Read Chol Levitico 19 Bible Online

Levitico 19 - Chol bible

Levitico 19

¹Lac Yum tsi' cha' sube Moisés: Subeñob pejtelel israelob: Ch'ujul yom mi la' wajñel, come joñon ch'ujulon. Q'uelela ti ñuc la' tat la' ña'.

³Yom c'ajal la' cha'an i q'uiñilel c'aj o. Mach yomic mi la' cʌyon cha'an mi la' ch'ujutesan jini dioste' tac. Mach yomic mi' la' mel dios tac. Come joñoñʌch la' Yumon, la' Dioson.

⁵Che' mi la' wʌq'ueñon c majtan cha'an i tijicñʌyel la' pusic'al, ac'ʌla che' bajche' yom cha'an mic ch'ʌme' tic wenta.

⁶Ti jini jach bʌ q'uin yom mi la' c'ux, mi ti yijc'ʌlal. Pero mi anto i colobal che' ti yuxp'ejlel q'uin yom mi' pulel ti c'ajc.

⁷Mi tsa' to c'uxle jini i colobal che' ti yuxp'ejlel q'uin, mach uts'atic mij q'uel. Che jini ma'anic i c'ʌjñibal jini majtañʌl.

⁸Majqui jach mi' c'uxe' ti yuxp'ejlel q'uin mi' taj i mul, come ma'anic mi' p'is ti wenta jini ch'ujul bʌ j c'aba'. Awilan jini winic wersa mi caj i chojquel loq'uel ti' tojlel i pi'ʌlob.

⁹Che' mi la' tuc'ben i wut la' pʌc'ʌb, mach yomic c'ʌlʌl ti' ti' te'el mi la' lu' c'aj. Mach yomic mi la' chʌn lot jini tsa' bʌ yajli ti lum.

¹⁰Mach yomic mi la' laj tuc'ben i wut la' ts'usubil. Mach la' chʌn lot jini mu' bʌ i yajlel ti lum, come i cha'anix jini pump'uño' bʌ yic'ot jini ñajt bʌ ch'oyolob. Ña'tanla iliyi come la' Yumon la' Dioson.

¹¹Mach la' cha'len xujch'. Mach yomic mi la' lotin la' pi'ʌlob.

¹²Mach la' lon wa'chocon la' t'an cha'an jini mach bʌ isujmic, ame che'ic mi la' juch' tec'beñon j c'aba', come la' Yumon, la' Dioson.

¹³Mach mi la' p'ump'un tic'lan la' pi'ʌlob. Mach mi la' xujch'iben chuqui an i cha'an. Mach yomic mi' cʌytʌl ti bet i tojol i ye'tel.

¹⁴Mach mi la' p'aj jini xcojc. Mach mi la' mʌcben i bijlel xpots' cha'an mi la' wʌsin. Yom jach mi la' bʌc'ñañon, come joñoñʌch la' Yumon.

¹⁵Mach yomic jelel mi la' cha'len meloñel cha'an mi la' tic'lan jini p'ump'un bʌ, cha'an mi la' coltan jini wen chumul bʌ. Toj yom mi la' mel la' pi'ʌlob.

¹⁶Mach yomic mi la' joy ñumel ti u'yaj. Mach mi la' jop'ben i mul la' pi'ʌlob. Ña'tanla la' Yumon.

¹⁷Mach yomic mi la' wulilan la' pi'ʌl ti la' pusic'al. Yom mi la' tic' jini mu' bʌ i cha'len mulil, ame mi la' taj la' mul la' wic'ot.

¹⁸Mach mi la' q'uextan jontolil. Mach mi la' mich'len la' pi'ʌlob. C'uxbinla, come la' Yumon.

¹⁹Yom chʌn c'ajal la' cha'an ili mandar tac. Mach la' wʌc' ti chujquel la' wacax yic'ot yambʌ alʌc'ʌl. Mach yomic mi la' xaj bʌ pʌc' la' pʌc'ʌb ya' ti la' lum. Mach yomic xʌbʌl tsuts yic'ot lino ti la' pislel.

