Read Chol Isaias 52 Bible Online

Isaias 52 - Chol bible

Isaias 52

¹Ch'ojyen, ch'oyenla añet bʌ la ti Jerusalén. Wen p'ump'un tsa' ajniyetla. P'ʌtesan la' bʌ. Lʌpʌx la' pislel, jini c'ax uts'at bʌ, cha'an mi la' wajñel ti ch'ujul. Mach chʌn talobix jini xmulilob mach bʌ i cʌñʌyobic Dios.

²Ch'ojyenla, tijcanla i lumil la' woc ya' ba cʌchʌletla, Jerusalén. Loq'uenla ti libre. Loc'sanla jini lazo.

³Lac Yum woli' yʌl: Tsa' wersa pʌjyiyetla ba'an yambʌ la' yum pero ti majtan jach. Ma'anic la' tojol. Jini cha'an mach ti taq'uinic mi caj c cha' mʌñetla che' mij coltañetla.

⁴Ti wajali tsajniyob ti chumtʌl ti Egipto c winicob. Ti wi'il jini asiriajob tsa' caji i to'ol tic'lañob anquese ma'anic i mul.

⁵Wʌle, ¿chuqui wolij q'uel? Tsa' to'ol pʌjyiyob majlel c cha'año' bʌ. Tsa' tic'lʌntiyob. I yumob tsi' chañ'esayob i bʌ. Mi' p'ajob j c'aba' ti jujump'ejl q'uin.

⁶Pero che' mic tsictesan c p'ʌtʌlel, wersa mi caj i cʌñon c tejclumob. Mi caj i ña'tañob Joñoñʌch mu' bʌ c pejcañob. Joñoñʌch, che'en.

⁷Wen uts'atax ya' ti pam wits i yoc jini mu' bʌ i tilel cha'an mi' tsictesan jini Wen T'an, cha'an mi' tajob i ñʌch'tʌlel i pusic'al yic'ot i coltʌntel jini año' bʌ ti Sion, cha'an mi' ña'tañob woli ti yumʌntel lac Dios.

⁸¡Ñich'tanla! C'am woliyob ti t'an xcʌntayajob la' cha'an. Wen c'am mi' cha'leñob oñel cha'an tijicñayob. Come mi caj i q'uelob lac Yum woli bʌ i cha' lʌc'tiyel tilel ti Sion.

⁹Cha'lenla c'am bʌ oñel añet bʌ la ti Jerusalén. Yom tijicña la' pusic'al cha'an tsa' mʌjli la' cha'an. Mach chʌn t'uchtʌbiletix come lac Yum tsa'ix i cha' p'unta i cha'año' bʌ. Tsa'ix i cha' mʌñʌ jini año' bʌ ti Jerusalén.

¹⁰Lac Yum tsa'ix i pʌsʌ ch'ujul bʌ i c'ʌb ti' wut pejtelel tejclum. Ti pejtelel pañimil mi' caj ti tsictiyel laj coltʌntel tilem bʌ ti lac Dios.

¹¹Loq'uenla ti Babilonia, c pi'ʌlob. Cʌyʌla pejtelel i mul jini año' bʌ ti pañimil. Mach yomic mi la' tʌl chuqui tac bibi'. Sʌq'uesan la' bʌ jatetla mu' bʌ la' cuch majlel i latu tac lac Yum.

¹²Come ma'anic mi caj la' loq'uel ti ajñel. Ma'anic mi caj la' puts'el loq'uel. Come ñaxan mi' majlel lac Yum ti la' tojlel. Mi' cʌntañetla majlel ti la' pat i Dios Israel.

¹³Q'uele c Winic. Uts'at bajche' mi caj i mel ti cabʌl i ña'tʌbal. Mi caj i wa'chocontel ti chan. Mi caj i yajñel ti ñuc.

¹⁴Tsa' toj sajtiyob i pusic'al cabʌlob che' bʌ tsi' q'ueleyob. Wen lojwen i wut c'ʌlʌl mach chʌn cʌñʌlix mi winic. Ñumen lojwen i bʌc'tal bajche' yaño' bʌ winicob.

¹⁵Che' jini mi caj i mulbeñob ti' ch'ich'el cabʌl winicob x'ixicob ti yan tac bʌ lum. Jini yumʌlob ñʌch'ʌlix mi caj i cʌytʌlob ti' tojlel jini winic. Come ma'anic tsa' subentiyob chucoch tsa' tic'lʌnti, pero che' mi' q'uelob mi caj i ch'ʌmbeñob isujm jini mach bʌ anic tsi' yubiyob.