Read Chol Isaias 42 Bible Online

Isaias 42 - Chol bible

Isaias 42

¹Wʌ'an c Winic mu' bʌ caj j coltan. Jiñʌch yajcʌbil bʌ c cha'an. Mi' wen aq'ueñon i tijicñʌyel c pusic'al. Tsa'ix cʌq'ue quEspíritu. Jini mi caj i sub chuqui toj ti' tojlel colem tejclum tac mach bʌ anic mi' cʌñoñob.

²Uts'at i pusic'al. Mach yujilic leto. Mach c'amic mi' cha'len t'an ti calle.

³Ma'anic mi' c'ʌs winic che' p'ump'unix bajche' jam tsa' bʌ t'uchtʌnti. Ma'anic mi' yʌp i nich c'ajc tsa'ix bʌ i tsuc'u ti lac pusic'al. Mi caj i ñuq'uesʌben i pusic'al jini c'un bʌ. Mi caj i yʌc' ti mejlel ti toj.

⁴Ma'anic mi' caj ti lujb'an. Anquese jal to mi' mel winicob pero mi caj i melob ti isujm. Toj mi caj i yujtel meloñel ti pañimil. Jini año' bʌ ti' t'ejl colem ñajb woli' pijtañob i mandar.

⁵Joñon a Yumon jini cojach bʌ Dios. Tsac mele panchan. Tsac lich'choco. Tsac mele jini pañimil yic'ot pejtel i bʌl. Mi cʌq'uen i c'uxtʌlel jini año' bʌ ti pañimil.

⁶A Yumon. Tsac pʌyʌyet cha'an ma' wajñel ti toj. Tsac yajcayet. Mi caj j cʌntañet. Mi caj cʌq'uet ti ajñel ti' tojlel winicob x'ixicob cha'an mi' ts'ʌctiyel jini xuc'ul* bʌ t'an mu' bʌ cʌq'ueñob. I wentajet c'ajc cha'an ma' pʌsbeñob c bijlel.

⁷Mi caj a camben i wut jini xpots'ob. Mi caj a loc'san jini ñup'ulo' bʌ ti ñujp'ibʌl ba' chuculob ti ic'yoch'an bʌ pañimil.

⁸Yumʌlon. Jiñʌch j c'aba'. Ma'anic mi cʌq'uen c ñuclel yambʌ. Ma'anic mi caj cʌq'uen dioste' i pejcʌntel ti ñuc.

⁹Ña'tan, tsa'ix ts'ʌctiyi c t'an che' bajche' tsac wʌn subu. Wolix c wʌn sub jini mu' to bʌ caj i yujtel. Che' maxto anic tsiquil mi caj c sub, che'en lac Yum.

¹⁰C'ʌyinla lac Yum ti tsiji' bʌ c'ay. La' ñuq'uesʌntic i c'aba' c'ʌlʌl ti ñajt bʌ pañimil. Ñuq'uesʌbenla i c'aba' lac Yum pejtel añet bʌ la ti colem ñajb, yic'ot ti' ti'il jini ñajb.

¹¹Cha'lenla c'ay winicob chumulet bʌ la ti' tiquiñal pañimil, jini xchumtʌlob ti Cedar, yic'ot xchumtʌlob ti Sela, yic'ot añet bʌ la ti chan bʌ wits.

¹²Tsictesanla i ñuclel lac Yum añet bʌ la ba' mi' bʌjlel q'uin.

¹³Lac Yum mi' loq'uel ti guerra che' bajche' p'ʌtʌl bʌ soldado. Mi' bʌx'an ti' ye'tel. C'am mi' cha'len oñel cha'an mi' chajpañob i bʌ i pi'ʌlob. Mi' mʌjlel i cha'an ti' tojlel i contrajob.

¹⁴Lac Yum woli' yʌl: Anix ora ñʌch'ʌlon. Ma'anic chuqui tsa cʌlʌ. Tsac tiq'ui c bʌ. Pero wʌle mi caj c cha'len c'am bʌ oñel che' bajche' x'ixic woli bʌ ti bajq'uel. Jesuñayon, tip'tip'ña c pusic'al cha'an jisaya.

¹⁵Mi caj c jisan wits yic'ot bujtʌl tac. Mi caj c laj tiquesan pejtel pimel. Mi' caj ti sajp'el ja'. Mi caj c tiquesan colem ja' tac.

¹⁶Mi caj c pʌy majlel jini xpots'ob ya' ti bij ba' mach ñumeñobic, ba' mach cʌmbilic bij i cha'añob. Mi caj c sʌq'uesan jini ic'yoch'an bʌ pañimil ya' ba' mi' cha'leñob xʌmbal. Mi caj c melbeñob bij ba' bululbexel. Mi caj c sutq'uin jini bujtʌl tac ti joctʌl. Pejtelel iliyi mi caj c mel ti' tojlel. Ma'anic mi caj c wis cʌy c mel che' maxto joloñic.

¹⁷Pero mi caj i yubiñob quisin jini mu' bʌ i ch'ujutesañob dios tac, mu' bʌ i lon subeñob: “C dioset lojon”, lon che'ob.

¹⁸Ñich'tanla israelob mach bʌ anic mi la' wubin i t'an Dios. Q'uelela jatetla mach bʌ q'uelelic la' cha'an.

¹⁹¿Majqui xpots' che' bajche' jatetla tsa' bʌ c yajca? ¿Majqui xcojcob? ¿Mach ba jinic israelob, suboñelob chocbilo' bʌ majlel c cha'an? Xpots' jini x'etel i cha'an lac Yum tsa' bʌ i yʌc'ʌ i bʌ tic wenta.

²⁰Come an cabʌl chuqui mi la' q'uel, pero ma'anic mi' c'otel la' wut. Tocol la' chiquin, pero mach la' womic la' wubin c t'an, che'en.

²¹Lac Yum tsi' ñuq'uesa i mandar cha'an mi' q'uejlel ti ñuc, come tojʌch ajñel. Tijicña mi' yubin lac Yum che' jini. Pero mach che'ic ti' tojlel israelob. Añob ti' p'ʌtʌlel yambʌ yumʌlob mu' bʌ i tic'lañob. Ti pejtelelob tsa' puts'iyob ti ch'en tac yic'ot ti mʌjquibil. Pero ma'anic majch tsi' ñopo i coltañob. Ma'anic majch tsi' yʌc'ʌyob ti colel.

²³Ti pejteletla yom mi la' ñich'tan ili t'an cha'an mi la' taj la' cʌntesʌntel. Yom mi la' ña'tan jini bʌbʌq'uen bʌ mu' bʌ caj ti ujtel.

²⁴¿Majqui tsi' yʌc'ʌ Jacob ti' c'ʌb xujch'ob? ¿Majqui tsi' yʌc'ʌ Israel ti tic'lʌntel? ¿Mach ba jinic lac Yum? Come tsi' cha'leyob mulil ti' contra lac Yum. Ma'anic tsi' ñopbeyob i t'an. Ma'anic tsi' ñich'tʌbeyob i mandar.

²⁵Jini cha'an Dios tsi' wersa pʌsbeyob i mich'lel. Tsi' jisayob ti guerra. Anquese joyolob ti c'ajc, ma'anic tsi' ch'ʌmbeyob isujm. Ma'anic tsi' ñopoyob mi tilem ti Dios.