Read Chol Levitico 10 Bible Online

Levitico 10 - Chol bible

Levitico 10

¹Pero jini Nadab yic'ot Abiú, i yalobilob Aarón, leco bajche' tsi' meleyob. Tsi' bajñel tsuc'uyob c'ajc ti' yajñib pom. Tsi' yotsayob pom ya' ti pam c'ajc ti' tojlel lac Yum. Tsi' puluyob pom yic'ot c'ajc mach bʌ ch'ujulic. Leco tsi' q'uele lac Yum.

²Jini cha'an tsa' loq'ui tilel c'ajc ba'an lac Yum cha'an mi' jisañob. Che' jini tsa' chʌmiyob ti' tojlel lac Yum.

³Moisés tsi' sube Aarón: Jiñʌch tsa' bʌ i yʌlʌ lac Yum: “Jini mu' bʌ i lʌc'tesañoñob, wersa mi' q'ueloñob ti ch'ujul. Wersa mi cʌq'uentel c ñuclel ti' tojlelob winicob x'ixicob”, che'en lac Yum. Che' tsi' yʌlʌ Moisés. Che' jini ñʌch'ʌl tsa' cʌle Aarón.

⁴Moisés tsi' pʌyʌ tilel Misael yic'ot Elzafán (i yalobilob Uziel jini i yichan Aarón). Tsi' subeyob: Yom mi la' majlel la' loc'san jini ch'ujlelʌl am bʌ ti' tojel Tabernáculo. Ch'ʌmʌla majlel ya' ti' junwejlel jini tejclum, che'en.

⁵Che' jini tsa' majli i ch'ʌmob loq'uel jini ch'ujlelʌl. Yic'ot i pislel tsi' ch'ʌmʌyob loq'uel che' bajche' tsi' subeyob Moisés.

⁶Moisés tsi' sube Aarón yic'ot jini cha'tiquil i yalobilob, Eleazar yic'ot Itamar: Mach yomic mi la' cha'len uq'uel. Mach mi la' tsil la' pislel i yejtal bʌ la' ch'ijiyemlel, ame chʌmiquetla ja'el, ame mich'lenticob pejtelel israelob ti' tojlel Dios. La' i cha'leñob uq'uel yaño' bʌ israelob cha'an tsa' chʌmiyob Nadab yic'ot Abiú che' bʌ tsi' choco tilel lac Yum jini bʌbʌq'uen bʌ c'ajc.

⁷Mach yomic mi la' wis loq'uel ti jini Tabernáculo, ame chʌmiquetla, come wa'chocobiletla yic'ot ch'ujul bʌ aceite ti' tojlel lac Yum, che'en. Jini cha'an Aarón yic'ot i yalobilob tsi' jac'ʌyob che' bajche' tsi' yʌlʌ Moisés.

⁸Lac Yum tsi' sube Aarón: Mach yomic mi la' jap jini paj'esʌbil bʌ i ya'lel ts'usub che' mi la' wochel ti' mal jini Tabernáculo, jatet yic'ot a walobilob ame chʌmiquetla. Yom chʌn c'ajal la' cha'an jatetla yic'ot pejtelel la' p'olbal ti jujunlajm.

¹⁰An ti la' wenta cha'an mi la' tsictesʌbeñob winicob jini ch'ujul bʌ yic'ot jini mach bʌ ch'ujulic, jini sʌc bʌ yic'ot jini bibi' bʌ.

¹¹An ti la' wenta cha'an mi la' cʌntesan israelob pejtelel jini mandar che' bajche' tsa cʌq'ue Moisés. Che' tsi' yʌlʌ lac Yum.

¹²Moisés tsa' caji i suben Aarón yic'ot i yalobilob Eleazar yic'ot Itamar: Ch'ʌmʌla jini trigo bʌ majtañʌl tsa' bʌ colobaji che' bʌ tsa' la' wʌq'ue i majtan lac Yum ya' ti pulʌntib. Yom mi la' c'ux jini waj mach bʌ anic i levadurajlel ya' ti' t'ejl jini pulʌntib. Ch'ujulʌch jini majtañʌl.

¹³Jini cha'an yom mi la' c'ux ya' ti Ch'ujul bʌ Ajñibʌl, come jiñʌch tsa' bʌ aq'uentiyetla mi la' c'ux, jatetla yic'ot ch'iton bʌ la' walobilob. Loq'uemʌch ti pulbil tac bʌ i majtan lac Yum che' bajche' tsi' subeyon.

¹⁴Pero i bʌc'tal i tajn yic'ot i ya' jʌmts'ubil bʌ ti' tojlel lac Yum mi mejlel la' c'ux jatet, yic'ot ch'iton bʌ yic'ot xch'oc bʌ la' walobilob baqui jach la' wom ya' ba' sʌc pañimil. La' cha'añʌch cha'an i bʌl la' ñʌc'. Loq'uemʌch ti' majtan lac Yum mu' bʌ i yʌq'ueñob i tijicñʌyel i pusic'al winicob x'ixicob.

¹⁵Mi caj i ch'ʌmob tilel jini i ya' yic'ot i tajn tsa' bʌ aq'uenti lac Yum che' bʌ tsa' puli i lewil. Che' bʌ tsa'ix i jʌmts'uyob ti' tojlel lac Yum mi caj la' ch'ʌm yic'ot la' pi'ʌlob, come che'ʌch tsi' yʌc'ʌ mandar lac Yum, che'en Moisés.

¹⁶Moisés tsa' caji i c'ajtibeñob baqui tsi' yʌc'ʌyob jini i tat chivo tsa' bʌ i yʌq'ueyob Dios cha'an i tojol mulil. Pero awilan, tsa'ix puli. Jini cha'an Moisés tsi' mich'le Eleazar yic'ot Itamar, i yalobilob Aarón:

¹⁷¿Chucoch ma'anic tsa' la' c'uxu jini i bʌc'tal majtañʌl ila ti Ch'ujul bʌ Ajñibʌl? come wen ch'ujulʌch. Dios tsi' yʌq'ueyetla ili majtañʌl cha'an i tojol i mul israelob cha'an mi la' c'ux ti' tojlel lac Yum.

¹⁸Q'uelela wʌle jini i ch'ich'el ma'anic tsa' la' ch'ʌmʌ ochel ti Ch'ujul bʌ Ajñibʌl. Wersa mi' c'uxtʌl ya' ti Ch'ujul bʌ Ajñibʌl che' bajche' tsac subeyetla, che'en Moisés.

¹⁹Pero Aarón tsi' sube Moisés: Wʌle tsa'ix i yʌc'ʌyob jini majtañʌl cha'an i tojol i mulob yic'ot jini pulbil bʌ i majtan lac Yum. Pero leco jax chuqui tsa' ujti sajmʌl tic tojlel lojon. Mi tsa'ix j c'uxu jini we'elʌl, ¿uts'at ba mi' q'uel lac Yum? che'en Aarón.

²⁰Moisés tsi' wen ubibe i t'an. Tijicña tsa' cha' cʌle.