Read Chol Levitico 12 Bible Online

Levitico 12 - Chol bible

Levitico 12

¹Lac Yum tsi' sube Moisés: Suben pejtelel jini israelob: Jini x'ixic che' mi' yʌc' ti pañimil ch'iton, wucp'ejl q'uin bibi' mi caj i q'uejlel che' bajche' ba' ora mi' q'uel i c'amʌjel.

³Che' ti' waxʌcp'ejlel q'uin yom mi' tsepbentel i pʌchʌlel jini ch'iton.

⁴Pero jini x'ixic uxlujump'ejl to i cha'c'al (33) q'uin yom mi' q'uejlel ti bibi'. Ti wi'il mi' cha' q'uejlel ti sʌc. Mach yomic mi' tʌl chuqui tac ch'ujul, mach yomic mi' majlel ti Tabernáculo, jinto che' ts'ʌctiyemix cha'c'al q'uin cha'an mi' wen sʌq'uesan i bʌ.

⁵Mi xch'oc i yalobil mu' bʌ i yʌc' ti pañimil, cha'p'ejl semana mi caj i q'uejlel ti bibi' che' bajche' mi' q'uel i c'amʌjel ti uw ti uw. Yom yambʌ wʌcp'ejl i chʌnc'al (66) q'uin ti pejtelel cha'an mi' sʌq'uesan i bʌ.

⁶Che' ñumeñix i yorajlel cha'an mi' sʌq'uesan i bʌ cha'an i yalobil, mi ch'iton mi xch'oc, la' i pʌy tilel juncojt alʌ tat tiñʌme' am bʌ jump'ejl i jabilel cha'an pulbil bʌ c majtan, yic'ot juncojt x'ujcuts mi xpuruwoc, cha'an i ñusʌntel mulil. La' i yʌq'uen jini motomaj ya' ti' ti' jini Tabernáculo.

⁷Jini motomaj mi caj i yʌq'ueñon c majtan cha'an i mul jini x'ixic. Che' jini mi' taj i sʌq'uesʌntel cha'an i c'amʌjel. Che'ʌch yom mi la' mel che' an majqui mi' yʌc' ti pañimil i yalobil.

⁸Mi ma'anic i cha'an juncojt tiñʌme', la' i pʌy tilel cha'cojt x'ujcuts mi cha'cojt xpuruwoc. Jini juncojt mi caj i yʌc' cha'an pulbil bʌ c majtan. Jini yambʌ mi' yʌc' cha'an i mul. Jini motomaj mi caj i yʌq'ueñon ili majtañʌl tac cha'an i ñusʌntel i mul. Che' jini mi' cha' sʌq'uesʌntel, che'en lac Yum.