Read Chol Isaias 5 Bible Online

Isaias 5 - Chol bible

Isaias 5

¹Mi caj j c'ʌyin jini c'ux bʌ mi cubin. Jiñʌch i c'ʌyintel i ts'usubil j cʌñʌ bʌ mu' bʌ j c'uxbin. An i ts'usubil ti jumpejt wen bʌ lum.

²Tsi' top'o jini lum, tsi' laj loc'sa jini xajlel tac. Tsi' pʌc'ʌ jini wen c'oc' bʌ pac'. Ya' ti yojlil, tsi' wa'choco chan bʌ ts'ajc cha'an mi' cʌntan. Tsi' wʌn mele ja'el jump'ejl ajñibʌl ba' mi' yʌjts'el jini ts'usub. Che' jini tsa' caji i pijtan cha'an mi' yʌc' i wut jini ts'usubil, pero wen paj jach tsa' loq'ui i wut. Ma'anic tsaj bʌ i wut.

³Tsi' yʌlʌ lac Yum: Jini cha'an, winicob ti Jerusalén yic'ot ti Judá, yom mi la' ña'tan majqui an i mul mi joñon o mi jini c ts'usubil.

⁴¿Chuqui to yom mic mel ya' tic ts'usubil? ¿Anto ba chuqui ma'anic tsac melbe? ¿Chucoch wen paj tsi' yʌc'ʌ i wut? ¿Chucoch ma'anic tsi yʌq'ueyon tsaj bʌ i wut?

⁵Mi caj c subeñetla chuqui mi caj c tumben c ts'usubil. Mux caj c jemben i mʌjquil cha'an mi' sujtel ti potrero. Alʌc'ʌl tac mi caj i yochel i t'uchtan ba' tocol i ts'ajquil.

⁶Mux caj c junyajlel cʌy. Ma'anix mi caj c chʌn ac' ti porajintel mi ti ac'ñʌntel. La' to wats pim'ac ti ch'ixol yic'ot tsajatuñol. Mux caj c tic' jini tocal cha'an ma'anix mi' chʌn yʌsan ja'al ya' ti' tojlel. Che' tsi' yʌlʌ lac Yum.

⁷Jini i ts'usubil i Yum Panchan yic'ot Pañimil, jiñʌch Israel yic'ot Judá. Jiñʌch i pʌc'ʌb c'uxbibil i cha'an. Lac Yum tsi' lon pijta cha'an mi' wen jac'beñob i mandar, pero laj stsʌnsajob. Tsi' lon pijta chuqui tac uts'at. Tsa' jach i yubibeyob i yuq'uel jini tic'lʌbilo' bʌ.

⁸Obol jax la' bʌ jatetla mu' bʌ la' mʌn cabʌl la' wotot, mu' bʌ la' mʌctan cabʌl lum. Jini jach mi la' lon ña'tan chuqui yom la' bajñel pusic'al cha'an wen chumuletla ti pañimil.

⁹Lac Yum tsa'ix i tsictesʌbeyon: Jocholix jini colem otot wen uts'at tac bʌ. Ma'añobix i yumob.

¹⁰Mi caj i lon pʌc'ob uxp'ejl hectárea i ts'usubil, pero ya chʌmp'ejl jach litro mi caj i loq'uel i ya'lel. Mi caj i lon pʌc'ob lujuncujch pac', pero ya juncujch jach mi caj i yʌc' i wut.

¹¹P'ump'un jax mi caj la' wubin jatetla, come seb to mi la' loq'uel majlel ti lembal. Che' ac'ʌlelix mi la' sujtel.

¹²Mi la' cha'len q'uiñijel yic'ot lembal, yic'ot música, guitarra, lajte', yic'ot amʌy. Pero ma'anic mi la' p'is ti wenta i t'an lac Yum.

¹³Jini cha'an lac Yum mux caj i choquetla majlel ti cʌjchel ti ñajt bʌ pañimil, come ma'anic mi la' ch'ʌmben isujm i t'an lac Yum. Mi caj la' chʌmel ti wi'ñal yic'ot tiquin ti' ti la' pejtelel, jini ñuc taco' bʌ yic'ot p'ump'uño' bʌ ja'el.

¹⁴Jini i yajñib chʌmeño' bʌ woli' caw i yej yilal che' bajche' ajin, cha'an mi' mʌsan jini tejclum yic'ot i chubʌ'an yic'ot pejtel jini tijicñayo' bʌ mu' bʌ i c'uxbiñob pañimil.

