Read Chol Levitico 23 Bible Online

Levitico 23 - Chol bible

Levitico 23

¹Lac Yum tsi' cha' pejca Moisés: Yom ma' suben pejtelel israelob: “Che' mi la' cha'len ñuc bʌ q'uiñijel ti' tojlel lac Yum, yom ch'ujul mi la' q'uel jini q'uin tac che' mi la' tempan la' bʌ che' bajche' yom lac Yum.

³Wʌcp'ejl jach q'uin yom mi la' cha'len e'tel. Che' ti' wucp'ejlel q'uin yom mi la' c'aj la' wo, come jiñʌch ch'ujul bʌ q'uin. Mach yomic mi la' mel mi junchajpic la' we'tel, come i q'uiñilelʌch c'aj o ti' tojlel baqui jach chumuletla”.

⁴Mi caj la' mel jini ñuc bʌ q'uiñijel tic tojlel. Jiñʌch ch'ujul bʌ q'uin, mu' bʌ caj la' mel che' ti yorajlel tac.

⁵Mi' cajel ili q'uiñijel che' ti' jilibal marzo.

⁶Jiñʌch jini q'uin Pascua. Che' ti yijc'ʌlal mi' tejchel i q'uiñilel jini waj mach bʌ anic i levadurajlel. Wucp'ejl q'uin yom mi la' c'ux jini waj.

⁷Yom ch'ujul mi' la' q'uel jini ñaxan bʌ q'uin. Mach yomic mi' la' wʌc' ti e'tel jini x'e'telob la' cha'an.

⁸Che' ja'el wucp'ejl q'uin yom mi la' pulbeñon c majtan. C'ax ch'ujul yom mi la' cha'len che' ti wucp'ejlel q'uin. Mach yomic mi la' cha'len e'tel.

⁹Che' mi la' wochel ya' baqui mi caj cʌq'ueñetla la' lum, che' mi cajel la' tuc'ben i wut pʌc'ʌbʌl, yom mi la' ch'ʌmben tilel jini motomaj jini ñaxan bʌ i wut la' pʌc'ʌb. Yom mi la' ch'ʌmben tilel che' ti yijc'ʌlal i yorajlel c'aj o. Muq'uix la' jʌmts'un tic tojlel cha'an uts'at mij q'uel.

¹²Ti jini jach bʌ q'uin yom mi la' wʌq'ueñon pulbil bʌ c majtan, juncojt alʌ tat tiñʌme' am bʌ jump'ejl i jabilel mach bʌ wis anic i c'amʌjel mi i lojwemal.

¹³Yom mi la' wʌq'ueñon yic'ot i ñujp cha'p'is harina xajc'ubil bʌ yic'ot aceite. Jiñʌch jini majtañʌl mu' bʌ c pulbentel, wen xojocña bʌ i yujts'il. Yom ja'el jini japbil bʌ majtañʌl, uxp'ejl litro vino.

¹⁴Jinto mi yujtel la' wʌq'ueñon, mach yomic mi la' wis c'ux waj, mi tiq'uesʌbil bʌ trigo, mi jini c'ʌnix bʌ i wut trigo. Che'ʌch mi caj la' mel jatetla yic'ot la' walobilob ti pejtelel ora.

¹⁵Che' ñumeñix lujump'ejl i yuxc'al q'uin (50), yom mi la' ch'ʌmbeñon tilel c majtan. Yom mi la' wʌq'ueñon tsiji' bʌ i wut jam.

¹⁷Ch'ʌmbeñon tilel cha'q'uel waj tilem bʌ ti la' wotot. Yom mi la' jʌmts'un tic tojlel. Yom mi la' mel yic'ot ojlil lata harina yic'ot levadura chajpʌbil bʌ yic'ot jini ñaxan bʌ i wut jam.

¹⁸Yom mi la' wʌc' jini waj yic'ot wuccojt alʌ tat tiñʌme' am bʌ jump'ejl i jabilel, mach bʌ anic i c'amʌjel, yic'ot juncojt alʌ tat wacax, yic'ot cha'cojt tat tiñʌme', cha'an pulbil bʌ c majtan. Yom ja'el c majtan melbil bʌ ti harina, yic'ot japbil bʌ c majtan. Jiñʌch xojocña bʌ c majtan.

¹⁹Yom ma' tsʌnsʌbeñon juncojt i tat chivo cha'an i tojol la' mul yic'ot cha'cojt tat tiñʌme' am bʌ jujump'ejl i jabilel cha'an i tijicñʌyel la' pusic'al.

²⁰An ti' wenta jini motomajob cha'an mi' jʌmts'uñob ili majtañʌl tac tic tojlel come jiñʌch jʌmts'ubil bʌ c majtan. La' i yʌc'ob ili alʌc'ʌl tac yic'ot waj melbil bʌ ti ñaxan bʌ i wut pʌc'ʌbʌl. Jiñʌch ch'ujul bʌ c majtan tac. Mi caj i yʌq'uentelob motomajob cha'an i bʌlob i ñʌc'.

²¹Pʌyʌla tilel winicob cha'an mi' tempañob i bʌ tic tojlel come ch'ujulʌch jini q'uin. Mach yomic mi la' cha'len e'tel ti ili q'uin. Yom chʌn c'ajal la' cha'an ili q'uin ti pejtelel ora, jatetla yic'ot la' p'olbalob.

