil i yalobil pero ma'anic i p'ʌtʌlel.

⁴Tic'ʌl mi tsa'ix i yubi lac Yum i t'an jini comandante tilem bʌ ti Asiria tsa' bʌ i p'ajbe i c'aba' lac Yum. Tic'ʌl mi caj i yʌq'uen i toj i mul cha'an tsi' p'ajbe i c'aba'. Jini cha'an yom ma' pejcan lac Yum ti oración cha'an mi' p'untan i colojbal i winicob”.

⁵Che'ʌch tsi' subeyob jini x'alt'an Isaías, jini ñuc bʌ yumʌlob i cha'an jini rey Ezequías.

⁶Isaías tsi' subeyob: Yom mi la' suben la' yum: “Jini lac Yum tsi' yʌlʌ: Mach a bʌc'ñan i winicob jini rey ti Asiria cha'an i t'an tsa' bʌ i yʌlʌyob tij contra che' bʌ tsi' p'ajayoñob.

⁷Joñon mi caj c techben i wocol. Mi caj i yubin t'an cha'an chuqui woli' yujtel ti' lumal. Che' jini mi caj i cha' sujtel ti' lumal ba' mi caj cʌc' ti tsʌnsʌntel. Che' tsi' yʌlʌ lac Yum”. Che' yom mi la' suben Ezequías, che'en Isaías.

⁸Che' jini tsa' sujti ti Libna jini comandante, ya' ba' woli ti guerra i rey Asiria, pero loq'uemix jini rey ti Laquis cha'an tsi' yubi woli' tech guerra i rey Etiopía ya' ti' lumal. Jini cha'an jini rey ti Asiria i c'aba' Senaquerib tsi' cha' choco majlel suboñelob ba'an Ezequías. Tsi' yʌlʌ:

¹⁰Che'ʌch yom mi la' suben Ezequías, jini rey ti Judá: “Mach ma' lon ñop a Dios come woli' lotiñet, come tsi' yʌlʌ: Mach mejlic i ch'ʌm Jerusalén jini rey ti Asiria, che'en.

¹¹Ubibilix a cha'an bajche' tsi' jisa yan tac bʌ tejclum tac jini rey ti Asiria. ¿Mu' ba caj a bajñel colel ma' wʌl?

¹²An i diosob jini yan tac bʌ tejclum ja'el. ¿Tsa' ba mejli i coltañob loq'uel ti' p'ʌtʌlel c ñojte'elob? Tsi' laj jisayob Gozán, Harán, Resef, yic'ot jini ch'oyolo' bʌ ti Edén chumulo' bʌ ti Telasar.

¹³¿Baqui añob jini reyob tsa' bʌ i cha'leyob yumʌl ti Hamat yic'ot ti Arpad, yic'ot ti Lair, yic'ot ti Sefarvaim, yic'ot ti Hena, yic'ot ti Ivá?” che'en Senaquerib. Che' tsi' yʌlʌyob suboñelob.

¹⁴Ezequías tsi' ch'ʌmʌ jini jun. Tsi' q'uele. Tsa' majli ti' Templo lac Yum. Tsi' tich'i jini jun ti' tojlel lac Yum.

¹⁵Tsa' caji i pejcan lac Yum ti oración: Jatet i Yumet Panchan yic'ot Pañimil, i Dioset Israel. Joyol a buchlib ti ángelob. Jatet jach i Dioset pejtelel yumʌlob ti pañimil. Jatet tsa' mele panchan yic'ot pañimil. Ubibeñon c t'an, c Yum. Ñich'tañon. Cañʌ a wut cha'an ma' q'uelon. Ubiben i t'an ili Senaquerib. Tsi' choco tilel cha'an mi' p'ajet, cuxulet bʌ Dios.

¹⁸Isujmʌch, c Yum, jini reyob loq'uemo' bʌ ti Asiria tsi' laj jisayob pejtelel tejclum tac. Tsi' laj chilbeyob i lum.

¹⁹Tsi' laj pulbeyob i diosob, come mach mero diosobic. Melbilob jach ti te' yic'ot ti xajlel. I ye'tel jach winicob. Jini cha'an tsa' jisʌntiyob.

²⁰Wʌle, c Yum, c Dioset bʌ lojon, coltañon lojon ti a p'ʌtʌlel. La' loq'uicon lojon ti' p'ʌtʌlel cha'an mi' ña'tañob pejtelel yumʌlob ti pañimil jatet jach cojach bʌ Dioset. Che' tsi' cha'le oración.

²¹Che' jini Isaías (i yalobil Amoz) tsi' choco majlel t'an ba'an Ezequías: Jiñʌch woli bʌ i yʌl lac Yum i Dios Israel: “Tsa'ix cubi a woración cha'an mij coltañet ti' tojlel Senaquerib, jini rey ti Asiria.

²²Ubin bajche' wolic jac'beñet. Mi caj c suben Senaquerib: Jini c cha'año' bʌ año' bʌ ti Sion woli' wajleñetob. Ts'a' mi' q'ueletob. Mi caj i yʌq'uetob ti quisin. Jini año' bʌ ti Jerusalén mi caj i wajleñetob che' ma' tʌts' a bʌ.

²³¿Majqui wola' contrajin ti a'leya yic'ot ti p'ajoñel? ¿Majqui tsa' contraji che' bʌ tsa' lon chañ'esa a bʌ? C'am tsa' cha'le t'an. Tsa' ts'a'le jini Ch'ujul Bʌ ti Israel.

