Read Chol Levitico 16 Bible Online

Levitico 16 - Chol bible

Levitico 16

¹Che' bʌ tsa' ujti ti chʌmel jini cha'tiquil i yalobilob Aarón, che' bʌ tsi' tsuc'uyob jini tic'bil bʌ c'ajc ti' tojlel lac Yum, lac Yum tsi' sube Moisés: Suben a wʌscun Aarón mach yomic mi' yochel ya' ti Ch'ujul bʌ Ajñibʌl baqui jach bʌ ora ame chʌmic. Jini Ch'ujul bʌ Ajñibʌl jiñʌch am bʌ ti' junwejlel jini tsalʌl bʌ pisil, ya' ti' tojel jini Arca* ba' mi' ñusʌntel mulil. Come joñon mic pʌs c bʌ ti tocal ya' ti' pam ba' mi' ñusʌntel mulil.

³Che' mi' yochel Aarón, yom mi' pʌy tilel juncojt alʌ tat wacax cha'an i ñusʌntel mulil, yic'ot juncojt i tat tiñʌme' cha'an mic pulbentel.

⁴Yom mi' cha'len ts'ʌmel. Yom mi' lʌp jini ch'ujul bʌ i bujc yic'ot i wex, yic'ot i cajchiñʌc' melbil bʌ ti lino bʌ pisil ti' pejtelel. Yom mi' cʌch ti' jol jini lino bʌ pisil.

⁵Jini israelob la' i ch'ʌmbeñob tilel cha'cojt i tat chivo cha'an i ñusʌntel mulil, yic'ot juncojt i tat tiñʌme' cha'an mic pulbentel.

⁶Ñaxan Aarón mi caj i yʌq'ueñon jini alʌ tat wacax cha'an bʌ mic ñusʌben i mul yic'ot i mul jini año' bʌ ti' yotot.

⁷Ti wi'il yom mi' pʌy tilel jini cha'cojt tat chivo tic tojlel ya' ti' ti' jini Tabernáculo.

⁸Jini Aarón la' i cha'len yajcaya ti alas cha'an mi' tsictiyel baqui bʌ jini cha'cojt chivo mi cʌq'uentel yic'ot baqui bʌ yom mi' colel.

⁹Mi caj i pʌy tilel jini chivo mu' bʌ i yajlel tic wenta cha'an mi' tsʌnsan cha'an mulil.

¹⁰Pero jini yambʌ chivo mach yomic mi' tsʌnsʌntel, yom cuxul tic tojlel. Aarón mi caj i yʌc' i c'ʌb ti' pam i jol jini chivo cha'an mi' cuch majlel jini mulil. Mi caj i col majlel jini cuxul bʌ chivo cha'an mi' ch'ʌm majlel jini mulil yilal ya' ti colem bʌ i tiquiñal pañimil.

¹¹Aarón mi caj i yʌc' ti tsʌnsʌntel jini alʌ tat wacax cha'an i bajñel mul yic'ot i mul jini año' bʌ ti' yotot. Mi caj i yʌc' cha'an i q'uexol i mul.

¹²Yom mi' ch'ʌm tilel i yajñib pom yic'ot i nich c'ajc tsa' bʌ i loc'sa ti pulʌntib ya' tic tojlel, yic'ot cha'mujch' xojocña bʌ ts'ac wen juch'bil bʌ cha'an mi' ch'ʌm majlel ya' ti' junwejlel tsalʌl bʌ pisil.

¹³Yom mi' yotsan jini xojocña bʌ perfume ti c'ajc tic tojel. Awilan i buts'il jini perfume mi caj i mose' jini ajñibʌl ti' pam Arca ba' mic ñusan mulil. Che' jini ma'anic mi caj i chʌmel.

¹⁴Mi caj i ch'ʌm tilel lamital i ch'ich'el alʌ wacax cha'an mi' tsijcan ti' c'ʌb jini ajñibʌl ba' mi ñusʌntel mulil. Yom mi' tsijcan ti' tojel i pasibal q'uin. Wucyajl yom mi' tsijcan jini i ch'ich'el ya' ti' tojel jini ajñibʌl.

¹⁵Ti wi'il mi caj i tsʌnsan jini chivo cha'an i mulob pejtelel winicob. Jini i ch'ich'el yom mi' ch'ʌm majlel ya' ti junwejlel tsalʌl bʌ pisil, cha'an mi' tsijcan ya' ti' pam yic'ot ti' tojel jini ajñibʌl ba' mi' ñusʌntel mulil che' bajche' tsi' mele yic'ot i ch'ich'el wacax.

¹⁶Che' bajche' jini mi caj i yʌq'ueñon c majtan cha'an sʌc mij q'uel jini Ch'ujul bʌ Ajñibʌl, come tsa' bib'esʌnti cha'an i mulob israelob. Che'ʌch yom mi' sʌq'uesan ja'el jini Tabernáculo joyol bʌ ti winicob año' bʌ cabʌl i mul.

