Read Chol Isaias 57 Bible Online

Isaias 57 - Chol bible

Isaias 57

¹Jini toj bʌ winic mi' chʌmel. Ma'anic majch mi' c'o'otan. Jini xuc'ul bʌ winicob mi' chʌmelob che' maxto i yorajlelic. Jini cuxulob to bʌ ma'anic mi' wis ña'tañob pʌybil jini toj bʌ i cha'an Dios ba' mach i q'ueleyic jini wocol mu' bʌ caj i tilel ti' tojlelob.

²Mi' tajob i ñʌch'tʌlel i pusic'al jini tojo' bʌ mu' bʌ i chʌmelob. Mi' c'ajob i yo.

³Lʌc'tesan la' bʌ, i yalobilob xwujt yic'ot jini mu' bʌ i cha'leñob ts'i'lel.

⁴¿Majqui woli la' wajlen? ¿Chucoch leco mi la' mel la' wut tic tojlel? Mi la' cha'len pex'ej. ¿Mach ba i yalobileticla xmulilob yic'ot xlotob?

⁵Mi la' xic' la' bʌ ti mulil ti' yebal c'ololte' ya' ba' mi la' ch'ujutesan dioste' tac. Mi la' tsʌnsan alʌlob ya' ti' ti' pa' yic'ot ya' ba' lech'el xajlel, cha'an mi la' wʌc' majtañʌl.

⁶Ma' ch'ujutesan jini melbil tac bʌ xajlel an tac bʌ ti joctʌl. Ma' bec'ben vino. Ma' wʌq'uen trigo yic'ot waj cha'an i majtan. ¿Mu' ba caj j q'uelet ti uts'at che' jini?

⁷Ti chan bʌ wits tsa' cha'le ts'i'lel, ya' ba' ma' ch'ujutesan dioste' tac. Tsa' cʌyʌyon cha'an ma' wʌq'uen pulbil bʌ i majtan.

⁸Ti' xo'tʌlel a wotot yic'ot ti' ñʌc' oy tsa' mucu i yejtal a dios. Tsa' ñajʌtesayon. Tsa' tam'esa a wʌyib ti a ts'i'lel, come wolix a c'uxbin dioste' tac. Ma'anic woli a c'uxbiñon.

⁹Tsa' boño a bʌ ti perfume cha'an uts'at ma' q'uejlel. Tsa'ix a ch'ʌmbe majlel aceite yic'ot perfume jini dios i c'aba' Moloc. Tsa' choco majlel suboñelob ti ñajtʌl cha'an ma' ñopben i p'ʌtʌlel xiba. Tsa' bib'esa a bʌ cha'an ma' taj yan tac bʌ dios.

¹⁰Tsa' lujbayet cha'an cabʌl tsa' xoyo a bijlel. Ma'anic tsa' ña'ta mi sajtemet, mi lolom jach chuqui wola' mel. Tsa' cha' taja a wersa, come ma'anic chuqui anto yom a cha'an. Jini cha'an ma'anic tsa' cʌyʌ a jontolil.

¹¹¿Chucoch mach chʌn xuc'uletix quic'ot? ¿Majqui wola' bʌc'ñan? ¿Chucoch ma'anix ma' p'ison ti wenta? ¿Cha'an ba uts mic pʌs c bʌ ti a tojlel?

¹²Mi caj j cʌntesañet bajche' mi' caj ti ujtel mu' bʌ a mel, mu' bʌ a bajñel ña'tan ti a pusic'al. Ma'anic mi caj j coltañet ti' melol.

¹³Che' ma' c'ajtin a coltʌntel ti oñel, la' i coltañet a dioste'. Mi caj i laj wejlan majlel ic'. Ti junñumel jach ic' mi caj i sʌc jilelob. Pero jini xuc'ul bʌ quic'ot mi caj i yochel ti' yum jini lum. Mi caj i yajñel ti jini Ch'ujul bʌ c Wits ba' mi caj i yubiñob i tijicñʌyel i pusic'al cha'an pejtelel chuqui mi caj i yʌq'uentelob ti Dios.

¹⁴Mi caj i yubintel jini t'an: “Melela bij. Chajpanla wen toj bʌ bij. Loc'sanla pejtel woli bʌ i mʌctan cha'an mi' sujtelob c cha'año' bʌ tsa' bʌ cʌjchiyob majlel”.

¹⁵Jini cuxul bʌ ti pejtelel ora, Ch'ujul Bʌ i c'aba', woli i yʌl: Joñon chumulon ti chan ti Ch'ujul bʌ Cajñib, pero wʌ' chumulon ja'el yic'ot jini mu' bʌ i mel i bʌ ti pec', yic'ot jini am bʌ i wocol. Mic ñuq'uesʌben i pusic'al jini uts bʌ. Mi cʌq'uen i tijicñʌyel jini am bʌ ti c'oj'ol.

¹⁶Mach ti pejtelic ora mi caj c chʌn tiq'uet cha'an a mul. Mach chʌn mich'onix ti pejtelel ora. Mi' caj ti lajmel c mich'ajel. Machic mi' lajmel mi' laj jilelob winicob x'ixicob tsa' bʌ c mele.

¹⁷Cha'an i wo'lel ti chubʌ'añʌl tsa' jumuc' mich'ayon. Tic mich'ajel tsac lowoyob. Tsac mʌybeyob c wut. Tsi' xoyoyob i bijlel. Tsi' meleyob chuqui tac jach yomob.

¹⁸Tsaj q'uele pejtel i melbal. Pero wʌle mi caj c ts'ʌcañob ti' yutslel c pusic'al. Mi caj c toj'esañob majlel. Mi caj cʌq'uen i ñʌch'tʌlel i pusic'al jini ch'ijiyemo' bʌ mu' bʌ i melob i bʌ cha'an i mul.

¹⁹La' ñʌch'lec i pusic'al jini ñajt bʌ añob yic'ot jini lʌc'ʌl bʌ añob. Joñon mi caj c lajmesañob.

²⁰Pero jini mu' bʌ i contrajiñoñob lajalobʌch bajche' colem ñajb, mu' bʌ i wec'ulan i bʌ, mach bʌ ñʌch'ʌlic an. Mi' yʌc' ti tejchel i lumil yic'ot i bibi'al.

²¹Mach i tajayobic i ñʌch'tʌlel i pusic'al jini jontolo' bʌ, che'en Dios.