¹⁵Ti jim bʌ ora mi caj i peq'uesʌntelob jini winicob mu' bʌ i chañ'esañob i bʌ. Mi caj i ju'sʌbentel i pusic'al jini ñuc bʌ mi' q'uel i bʌ.

¹⁶I Yum Panchan yic'ot Pañimil mi caj i pʌs i ñuclel ti toj bʌ meloñel. Jini Ch'ujul bʌ Dios mi caj i pʌs i bʌ ti ch'ujul come toj pejtel chuqui mi' cha'len.

¹⁷Jini colem tejclum mi caj i sujtel ti' buc'ujib alʌc'ʌl ba' mi caj i cha'len buc'bal tiñʌme' yic'ot chivo.

¹⁸Obol jax la' bʌ mu' bʌ la' chʌn cha'len jontolil, che' bajche' mi' tujc'an majlel lazo jini tat wacax.

¹⁹Mi la' tse'tan jini Chujul Bʌ i cha'an Israel. Mi la' lon al: Se'ñun a bʌ cha'an ma' wʌq'ueñon lojon wocol ti ora, che'etla.

²⁰Obol la' bʌ mu' bʌ la' lon q'uel ti uts'at jontolil. Mi la' wʌl jontol jini uts'at bʌ. Mi la' wʌl sʌc jini ic'yoch'an bʌ, mi la' wʌl ic'yoch'an jini c'ajc. Tsaj mi la' wubin jini ch'aj bʌ, pero ch'aj mi la' wubin jini tsaj bʌ.

²¹P'ump'un jax mi caj la' wubin mu' bʌ la' lon ña'tan cabʌl la' ña'tʌbʌl.

²²Obol jax la' bʌ come ch'ejletla ti lemoñel. Bʌxetla ti' melol lembal.

²³Mi la' ch'ʌm taq'uin cha'an mi la' mucben i mul xjontolil cha'an mi la' p'ump'un tic'lan jini mach bʌ anic i mul.

²⁴Jini cha'an i Yum Panchan yic'ot Pañimil mi caj i meletla. Mi caj la' jilel che' bajche' mi' sʌc jilel ti c'ajc jini tiquin te' yic'ot tiquin yopol. Mi caj la' yajlel che' bajche' te' che' mi' yoc'mʌl i wi'. Che' bajche' i nich pimel mi caj la' sujtel ti ts'ubejn. Come tsa' la' ñusʌbe i t'an i Yum Panchan yic'ot Pañimil. Tsa'ix la' ts'a'le jini Ch'ujul Bʌ i cha'an Israel.

²⁵Jini cha'an mich'ix lac Yum ti' tojlel i cha'año' bʌ. Tsa'ix i sʌts'ʌ i c'ʌb cha'an mi' yʌq'ueñob i toj i mul. Jini wits tac mi' ñijcan i bʌ. P'ulul mi caj i cʌytʌlob jini ch'ujlelʌlob che' bajche' misujelʌl ti calle. Anquese cabʌlix i wocol, pero maxto lajmic i mich'lel lac Yum. Mu' to caj i chʌn aq'ueñob wocol.

²⁶Che' jini lac Yum mi caj i letsan i bandera cha'an mi' pʌy tilel colem tejclum tac am bʌ ti ñajtʌl. Ti' ch'uyub jach mi caj i wets' tilel winicob año' bʌ ti jujunwejl pañimil. Ora jach mi caj i julelob.

²⁷Ma'anic mi juntiquilic c'un bʌ, yujil bʌ yajlel, yujil bʌ wʌyel. Tsʌts cʌchbilob i ñʌc'. Mach yujilic jejmel i ch'ajñal i zapato.

²⁸Wen jay tac i te'el i jalʌjb. Wen tsʌts xotbilob i jalʌjb cha'an mi' julob. Tsʌts i pacaralel i yoc caballo che' bajche' xajlel. Ajñel mi' majlel i carreta che' bajche' sutujt ic'.

²⁹Lajal muc'ob ti oñel bajche' bajlum che' yomix i chuc i we'el. Ma'anix majqui mi mejlel i chilben che' cats' c'uxulix i cha'an.

³⁰Ti jim bʌ q'uin ju'ucña mi' cajelob ti t'an ti la' contra che' bajche ju'ucña jini colem ñajb. Che' mi la' ñejñan pañimil, wen ic'yoch'an jax cha'an wocol. Mosbilix jini q'uin yilal cha'an cabʌl tocal.