Read Chol Isaias 45 Bible Online

Isaias 45 - Chol bible

Isaias 45

¹Jiñʌch i t'an lac Yum tsa' bʌ i sube Ciro jini yajcʌbil bʌ i cha'an: Joñon wolij coltañet cha'an ma' jisan cabʌl tejclum tac, cha'an ma' jisʌbeñob i p'ʌtʌlel ñuc bʌ reyob. Mi cʌc' ti jejmel i ti' tac Babilonia. Ma'anic majch mi mejlel i cha' ñup'.

²Joñon ñaxan mic majlel ti' tojel a wut. Mi caj c pamun majlel bij. Mi caj c bic'ti c'ʌs jini puerta tac yic'ot bara tac melbil bʌ ti tsucu taq'uin.

³Mi caj c loc'sʌbeñet ti' sʌclel pañimil jini chubʌ'añʌl letsem tac bʌ i tojol mucbil bʌ ti lum ba' ic'yoch'an bʌ. Che' jini mux caj a ña'tan a Yumon. Tsac pʌyʌyet ti a c'aba', Ciro. I Dioson Israel.

⁴Cha'an c'ux mi cubin c winic Jacob (jini c winic Israel), jini cha'an tsac wa'chocoyet ti ili e'tel. Tsac pʌyʌyet ti a c'aba'. Tsa cʌq'ueyet a p'ʌtʌlel ti yumʌl anquese mach a cʌñʌyonic. Che' jini mi caj j coltan Israel tsa' bʌ c yajca.

⁵Joñon jach Yumʌlon. Ma'anic yambʌ. Joñon jach Dioson. Mi caj c p'ʌtesañet anquese mach a cʌñʌyonic,

⁶cha'an mi' ña'tañob ti pejtelel pañimil c'ʌlʌl ba' mi' pasel q'uin yic'ot ba' mi' bʌjlel q'uin. Ma'anic yambʌ cojach joñon. Joñon jach Yumʌlon. Ma'anic lajal bʌ bajche'on.

⁷Joñon mic melben i sʌclel q'uin yic'ot ac'ʌlel. Mi cʌq'ueñob i wenlel winicob yic'ot jini bʌbʌq'uen bʌ. Yumʌlon. Mic mel pejtelel iliyi.

⁸La' tilic toj bʌ a pusic'al che' bajche' ja'lel ti chan. La' wen p'ojlic ti pañimil i coltʌntelob winicob yic'ot toj bʌ i pusic'al. C melbalʌch. Joñon, la' Yum, tsac mele.

⁹Tal cabʌl wocol ti' tojlel jini mu' bʌ i yʌ'len i Yum tsa' bʌ i mele. Lajalonla bajche' p'ejt melbil bʌ ti lum. Jini melbil bʌ ti lum, ¿yom ba mi' suben xmeloñel?: “¿Chuqui wola mel?” Jini oc'ol ma'anic mi' suben xmel uc'um: “Mach uts'atic wola' melon”.

¹⁰Che' ja'el jini alʌl mach mejlic i suben i tat: “¿Chucoch tsa' p'oloyon?” Mach mejlic i suben i ña': “¿Chucoch tsa' wʌc'ʌyon ti pañimil?” Mach che'ic mi' yʌlob.

¹¹Jini lac Yum, i Dios israelob tsa' bʌ i mele Israel, tsi' yʌlʌ: ¿Yom ba ma' letsan a t'an tij contra? ¿Yom ba ma' cʌntesañon bajche' yom mic mel jini com bʌ c mel?

¹²Joñon tsac mele pañimil. Tsac mele winic ti pañimil. Tsac lich'choco panchan tij c'ʌb. Tsa cʌc'ʌ jini ec' ti' yajñib tac. Añʌch c p'ʌtʌlel cha'an mic ts'ʌctesan pejtelel tsa' bʌ c subu.

¹³Joñon tsac yajca Ciro cha'an com cʌc' ti tsictiyel c tojel. Mi caj c toj'esʌben majlel pejtel i bijlel. Ciro mi caj i cha' wa'chocobeñon c tejclum. Mi caj i yʌc' ti colel c cha'año' bʌ tsa' bʌ cʌjchiyob majlel. Ma'anic mi caj i c'ajtibeñob tojoñel, che'en i Yum Panchan yic'ot Pañimil.

