Read Chol Isaias 43 Bible Online

Isaias 43 - Chol bible

Isaias 43

¹Pero wʌle woli' yʌl lac Yum tsa' bʌ i mele Jacob: Mach a cha'len bʌq'uen Israel, come joñon tsac mʌñʌyet. Tsa cotsʌbeyet a c'aba'. C cha'añet.

²Che' ma' ñumel ya' ti ja', che' cabʌl a wocol, ya' añon quic'otet. Che' ma' ñumel ya' ba' tam ja', che' cabʌl a tic'lʌntel, ma'anic mi caj a sujp'el ochel. Che' ma' c'axel ti c'ajc, ma'anic chuqui mi caj i tumbeñet. Ma'anic mi caj i pulet c'ajc.

³Come joñon a Yumon a Dioson, Ch'ujulon Bʌ i cha'an israelob, a waj Coltayajon. Joñon tsa cʌc'ʌ Egipto, yic'ot Etiopía, yic'ot Seba ti' p'ʌtʌlel jini yumʌl Ciro ti' a q'uexol cha'an mij cʌntañet, Israel.

⁴Come c'uxbibiletla c cha'an, jini cha'an tsa cʌc'ʌyob ti chʌmel yaño' bʌ ti a q'uexol, come uts'atax mij q'uelet. Ñuquet tic wut.

⁵Mach a cha'len bʌq'uen, come añon quic'otet. Mi caj c tempan tilel ti Sion a walobilob ba' pam pujquemob ya' ti' pasibal q'uin yic'ot ti' bʌjlibal q'uin.

⁶Mi caj c pʌy loq'uel calobilob ti norte yic'ot ti sur. Ma'anic mi caj i mʌctʌntelob. Anquese ñajt añob mi caj c pʌyob tilel.

⁷Mi caj i laj tilelob mu' bʌ i pejcañoñob ti' yum. Tsac meleyob cha'an mi' tsictesañob c ñuclel. C melbalob.

⁸Cha' pʌyʌyob tilel ti pejtelelob, jini xpots'ob año' bʌ i wut yic'ot xcojcob año' bʌ i chiquin.

⁹La' i much'quiñob i bʌ pejtelel winicob ti pejtelel pañimil. ¿Majqui tsi' wʌn ña'ta chuqui woli' yujtel? La' tilicob testigojob mi an majqui tsi' wʌn subu chuqui woli' yujtel. Mi ma'anic testigo la' i ña'tañob joñon jach mic wʌn sub chuqui mi' caj ti ujtel.

¹⁰Pero testigojetla, israelob, la' waj coltayajon. C winiquetla. Tsac wʌn yajcayetla cha'an mi la' cʌñon, cha'an mi la' ñopon, cha'an mi la' wen ña'tan ma'anic yambʌ ti pejtelel ora mi ti wajali mi ti tal to bʌ ora. Joñon jach la' Yumon la' Dioson.

¹¹Joñon jach Yumʌlon. Ma'anic yambʌ xColtaya.

¹²Tsa'ix cʌc'ʌ c t'an. Tsac cha'le coltaya. Tsa cʌc'ʌ c bʌ ti cʌjñel che' bʌ tsa' la' choco la' dioste' tac. Testigojetla c cha'an.

¹³Che' maxto anic i sʌclel pañimil añonix. Añon ti pejtelel ora. Ma'anic majch mi mejlel i chilet tij c'ʌb. Che' an chuqui com c mel ma'anic majch mi mejlel i mʌctan.

¹⁴Lac Yum jini la' waj Coltaya, jini Ch'ujul Bʌ i cha'an Israel woli' yʌl: Cha'an c'ux mi cubiñet mi caj c choc majlel soldadojob ti' contra Babilonia. Mi' cajelob ti cabʌl bʌq'uen jini año' bʌ ti Babilonia mu' bʌ i lon chañ'esañob i bʌ.

¹⁵Joñon la' Yumon, Ch'ujulon Bʌ la' cha'an tsa' bʌ c mele Israel. La' Reyon.

¹⁶Tsac jambeyet bij ya' ti ojlil colem ja' ba' tsa' ñumiyet ti colem ñajb.

¹⁷Joñon tsac pʌyʌ loq'uel ti Egipto soldadojob cabʌl bʌ i p'ʌtʌlel yic'ot carreta yic'ot caballo. Temel tsa' jiliyob ti colem ja'. Ma'anix tsa' chʌn tejchiyob. Tsa' laj jiliyob ti junyajlel che' bajche' mi' yajpel c'ajc.

¹⁸Pero cʌyʌx la' ña'tan chuqui tac tsa' ujti ti wajali.

¹⁹An tsijib tac bʌ mu' bʌ caj c pʌsbeñetla. Mach jalix mi caj la' q'uel. Wolix c tech. Mi caj c ñusan bij ya' ba' tiquin pañimil cha'an mi' sujtelob c cha'año' bʌ. Mi caj cʌc' ja' ya' ba' jochol lum. ¿Mach ba' tsictiyemic que'tel?

²⁰Jini bʌte'el tac ti mate'el, yic'ot bajlum yic'ot ja'al pech mi caj i tsictesʌbeñon c ñuclel. Come mi cʌc' ti ñumel ja' ya' ba' tiquin pañimil, yic'ot colem ja' ti' tiquiñal pañimil cha'an mi' japob jini yajcʌbilo' bʌ c cha'an.

²¹Tsa'ix c wʌn mele c winicob cha'an mi' yochelob ti calobil, cha'an mi' tsictesañob i ñuclel j c'aba'.

²²Pero ma'anic tsa' chʌn ña'tayon, Jacob. Tsa' lujba a tsajcañon.

²³Mach ti pejtelelic a pusic'al tsa' wʌq'ueyon jini tsʌnsʌbil bʌ c majtan. Ma'anic tsaj c'ajtibeyet cabʌl c majtan. Ma'anic tsaj c'ajtibeyet pom.

²⁴Ma'anic tsa' mʌmbeyon xojocña bʌ pom. Ma'anic tsa' wʌq'ueyon i tijicñʌyel c pusic'al yic'ot c majtan am bʌ i lewil. Pero tsa' wutsi p'olbeyon c ch'ijiyemlel cha'an cabʌl a mul yic'ot a jontolil.

²⁵Joñon mic bajñel ñusʌbeñet a mul ti' yutslel c pusic'al. Ma'anix mi caj c chʌn ña'tan a mul.

²⁶Yomix ma' mel a bʌ quic'ot. Subu a bʌ cha'an mic ñusan a mul, cha'an mij q'uelet ti uts'at.

²⁷A pʌq'uil tsi' cha'leyob mulil c'ʌlʌl ti oñiyi. Pejtel a ñojte'elob tsi' ñusayob c t'an.

²⁸Jini cha'an tsac loc'sa a motomajob ti' ye'tel. Tsa cʌc'ʌ ti p'ajtʌl jini israelob. Mi caj i yubiñob quisin.