Read Chol Isaias 40 Bible Online

Isaias 40 - Chol bible

Isaias 40

¹Dios tsi' sube jini x'alt'añob i cha'an: Ñuq'uesʌbeñob i pusic'al, ñuq'uesʌbeñob i pusic'al c cha'año' bʌ.

²Pejcañob ti uts bʌ t'an jini año' bʌ ti Jerusalén. Subeñob cha'an tsa'ix ñumi i yorajlel i ch'ijiyemlel i pusic'al. Ñusʌbilix i mul. Cha' ñumelix mi caj cʌq'ueñob i yutslel c t'an cha'an tsa'ix i ñusayob wocol cha'an i mul, che'en Dios.

³An majqui woli' yʌl ti c'am bʌ t'an: Chajpʌbenla i bijlel lac Yum ya' ti colem bʌ i tiquiñal pañimil. Pʌtbenla majlel ñuc bʌ bij ya' ti tiquin lum cha'an tal lac Dios.

⁴Yom mi' bujt'el pejtel joctʌl, yom mi' pamuntel jini lomtʌl cha'an pamal mi' cʌytʌl. La' toj'esʌntic jini bij ya' bʌ xoyolmetel jax. La' mejlic bij ba' bulul bexel, che'en.

⁵Mi caj i tsictiyel i ñuclel lac Yum. Pejtel año' bʌ ti pañimil mi caj i tem q'uelob, come che'ʌch tsi' yʌlʌ lac Yum.

⁶Ubiben i t'an jini winic mu' bʌ i yʌl: “Subu”, che'en. “¿Chuqui yom mic sub?” cho'on. Subu ñumel ili t'an: “Lajalonla bajche' pimel mu' bʌ i chʌmel. Pejtelel lac ñuclel lajalʌch bajche' i nich pimel.

⁷Jini jam mi' tiquin. Mi' yajlel i nich pimel che' mi' wujtan lac Yum ti' yiq'uilel i yej. Lajalonla bajche' jini pimel.

⁸Mi' tiquin pimel yic'ot i nich. Mi' yajlel. Pero i t'an lac Dios mi' yajñel ti pejtelel ora”, che'en.

⁹Jatet mu' bʌ a tsictesan wen t'an yom ma' letsel ya' ti chan bʌ wits ti Jerusalén. C'am yom ma' puc majlel jini wen t'an. Mach ma' cha'len bʌq'uen. Subeñob winicob ti Judá: “¡La' q'uelela Dios!” che'etla.

¹⁰Come tal lac Yum Dios yic'ot cabʌl i p'ʌtʌlel cha'an mi' cha'len yumʌl. Mi caj i pʌy tilel i cha'año' bʌ tsa' bʌ i mʌñʌ. Jiñʌch i chobejtʌbal cha'an i bajñel e'tel.

¹¹Mi caj i cʌntan i cha'año' bʌ che' bajche' xcʌnta tiñʌme'. Mi caj i tempan tilel jini alʌ to bʌ. Mi caj i mec' majlel ti' tajn. Wen tsajil mi caj i pʌy majlel jini tiñʌme' cʌntʌbilob to bʌ i yal.

¹²¿Majqui tsi' p'isi i tamlel colem ñajb ti' c'ʌb? ¿Majqui tsi' yʌq'ue i ti' panchan ya' ba' jaxʌl? ¿Majqui tsi' tempa lum ba' yom mi' yajñel? ¿Majqui tsi' p'isi i yalel lum yic'ot wits che' bajche' ti balanza?

¹³¿Majqui tsi' cʌntesa i Ch'ujlel lac Yum? ¿Majqui tsi' yʌq'ue i ña'bʌbal?

¹⁴¿Tsa' ba i c'ajtibe yambʌ bajche' yom melol i ye'tel? ¿Majqui tsi' pʌsbe bajche' yom mi' melonla? ¿Majqui tsi' toj'esa ti' bijlel?

¹⁵Come lac Yum mi' q'uel pejtel winicob ti' petol pañimil che' bajche' junchʌjc' ja' mu' bʌ i yajlel ti yopom. Lajalob bajche' ts'ita' ts'ubejn ti balanza. Mi' ch'uy letsel jini lum joyol bʌ ti ja' che' bajche' ts'ubejn.

