Read Chol Levitico 11 Bible Online

Levitico 11 - Chol bible

Levitico 11

¹Lac Yum tsi' cha' pejca Moisés yic'ot Aarón: Yom mi la' subeñob israelob: Mi mejlel la' c'ux ili alʌc'ʌl tac xac'al bʌ i yoc yujil bʌ cha' letsel i buc'bal ti' yej.

⁴Mach yomic mi la' c'ux yambʌ alʌc'ʌl. Jini camello mi' cha' letsel i buc'bal pero mach xac'alic i yoc. Jini t'ul mi' cha' letsel i buc'bal, pero mach xac'alic i yoc. Jini chʌchʌc t'ul mi' cha' letsel i buc'bal, pero mach xac'alic i yoc, jini chitam xac'al i yoc, pero ma'anic mi' cha' letsel i buc'bal.

⁸Pejtelel iliyi mach yomic mi la' wis c'uxe'. Mach yomic mi la' tʌl che' chʌmen, come tic'bil ti mandar.

⁹Pejtelel chʌy mi mejlel la' c'ux, jini an tac bʌ i welo' ja', yic'ot i sujl an tac bʌ ti' mal ja', yic'ot ti alʌ ja'. Mi mejlel la' c'ux.

¹⁰Pero tic'bil pejtelel yan tac bʌ i chʌnil ja'. Mach yomic mi la' wis c'uxe'. Mach yomic mi la' tʌl che' chʌmenix.

¹²Tic'bil pejtelel jini mach bʌ an taquic i welo' ja' yic'ot i sujl an tac bʌ ti mal ja'.

¹³Che' ja'el mach mejlic la' c'ux ili mut tac: jini xiye', jini quebranta huesos, jini xliclic, yic'ot pejtelel yambʌ xiye' che' bajche' xalal bʌ i ñej, x'ac'xi', yic'ot yan tac bʌ lajal bʌ ti q'uelol, jini avestruz, xcuj, xja'al pech, calamón, pelícano, xta'jol, cigüeña, yicot garza,

¹⁷yic'ot jini yan tac bʌ mut lajal bʌ ti q'uelol, jini jojmay, yic'ot ja'el jini suts'. Mach mejlic la' c'ux i chʌñil pañimil an tac bʌ chʌnts'ijt i yoc yujil tac bʌ wejlel.

²¹Mi mejlel la' c'ux: jini xc'ajba sajc' yic'ot jini yan tac bʌ lajal bʌ ti q'uelol, jini alʌ sajc' yic'ot yan tac bʌ lajal bʌ ti q'uelol. Jini jach yujil bʌ tijp'el mi mejlel la' c'ux.

²³Tic'bil pejtelel jini yan tac bʌ, an tac bʌ chʌnts'ijt i yoc, yic'ot yujil bʌ wejlel tac.

²⁴Majqui jach mi' tʌl jini chʌmen tac bʌ i chʌñil pañimil, bibi' c'ʌlʌl mi' yic'an pañimil.

²⁵Majqui jach mi' tʌl jini chʌmen bʌ, wersa mi caj i wuts' i pislel ti ora. Wersa mi' cʌytʌl ti' yotot c'ʌlʌl mi' bʌjlel q'uin.

²⁶Mi la' bib'an ja'el che' mi la' tʌl jini am bʌ i yejc'ach che' mach xac'alic i yoc yic'ot jini mach bʌ anic mi' cha' letsel i buc'bal.

²⁷Mach mejlic la' c'ux jini bʌte'el moch'ol tac bʌ mi' c'otel i yoc ti lum. Majqui jach mi' tʌl che' chʌmenix i bʌc'tal, bibi' mi' cʌytʌl c'ʌlʌl mi' bʌjlel q'uin.

²⁸Majqui jach mi' ch'uyben majlel i bʌc'tal, wersa mi caj i wuts' i pislel ti ora. Bibi' mi' cʌytʌl c'ʌlʌl mi' bʌjlel q'uin, come tic'bilʌch.

²⁹Tic'bil ja'el jini mu' bʌ i p'ojlel ti lum yic'ot jʌlʌcña bʌ mi' majlel: jini sajbin, yic'ot tsuc, yic'ot xtujts', yic'ot yambʌ lajal bʌ ti q'uelol, ch'ix uch, juxlum, jini xmanchajc, jini yʌx p'oc, jini o'chan.