¹⁷Mach yomic mi yochel mi juntiquilic winic ya' ti' mal jini Tabernáculo che' mi' yochel Aarón ti Ch'ujul bʌ Ajñibʌl cha'an mi yʌc' ti ñusʌntel i mul winicob. Che' laj ujtemix i c'ajtin i ñusʌntel i bajñel mul yic'ot i mul i pi'ʌlob, yic'ot i mul pejtelel israelob

¹⁸yom mi' loq'uel majlel ya' ba'an jini pulʌntib tic tojel, cha'an mi' pulbeñon c majtan cha'an sʌc mij q'uel jini pulʌntib. Yom mi' ch'ʌm tilel i ch'ich'el jini alʌ tat wacax yic'ot i ch'ich'el jini chivo. Yom mi' bomben i xulub tac jini pulʌntib.

¹⁹Wucyajl yom mi' tsijcan jini ch'ich' ya' ti pulʌntib yic'ot i yal i c'ʌb. Che' jini cha' sʌquix mi caj j q'uel come tsa' bib'esʌnti cha'an i mul pejtelel israelob.

²⁰Che' laj ujtemix i sʌq'uesʌntel jini Ch'ujul bʌ Ajñibʌl yic'ot jini Tabernáculo, yic'ot jini pulʌntib, la' i pʌy tilel jini chivo che' cuxul to.

²¹Aarón mi caj i c'ʌcchocon ti' cha'ts'ijtlel i c'ʌb ti' jol jini chivo, cha'an mi' tsictesan pejtelel i mul israelob. Yom mi' choc majlel jini i tat chivo ti' wenta juntiquil winic wa'chocobil bʌ cha'an mi' pʌy majlel ya' ti colem bʌ i tiquiñal pañimil.

²²Jini i tat chivo mi' ch'ʌmbeñob majlel i mul pejtelel winicob ya' ti lum, ya' ba' ma'anic xchumtʌl. Jini winic mi' caj i col jini chivo ya' ti' tiquiñal pañimil.

²³Ti wi'il yom mi' cha' ochel Aarón ti Tabernáculo cha'an mi' joch i pislel tsa' bʌ i lʌpʌ cha'an mi yochel ti Ch'ujul bʌ Ajñibʌl. Ya' jach yom mi' cʌye'.

²⁴La' i cha'len ts'ʌmel ya' ba'an sʌq'uesʌbil bʌ ja'. La' i cha' lʌp i pislel cha'an mi' loq'uel i yʌq'ueñon pulbil bʌ c majtan cha'an i bajñel mul yic'ot i mul jini winicob x'ixicob. Mi caj i ñusʌntel i bajñel mul yic'ot i mul jini israelob.

²⁵Yom mi' laj pulel ya' ti pulʌntib i lewil chivo cha'an i tojol mulil.

²⁶Jini winic tsajni bʌ i cʌy jini tat chivo ya' ti colem bʌ i tiquiñal pañimil la' i wuts' i pislel. La' i cha'len ts'ʌmel. Ti wi'il yom mi' cha' ochel ti tejclum.

²⁷Yom mi' ch'ʌm majlel ti junwejl i ti' tejclum jini chivo yic'ot jini wacax tsa' bʌ tsʌnsʌnti cha'an mulil (tsa' bʌ c'ʌjni i ch'ich'el tac ya' ti Ch'ujul bʌ Ajñibʌl cha'an mi' yʌpbeñob i mul winicob). Yom mi' laj pulel ti c'ajc temel yic'ot i pʌchʌlel, i bʌc'tal, yic'ot i soyta'.

²⁸Jini mu' bʌ majlel i pule' la' i wuts' i pislel. La' i cha'len ts'ʌmel. Ti wi'il mi caj i cha' ochel ti' mal jini tejclum.

²⁹Che'ʌch yom mi la' mel ti jujump'ejl jab che' ti 25 de septiembre. Yom chʌn c'ajal la' cha'an ti pejtelel ora. Yom mi' la' tsajin la' bʌ. Yom mi' la' peq'uesan la' bʌ. Mach yomic mi la' cha'len e'tel jatetla, mi jinic woli bʌ ti jula' ti la' lumal. Come ti ili q'uin cha' añʌch i ña'tʌntel la' mul cha'an mi la' wʌc' ti yajpel che' mi la' sʌq'uesʌntel ti pejtelel la' mul tic tojlel.

³¹I yorajlelʌch c'aj o ti la' tojlel. Yom mi' la' peq'uesan la' bʌ. Che'ʌch yom ti pejtelel ora.

³²An ti' wenta jini ñuc bʌ motomaj wa'chocobil bʌ ti' q'uexol Aarón cha'an mi' mel ili e'tel. La' i q'uextan i pislel. La' i lʌp jini sʌsʌc bʌ lino pisil jini ch'ujul bʌ.

³³An ti' wenta jini motomaj cha'an mi' yʌq'ueñon c majtan cha'an i sʌq'uesʌntel jini Ch'ujul bʌ Ajñibʌl, yic'ot jini Tabernáculo, yic'ot jini pulʌntib, yic'ot jini motomajob, yic'ot pejtelel israelob.

³⁴Pejtelel iliyi yom chʌn c'ajal la' cha'an ti pejtelel ora cha'an junyajl jach ti jujump'ejl jab mi' yʌpbentelob i mul israelob. Che' tsi' yʌlʌ lac Yum. Jini cha'an che'ʌch tsi' mele' Moisés che' bajche' tsi' sube lac Yum.