¹⁶Mach jastʌyic pejtel jini te' am bʌ ti Líbano cha'an mi lac lʌts ti c'ajc ya' ti' pulʌntib. Mach jastʌyic pejtelel alʌc'ʌl cha'an pulbil bʌ i majtan Dios.

¹⁷Anquese motocñayob winicob ¿chuqui i ye'tel ti' tojlel lac Yum? Ma'anic i c'ʌjñibal. Ma'anic i p'ʌtʌlel. Ma'anic chuqui mi mejlel i melbeñob.

¹⁸Ma'anic majch lajal bajche' Dios. ¿Mejl ba lac mel i yejtal tac?

¹⁹Mach mejlic lac lajin Dios yic'ot dioste' i melbal bʌ winic, tep'bil bʌ ti oro, ch'ʌlbil bʌ ti sʌsʌc taq'uin.

²⁰Jini winic mach bʌ anic i taq'uin cha'an mi' mʌn jump'ejl dios melbil bʌ ti oro mi' sʌclan te' mach bʌ yujilic joch'. Che' jini mi' ch'ʌmben majlel xjuc'te' mu' bʌ i melben i dios mach bʌ yujilic i ñijcan i bʌ.

²¹¿Mach ba anic a pusic'al? ¿Chucoch ma' mel lolom tac bʌ? ¿Mach ba ubibilic a cha'an i t'an Dios? ¿Mach ba subebiletic? ¿Mach ba wen tsiquilic i sujmlel Dios c'ʌlʌl ti' cajibal pañimil?

²²Jiñʌch Dios jini buchul bʌ ya' ti panchan ti' chañelal pañimil. Biq'uit mi' q'uel jini chumulo' bʌ ti pañimil bajche' xc'ajba sajc'. Mi' lich' panchan che' bajche' pisil bʌ otot ba' mi' chumtʌl.

²³Mi' chilbeñob i ye'tel jini p'ʌtʌlo' bʌ yic'ot yumʌlob ti pañimil cha'an ma'anix mi laj q'uelob ti ñuc. Ma'añobix i c'ʌjñibal.

²⁴Jumuc' jach an i ye'tel. Mi' bʌc' chilbentelob. Lajalob bajche' pimel mu' bʌ lac pʌc'. Che' cajel jax to woli' chuc lum jini pimel, Dios mi' tiquesan ti' yiq'uilel i yej. Ti ora jach mi' tiquin. Che' mi' tilel sutujt ic' mi' wejlan majlel che' bajche' tiquin bʌ i te'el ixim.

²⁵¿Chucoch ma' lajiñon bajche' te'? ¿Am ba yambʌ lajal bʌ bajche' joñon? che'en jini Ch'ujul Bʌ.

²⁶Letsan a wut cha'an ma' wen q'uel chuqui an. ¿Majqui i melbal jini ec' tac? Dios mi' yʌc'ob ti ajñel ti jujump'ejl. Mi' pejcañob ti' c'aba'. Ma'anic mi' wis cʌy i bʌ mi jump'ejlic ec', come i Yum mi' pʌyob majlel ti cabʌl bʌ i p'ʌtʌlel yic'ot i ñuclel. Mi' laj cʌntan ec'.

²⁷Israelob, i p'olbaletla Jacob, ¿chucoch mi la' lon al ma'anic woli' q'uel a wocol jini lac Yum, cha'an mach tojic lac Yum?

²⁸¿Maxto ba anic tsa' la' ña'ta? Jiñʌch lac Yum Dios tsa' bʌ i mele pejtel pañimil. ¿Mach ba anic ubibil la' cha'an? Ma'anic mi' c'uñ'an. Mach yujilic lujban. Mach lu' cʌmbilic lac cha'an i ña'tʌbal.

²⁹Mi' cha' p'ʌtesan jini c'uño' bʌ. Mi' cha' aq'ueñob i wersa jini mach bʌ p'ʌtʌlobix.

³⁰Jini ch'itoñob mi' lujbañob. Jini ch'iton winicob mi' c'uñ'añob. Mi' jilel i wersa.

³¹Pero jini mu' bʌ i chʌn pijtañob lac Yum cha'an mi' coltʌntelob mi caj i cha' tajob i p'ʌtʌlel. Mi caj i letselob che' bajche' xiye' yujil bʌ wejlel. Ma'anic mi' caj ti lujb'añob che' mi' cha'leñob ajñel. Ma'anic mi' caj ti c'uñ'an pañimil che' mi' cha'leñob xʌmbal.