Read Chol Isaias 51 Bible Online

Isaias 51 - Chol bible

Isaias 51

¹Ubinla, jatetla, mu' bʌ la' ñop la' mel chuqui toj, mu' bʌ la sʌclan la' Yum. Q'uelela baqui tilemetla, che' bajche' tsa' loq'ui xajlel ti xajlelol. Abraham yic'ot Sara la' ñojte'elob tsi' yʌc'ʌyetla ti pañimil. Che' bʌ tsac pʌyʌyob i bajñelob jach. Tsaj coltayob, tsa cʌc'ʌyob ti p'ojlel.

³Isujm mi caj c cha' aq'ueñob i tijicñʌyel i pusic'al jini israelob. Mi caj c cha' mel ti uts'at pejtel jini jejmenix bʌ ti' tojlel. Mi caj c sutq'uin jini tiquin bʌ lum ti wen bʌ lum cha'an uts'at mi' yʌc' i wut che' bajche' Edén i pʌc'ʌb la' Yum. Tijicñayob jini ya' bʌ añob. Mi caj i subeñoñob wocolix cʌlʌ. Cabʌl mi caj i cha'leñob c'ay.

⁴Ñich'tanla, ubinla c t'an, israelob c cha'año' bʌ. Mi caj cʌc' ti jajq'uel c mandar. Mi caj c cha'len meloñel ti toj ti' wut pejtel pañimil.

⁵Lʌc'ʌlix i yorajlel cha'an mi' mʌjlel c cha'an. Lʌc'ʌlix a coltʌntel, Israel. Mi caj c pʌy pejtel pañimil cha'an mi' melob i bʌ tic tojlel. Mi caj i pijtañoñob jini año' bʌ ti lum joyol bʌ ti ja'. Mi caj i ñopoñob.

⁶Letsan la' wut ti panchan. Q'uelela jini lum ja'el. Jini panchan mi caj i sʌc jilel che' bajche' buts'. Jini pañimil mi caj i tsuculiyel che' bajche' pisil. Jini ya' bʌ chumulob jomocñayob mi caj i chʌmelob. Pero jini coltʌbilo' bʌ c cha'an mi caj i yajñelob ti pejtelel ora. Mach jilic c yumʌntel ti pejtelel ora.

⁷Ñich'tanla c cha'añet bʌ la, mu' bʌ la' mel chuqui toj, mu' bʌ la' p'is ti la' wenta j cʌntesʌbal. Mach la' bʌc'ñan winicob yujilo' bʌ a'leya. Mach la' mel la' pusic'al che' mi' p'ajetob.

⁸Come mi caj i jilelob che' bajche' pisil mu' bʌ i c'ux ts'islum, che' bajche' i tsutsel tiñʌme mu' bʌ i c'ux motso'. Pero mux i yajñel ti pejtelel ora jini woli bʌ j coltan. Mij coltan winicob yic'ot i yalobilob ti lajm ti lajm. Che' tsi' yʌlʌ lac Yum.

⁹Caña a wut c Yum, caña a wut, wa'i' yic'ot cabʌl a p'ʌtʌlel che' bajche' ti wajali. Jatet tsa' tsʌnsa jini colem bʌ ajin, jiñʌch Egipto.

¹⁰Jatet tsa' tiquesa colem ñajb. Tsa' jamʌ bij ti ja' ba' tsa' ñumiyob jini tsa' bʌ a mʌñʌyob.

¹¹Che' mi' sujtelob jini coltʌbilobix bʌ i cha'an lac Yum mi' cajelob ti c'ay. Jini mu' bʌ i sujtelob ti Jerusalén mi caj i yʌq'uentelob i tijicñʌyel i pusic'al mach bʌ yujilic jilel. Junyajlel tijicñayob. Mi caj i lajmel pejtel wocol. Ma'anix ch'ijiyem bʌ.

¹²Joñon la' Yumon. Mic ñuq'uesʌbeñetla la' pusic'al. Mi cʌq'ueñetla la' tijicñʌyel. ¿Yom ba mi la' bʌc'ñan winicob yujilo' bʌ chʌmel? ¿Mach ba lajalobic bajche' pimel?

¹³Tsa'ix a ñajʌtesa a Yum tsa' bʌ i meleyet, tsa' bʌ i lich'choco panchan, tsa' bʌ i xuc'choco jini pañimil ti' yajñib. Jini cha'an tsiltsilñayet ti bʌq'uen ti' tojlel a contra mu' bʌ i mich'leñet, mu' bʌ i tilel i tsʌnsañet. ¿Yom ba ma' chʌn bʌc'ñan winicob ti jujump'ejl q'uin?

¹⁴Mach jalix mi caj i loq'uelob ti libre jini cʌchʌlo' bʌ ti wocol. Ma'anic mi caj a chʌmel ti mʌjquibʌl mi ti wi'ñal.

¹⁵Joñon a Yum Dios, i Yumon Panchan yic'ot Pañimil. Jiñʌch j c'aba. Tsac t'oxo colem ñajb. Tsac tiquesʌbeyet bij ti ojlil wʌlʌcña bʌ ja'.

¹⁶Tsa'ix c lich'i panchan. Tsac xuc'choco jini pañimil ti' yajñib. Tsa'ix cotsa c t'an ti a wej cha'an ma' sub. Tsaj cʌntayet tic p'ʌtʌlel. Tsac sube Sion: “Jatet c tejclumet”. Che' tsi' yʌlʌ lac Yum.

¹⁷Ch'ojyen Jerusalén, caña a wut. Tsa'ix a wubi i mich'ajel lac Yum. P'ump'un tsa' cʌleyet che' bajche' xyʌc'ajel mach bʌ mejlix ti xʌmbal che' bʌ tsa'ix i lu' jisa lembal.

¹⁸Ti pejtelel a walobilob ma'anic mi juntiquilic mu' bʌ mejlel i toj'esañet majlel. Ti pejtelel a walobilob tsa' bʌ a cosayob ma'anic mi juntiquilic mu' bʌ i chuquet majlel ti a c'ʌb.

¹⁹Jini cha'chajp wocol tsa' tili ti a tojlel: i jisʌntel a chubʌ'an yic'ot wi'ñal. Tsa' laj jili a pi'ʌlob. Lamital tsa' chʌmiyob ti wi'ñal. Lamital tsa' tsʌnsʌntiyob ti guerra. ¿Majqui mi caj i puñtañet? ¿Majqui mi mejlel c choc tilel cha'an mi' ñuq'uesʌbeñet a pusic'al?

²⁰Ma'añobix i p'ʌtʌlel a walobilob. Pam chocbilob ti' xujc tac calle che' bajche' bʌte'el ts'i' tsa'ix bʌ yajli ti yac. Laj lojwemob cha'an i mich'ajel lac Yum, cha'an woli' yʌ'leñet a Dios.

²¹Jini cha'an ñich'tan c t'an. P'ump'uñet jax. Yʌquet, pero mach cha'anic lembal.

²²Lac Yum Dios jiñʌch mu' bʌ i cʌntan i cha'año' bʌ. Lac Yum woli' yʌl: Q'ueleyon. Wolix i cha' lajmel c mich'ajel am bʌ ti a tojlel. Ma'anix mi caj a chʌn ubin c mich'ajel.

²³Pero mi caj cʌq'ueñob i yubiñob c mich'ajel jini tsa' bʌ i yʌc'ʌyet ti wocol, tsa' bʌ i tic'layet, tsa' bʌ i t'uchtayet. Tsa' ñumiyob ti a pat che' bajche' ti calle, che'en.