³¹Majqui jach mi' tʌl chʌmen bʌ i bʌc'tal, bibi' mi' cʌytʌl c'ʌlʌl mi' bʌjlel q'uin.

³²Che' ja'el ya' ba' mi' chʌmel jini bʌte'el, bibi' mi' cʌytʌl c'ʌlʌl mi' bʌjlel q'uin, mi te', mi bujcʌl mi coxtal, mi pʌchi. Wersa yom mi' yotsʌntel ti' mal jini ja'. Wi'il cha' anix i c'ʌjñibal.

³³Che' ja'el mi tsa' yajli ochel ti mal poc', mi' bib'an pejtelel am bʌ ti' mal poc'. Pero jini poc' wersa yom mi la' top'.

³⁴Che' mi la' poc jini tsa' bʌ bib'esʌnti, mi tsa' ts'ita' chʌjq'ui jubel i ya'lel ya' ti' bʌl la' ñʌc', mi' bib'esan ti pejtelel. Jini japbil tac bʌ am bʌ ti colem latu bibi' mi' cʌytʌl ja'el.

³⁵Che' an horno ba' mi' xijq'uel c'ajc, mi i tajol tsa' yajli jubel i bʌc'tal tic'bil bʌ bʌte'el che' chʌmenix, bibi' mi' cʌytʌl. Wersa yom mi' jejmel.

³⁶Mi tsa' yajli ochel ti cuxul bʌ ja' i bʌc'tal jini tic'bil bʌ bʌte'el che' chʌmenix, sʌc jini ja'. Cojach mi' bib'an jini mu' bʌ i loc'san.

³⁷Che' mi' yajlel jini chʌmen bʌ bʌte'el ya' baqui an lac pac' mu' bʌ caj lac pʌc', sʌc mi' cʌytʌl jini pac'.

³⁸Pero che' ach' jini pac' ba' mi' yajlel jini chʌmen bʌ, bibi'ʌch mi' cʌytʌl jini pac'.

³⁹Che' an juncojt bʌte'el mu' bʌ mejlel la' c'ux, mi tsa' chʌmi cha'an i c'amʌjel, majqui jach mi' tʌlben i bʌc'tal, bibi' mi' cʌytʌl c'ʌlʌl mi' bʌjlel q'uin.

⁴⁰Majqui jach mi' c'ux jini chʌmen bʌ alʌc'ʌl yic'ot majqui jach mi' ch'ʌmben majlel i bʌc'tal, la' i wuts' i pislel. Bibi' mi' cʌytʌl c'ʌlʌl mi' bʌjlel q'uin.

⁴¹Pejtelel jini jexecña bʌ mi' cha'len xʌmbal ti lum laj bibi'. Mach yomic mi la' c'ux. Jini lucum tac yic'ot an tac bʌ i yoc che' bajche' juxlum, yic'ot jini jexecña bʌ mi' cha'len xʌmbal, mach yomic mi la' c'ux, come bibi'. Mach yomic mi la' tʌl ame la' bibe'san la' bʌ.

⁴⁴Come joñon la' Yumon, la' Dioson. Jini cha'an cʌntan la' bʌ cha'an mi la' wajñel ti ch'ujul, come ch'ujulon. Yom tsajiletla cha'an ma'anic mi la' pʌc' la' bʌ ti' chʌñil tac pañimil jexecña bʌ yic'ot tip'tip'ña bʌ mi' majlel tac ti lum.

⁴⁵Come Yumʌlon. Tsac pʌyʌyetla loq'uel ti Egipto cha'an mi la' Diosiñon. Jini cha'an yom ch'ujuletla, come joñon ch'ujulon. Che' tsi' yʌlʌ lac Yum.

⁴⁶Jiñʌch la' tic'ol ti' tojlel bʌte'el tac, mut tac, yic'ot yan tac bʌ mu' bʌ i nijcan i bʌ ti' mal ja', yic'ot ja'el jini jexecña bʌ mi' cha'len xʌmbal ti lum

⁴⁷cha'an mi la' cʌn chuqui tac sʌc mu' bʌ mejlel la' c'ux, yic'ot chuqui tac bibi' mach bʌ mejlic la' c'ux.