²²Che' mi la' cha'len c'ajbal ti' la' chol, mach yomic c'ʌlʌl ti' ti'il mi la' c'aj. Mach yomic mi la' laj tuc' jini la' trigo ti' pejtelel. Yom mi la' cʌybeñob jini p'ump'uño' bʌ yic'ot jini ñajt bʌ ch'oyolob. Come joñoñʌch la' Yumon la' Dioson.

²³Pejtelel winicob x'ixicob yom mi' tempañob i bʌ che' ti ojlil septiembre cha'an mi' ch'ujutesañoñob. Jiñʌch i yorajlel cha'an mi la' ña'tañon. Mi' tsictiyel i yorajlel che' mi' wustʌl jini trompeta.

²⁵Mach yomic mi la' cha'len e'tel. Yom mi la' pulbeñon c majtan.

²⁶Che' ñumeñix bolomp'ejl q'uin, yom mi' tempañob i bʌ tic tojlel pejtelel winicob x'ixicob. Ti jujuntiquiletla yom mi la' peq'uesan la' bʌ cha'an la' mul. Ch'ʌmbeñonla tilel c majtan cha'an mi la' pulbeñon.

²⁸Mi junchajpic e'tel yom mi' la' mel ti ili q'uin, come jiñʌch i q'uiñilel che' mi cʌq'uentel i tojol la' mul. Joñon la' Yumon la' Dioson.

²⁹Mi an jujuntiquil winic x'ixic mach bʌ anic mi' peq'uesan i bʌ ti ili q'uin, la' chojquic loq'uel ti' tojlel i pi'ʌlob.

³⁰Che' an juntiquil winic mu' bʌ i cha'len e'tel ti ili q'uin, mi caj cʌc' ti tsʌnsʌntel. Chʌcʌ ña'tanla jini q'uin jatetla yic'ot la' p'olbalob.

³²Come jiñʌch ch'ujul bʌ q'uiñijel cha'an mi la' c'aj la' wo, cha'an mi la' c'ajtesan la' mul. Yom mi la' tech la' ña'tan che' ti' bolomp'ejlel q'uin ti ic'ajel c'ʌlʌl mi' cha' ic'an che' ti yijc'ʌlal.

³³Che' ñumeñix jo'p'el q'uin, che' ti' jilibal septiembre, mi caj la' mel q'uin cha'an Tabernáculo. Wucp'ejl q'uin yom mi la' mel q'uin tic tojlel.

³⁵Che' ti ñaxan bʌ q'uin yom mi' tsictesʌntel jini ch'ujul bʌ cʌntesa. Mach yomic mi la' cha'len e'tel.

³⁶Wucp'ejl q'uin yom mi la' pulbeñon c majtan. Che' ti' waxʌcp'ejlel q'uin mi caj la' nich'tan jini ch'ujul bʌ cʌntesa, mi caj la' wʌq'ueñon jini pulbil bʌ c majtan. Jiñʌch i yujtibal jini tijicña bʌ q'uiñijel. Mach yomic mi la' cha'len e'tel.

³⁷Jiñʌch q'uiñijel mu' bʌ caj la' mel tic tojlel. Ch'ujul yom mi la' q'uel che' mi la' tempan la' bʌ. Yom mi la' wʌq'ueñon tsʌnsʌbil bʌ c majtan tac, yic'ot la' wofrenda tac ti chajp ti chajp.

³⁸Ti jujump'el jab yom mi la' mel ili q'uin tac. Che' ja'el yom jini ch'ujul bʌ c'aj o ti jujump'el semana. Parte mi caj la' wʌq'ueñon c majtan tac che' ti' yorajlel j q'uiñilel tac. Parte jini yan tac bʌ c majtan mu' bʌ la' wʌq'ueñon ti pejtelel ora.

³⁹Che' ti jilibal septiembre che' mi' yujtel c'ajbal, yom mi la' mel q'uin tic tojlel. Jini ñaxan bʌ q'uin jiñʌch i q'uiñilel c'aj o yic'ot jini waxʌcp'ejlel q'uin.

⁴⁰Che' ti ñaxan bʌ q'uin yom mi la' ch'ʌm tilel jini wen uts'at bʌ i wut la' pʌc'ʌb ti chajp ti chajp yic'ot ja'el i yopol ch'ib, yic'ot wen c'oc tac bʌ i yopol te', yic'ot jini mu' bʌ i colel tac ya' ti' ti' tac ja'. Wucp'ejl q'uin yom mi la' wubin la' tijicñʌyel tic tojlel.

⁴¹Wucp'ejl q'uin yom mi la' cha'len q'uiñijel ti jujump'ejl jab. Jiñʌch yom bʌ mi la' chʌn ña'tan, jatetla yic'ot la' p'olbal. Mi caj la' mel jini q'uin ti septiembre.

⁴²Wucp'ejl q'uin yom mi la' wajñel ya' ti lejchempat* bʌ otot. Pejtelel israelob mi caj i yajñelob ya' ti lejchempat tac,

⁴³cha'an mi' chʌn ña'tañob la' p'olbal, tsa' chumleyetla ti lejchempat che' bʌ tsac loc'sayetla ya' ti' Egipto. La' Yumon la' Dioson. Che' tsi' yʌlʌ lac Yum.

⁴⁴Moisés tsi' cha' subeyob israelob pejtel ili mandar cha'an jini ch'ujul bʌ i q'uiñilel tac lac Yum.