²⁰Mi an winic mu' bʌ i pi'len c'ajtibil bʌ xch'oc che' an ti' yum, la' i melob i bʌ tic tojlel, pero mach mi la' tsʌnsañob, come jini xch'oc an ti' yum.

²¹Jini winic la' i ch'ʌmbeñon tilel c majtan cha'an i mul, juncojt i tat tiñʌme' mu' bʌ caj i yʌc' ya' ti' ti' jini Tabernáculo.

²²Jini motomaj mi caj i yʌq'ueñon jini tsʌnsʌbil bʌ tat tiñʌme' cha'an mi' ñusʌbentel i mul jini winic. Jini majtañʌl cha'añʌch i q'uexol i mul. Muq'uix i taj i ñusʌntel i mul.

²³Che' mi la' wochel ti la' lum, che' mi' cajel ti wut la' pʌc'ʌb, maxto yomic mi la' c'uxben i wut uxp'ejl jab come leco tic wut.

²⁴Che' ti' chʌmp'ejlelix jab che' woli ti wut, yom mi la' wʌq'ueñon cha'an mi la' ch'ujutesʌbeñon j c'aba'. La' Yumon.

²⁵Che' ti' jo'p'ejlel jab mi mejlel la' c'uxben i wut jini te', come joñoñʌch la' Yumon la' Dioson.

²⁶Mach mi la' c'ux jini we'elʌl yic'ot i ch'ich'el. Mach mi la' lon ñop winic mu' bʌ i sub chuqui mi caj ti ujtel tac. Mach mi la' wotsan la' bʌ ti xwujt.

²⁷Mach yomic mi la' joy ac' ti jujchintel i tsutsel la' jol. Mach yomic mi la' tsep i ñi' jini la' tsucti'.

²⁸Mach mi la' low la' bʌc'tal cha'an i ch'ijiyemlel la' pusic'al che' an majqui mi' chʌmel. Mach mi la' wotsan i marcajlel tac chuqui tac an ti pañimil ya' ti la' bʌc'tal, come la' Yumon.

²⁹Mach la' wʌc' xch'oc bʌ la' walobil cha'an mi' mel i ts'i'lel ame p'ojlic mulil ti la' lumal.

³⁰Yom c'ajal la' cha'an i q'uiñilel c'aj o. Yom mi la' p'is ti wenta jini ch'ujul bʌ cotot, come la' Yumon.

³¹Mach majliquetla ba'an jini payxo x'alt'añob cha'an mi la' c'ajtiben i sujmlel chuqui tac mi' yujtel, come joñoñʌch la' Yumon la' Dioson.

³²Yom mi la' wʌq'uen cortesía jini sʌquix bʌ i jol. Yom mi la' q'uel ti ñuc. Bʌc'ñañonla, la' Yumon la' Dioson.

³³Che' chumul ti la' tojlel jini ñajt bʌ ch'oyol, mach mi la' tic'lan.

³⁴Yom lajal mi la' q'uel jini ñajt bʌ tilem che' bajche' mero la' pi'ʌl. Yom c'ux mi la' wubin che' bajche' mi la' bajñel c'uxbin la' bʌ, come ti yambʌ ora ya' añetla ti Egipto ba' mach mero la' lumalic. Joñoñʌch la' Yumon la' Dioson.

³⁵Mach yomic jelel mi la' cha'len chuqui jach mi la' mel ti pañimil, che' mi la' p'is jini lum, che' mi la' p'is la' choñoñel. Yom ts'ʌcʌl chuqui mi la' p'is. Joñoñʌch la' Yumon la' Dioson tsa' bʌ c loc'sayetla ti Egipto.

³⁷Yom mi la' jac' pejtelel c t'an yic'ot pejtelel c mandar ti pejtelel ora, come la' Yumon.