²⁴Tsa' choco tilel ti p'ajoñel ñuc bʌ yumʌlob a cha'an. Tsa' p'ajayon. Ñuc tsa' mele a bʌ tic tojlel. Tsa' lon alʌ: Yic'ot bajc'ʌl carreta tac tsa'ix letsiyon lojon c'ʌlʌl ti' chañelal jini wits tac. Tsa'ix c'ʌjquiyon letsel ti' pam Líbano. Tsa'ix c seq'ue lojon jini chan tac bʌ ch'ujte', yic'ot jini taj wen fino bʌ. Tsa'ix c'ʌlʌl c'otiyon ti wen chan tac bʌ wits, ba' wen pim jini te'el tac, wen i t'ojol jax bʌ.

²⁵Ti cabʌl lum tsac mele tac pozo, tsac japbe i ya'lel. Tsa' ñumiyon ti xʌmbal ti Egipto ba' tam jini ñoja', che'et.

²⁶Yomix ma' ña'tan, ili tac tsa' bʌ a mele tsac ña'ta c'ʌlʌl wajali. Joñon, Dioson, tsac lu' ac'ʌ ti melol che' bajche' tsac wʌn ña'ta wajali. Tsa'ix ujti che' bajche' tsa cʌlʌ tic pusic'al. Cha'an tic p'ʌtʌlel tsa' mejli a jisan jini joy ts'ajquibil bʌ tejclum tac. Laj jembilix tsa' cʌle.

²⁷Tsa' c'uñ'ayob jini xchumtʌlob ti tejclum tac tsa' bʌ a jisa. Cabʌl tsi' cha'leyob bʌq'uen. Tsa' toj sajtiyob i pusic'al. Tsa' sujtiyob che' bajche' pimel, che' bajche' wen ch'ocʌyem bʌ jam, jini jam mu' bʌ i colel ti' jol otot. Lajalob bajche' i te'el ixim mu' bʌ i pul jini ticʌw ic' tilem bʌ ti' pasibal q'uin.

²⁸Cʌñʌl c cha'an pejtel a melbal bajche' ma' ñusan q'uin yic'ot baqui ma' majlel. Q'uelel c cha'an bajche' ma' chañ'esan a bʌ tic tojlel.

²⁹Mich' ma' q'uelon. Ma' chañ'esan a bʌ tic tojlel. Jini cha'an mi caj c xot otsan c mʌtc'ʌb ti a ñi'. Mi caj cotsʌbeñet i frenojlel a wej. Mi caj c wets'et majlel ti a bijlel ya' ba' tsa' tiliyet”. Che' tsi' cha'le t'an lac Yum ti' contra Senaquerib.

³⁰Dios tsi' sube Ezequías: Jiñʌch mu' bʌ caj i yujtel ti a tojlel cha'an mi la' ña'tan ma'anic mi caj i mʌjlel i cha'an Senaquerib. Ti ili jabil mi caj la' c'uxben i wut jini trigo yajlem jach bʌ ti lum tsa' coli. Che' ja'el ti jini tal to bʌ jab mi caj la' c'uxben i wut jini trigo to'ol jach bʌ tsa' coli. Pero ti' yuxp'ejlel jab mi caj la' cha'len pac' yic'ot c'ajbal. Mi caj la' pʌc' la' ts'usubil. Mi caj la' c'uxben i wut.

³¹Jini i colojbal winicob mu' bʌ i cʌytʌlob ti Judá, mi caj i cha' ts'ʌpob majlel i wi' yilal ya' ti' lumal. Mi caj i loq'uelob lamital ti Jerusalén. Mi caj i pam pujquelob ti' lumal cha'an mi' cha' p'ojlelob. Cha'an ti wen ñuc bʌ j c'uxbiya mi caj cujtesan iliyi.

³³Ma'anic mi caj i yochel ti Jerusalén jini rey ch'oyol bʌ ti Asiria. Ma'anic mi caj i wis choc ochel i te'el i jalʌjb. Mach talic yic'ot i mʌctijib cha'an mi' contrajin. Mach muq'uic i ñʌcchocon tec'oñib cha'an mi' letsel ochel.

³⁴Ya' ba' tsa' loq'ui tilel, ya' mi caj i cha' sujtel majlel. Ma'anic mi' caj ti ochel ti ili tejclum, che'en lac Yum.

³⁵Joñon mi caj cʌc' c bʌ cha'an ili tejclum. Mi caj j coltan cha'an c ñuclel, yic'ot cha'an i c'uxbintel c winic David. Che'ʌch tsi' cha'le t'an lac Yum.

³⁶Ti jim bʌ ora tsa' loq'ui tilel i yángel lac Yum. Tsi' jisa jini asiriyajob ya' ba' jijlemob. Tsi' jisa jo'tiquil i lujunc'al mil (185,000) winicob. Che' bʌ tsa' sʌc'a pañimil tsa' ch'ojyiyob jini cuxulob to bʌ. Tsi' q'ueleyob laj chʌmeñobix i pi'ʌlob.

³⁷Jini cha'an tsa' sujti majlel jini rey Senaquerib. Tsa' c'oti ti Nínive, ya' ba' chumul.

³⁸Ti jump'ejl q'uin che' bʌ woli' ch'ujutesan Nisroc i dios ya' ti' yotlel, tsa' c'otiyob cha'tiquil i yalobilob Senaquerib i c'aba' Adramelec yic'ot Sarezer. Tsi' tsʌnsayob ti espada. Tsa' puts'iyob majlel ti jini lum Ararat. Tsa' caji ti yumʌl Esarhadón ti' q'uexol i tat.