¹⁴Woli' yʌl lac Yum: Talob jini año' bʌ ti Egipto yic'ot xchoñoñel loq'uemo' bʌ ti Etiopía, yic'ot jini sabeojob, cha'an mi' yochelob ti a wenta ti majtan e'tel. Mi caj i tsʌcleñet majlel. Mi caj i ñocchocoñob i bʌ ti a tojlel cha'an mi' c'ajtiñob i coltʌntel ti wocol t'an, come ya' jach ti a tojlel mi' yajñel Dios, jini jach bʌ Dios. Mi caj i yʌlob: “Isujm, wʌ'an Dios a wic'ot. Ma'anic yambʌ”, che'ob.

¹⁵Isujm ma' mujcun a bʌ Dios, i Dioset bʌ Israel. Ma'anic mij q'uel bajche' ma' mel a we'tel, caj Coltaya.

¹⁶Mi' cajelob ti quisin jini xmel diosob ti pejtelelob. Mi caj i puts'elob cha'an bʌq'uen.

¹⁷Pero Israel mi caj i taj i coltʌntel ti pejtelel ora ti' tojlel lac Yum. Ma'anix mi caj i chʌn cha'len quisin yic'ot bʌq'uen ti pejtelel ora.

¹⁸Lac Yum, jiñʌch Dios. Tsi' mele panchan yic'ot pañimil, yic'ot pejtelel chuqui tac an. Mach lolomic tsi' mele pañimil. Tsi' mele cha'an i chumlib winicob. Tsi' yʌlʌ: Joñon Yumʌlon, ma'anic yambʌ.

¹⁹Ma'anic mic cha'len t'an ti mucul. Ma'anic mic mujcun c bʌ ti ic'yoch'an bʌ pañimil. Ma'anic tsac subeyob i p'olbalob Jacob cha'an mi' lon tsajcañoñob. Joñoñʌch la' Yumon. Mic sub chuqui tac isujm. Mic sub chuqui tac toj, che'en.

²⁰Much'quin la' bʌ ba' añon. Tempan la' bʌ pejteletla mach bʌ anic tsa' jisʌntiyetla cha'an Ciro, cha'an mi la' wubin jini mu' bʌ caj c subeñetla. Ma'anic i ña'tʌbal winicob mu' bʌ i q'uechob ñumel i diosob. Mi' lon c'ajtibeñob i coltʌntel ti' tojlel dioste' tac mach bʌ yujilic coltaya.

²¹Mi tsi' coltayetla dioste' subula. Teme la' t'an. Tsictesanla i sujmlel. ¿Majqui tsi' wʌn subu jini woli bʌ i yujtel? ¿Mach ba' anic tsac subu ti wajali? Ma'anic yambʌ Dios. Joñon jach Dioson. Tojon, Xcoltayajon. Ma'anic yambʌ. Joñon jach.

²²Q'ueleyonla pejtel año' bʌ ti pañimil cha'an mi la' taj la' coltʌntel. Come Dioson, ma'anic yambʌ, joñon jach, che'en lac Yum.

²³Tic bajñel jach tsa cʌc'ʌ c t'an. Tilem ti toj bʌ c pusic'al jini t'an tsa' bʌ loq'ui ti quej. Mach chʌn sujtic. Pejtel winicob mi caj i ñocchocoñob i bʌ tic tojlel. Mi caj i lu' melob i bʌ tic tojlel.

²⁴Che' jini mi caj i yʌlob: “Isujm tilem ti lac Yum toj bʌ lac pusic'al yic'ot lac p'ʌtʌlel mu' bʌ i yʌq'ueñonla”, che'ob. Mi caj i tilelob jini tsa' bʌ i ts'a'leyoñob. Ti pejtelob mi' cajelob ti quisin.

²⁵Mi caj j q'uel ti toj pejtel mero isujm bʌ i p'olbal Israel. Mi caj i mʌjlel i cha'añob, che'en lac Yum.