Read Chol Levitico 27 Bible Online

Levitico 27 - Chol bible

Levitico 27

¹Lac Yum tsi' sube' Moisés: Yom ma' suben pejtelel jini israelob: Che' an majqui mi' ña'tan i yʌq'ueñon i bʌ, che'ʌch yom mi' mel:

³Mi an junc'al i jabilel c'ʌlʌl ti uxc'al jini winic, yom mi' yʌc' jo'lujunc'al (300) peso.

⁴Mi x'ixic am bʌ junc'al i jabilel c'ʌlʌl ti uxc'al yom mi' yʌc' lujunc'al (200) peso.

⁵Che' ja'el mi ch'iton am bʌ jo'p'ejl i jabilel c'ʌlʌl ti junc'al i jabilel, yom mi' yʌc' wʌcc'al (120) peso. Mi xch'oc la' i yʌc' uxc'al (60) peso.

⁶Pero mi an jax to jump'ejl uw c'ʌlʌl ti jo'p'ejl jab, che' jini mi mejlel i yʌc' lujump'ejl i cha'c'al (30) peso. Mi xch'oc, uts'at mi' yʌc' junc'al peso.

⁷Pero mi an winic ñumeñix bʌ i jabilel ti uxc'al jab, la' i yʌc' lujump'ejl i jo'c'al (90) peso. Mi x'ixic uts'at mi' yʌc' uxc'al peso.

⁸Pero mi c'ax p'ump'un jax, che' jini yom mi' pʌjyel majlel ba'an jini motomaj cha'an mi mejlel i ña'tan bajche' mi mejlel i yʌc'. Che' jini an ti' wenta jini motomaj cha'an mi' yʌl bajche c'amel yom mi' yʌc'.

⁹Che' ja'el mi tsi' yʌc'ʌ i t'an cha'an mi' yʌq'ueñon alʌc'ʌl, wersa mi caj i yʌc'.

¹⁰Mach mejlic i q'uex i t'an. Mach mejlic i jem. Mach mejlic ti q'uextʌl uts'at bʌ ti mach bʌ uts'atic. Mi tsa' q'uexle juncojt alʌc'ʌl yic'ot yambʌ alʌc'ʌl, che' jini mux c ch'ʌm ti' cha'cojtlel.

¹¹Mi mach sʌquic jini alʌc'ʌl cha'an mi yʌq'ueñon cha'an c majtan, yom mi' pʌjyel majlel ba'an jini motomaj cha'an mi' q'uel bajche' yilal. An ti' wenta jini motomaj cha'an mi' ña'tan bajche' yom i tojol.

¹³Mi yom mi' cha' ch'ʌm alʌc'ʌl jini winic, la' i yʌc' i tojol. Che' ja'el yom mi' yʌc' i ñumel che' bajche' cha'yajl bʌ i diezmojlel.

¹⁴Che' an majqui mi' yʌq'ueñon i yotot,

¹⁵mi yom i cha' ch'ʌm, uts'at mi' q'uel jini motomaj cha'an mi' ña'tan bajche' i tojol. Che'ʌch yom mi' yʌc' i tojol jini winic. Yom mi' yʌc' i ñumel ja'el, che' bajche' cha'yajl bʌ i diezmojlel. Che' jini i cha'anix jini otot.

¹⁶Che' an winic mu' bʌ i yʌq'ueñon i yalʌ lum, mi mejlel i yʌc' i tojol che' bajche' an i ñuclel, che' bajche' jayp'is mi' cha'len pac'. Mi jump'is i pʌc'ol jini cebada yom ma' c'ajtin jo'lujunc'al peso.

¹⁷Mi tsi' yʌq'ueyon i lum che' ujtel to i jabilel la' tijicñʌyel, on yom i tojol.

¹⁸Pero mi tsa'ix ñumi i jabilel la' tijicñʌyel, che' jini yom i tojol che' bajche' jayp'ejl to jab yom cha'an i jabilel la' tijicñʌyel.

¹⁹Mi yom mi' cha' ch'ʌm i lum jini winic tsa' bʌ i yʌc'ʌ, yom mi' yʌc' i tojol jini lum che' bajche' mi' sub jini motomaj. Yom mi' yʌc' i ñumel ja'el, jiñʌch cha'yajl bʌ i diezmojlel.

²⁰Pero mi mach yomic i cha' ch'ʌm i lum, mi tsa' chojni ti' tojlel yambʌ winic, che' jini ma'anix majch mi mejlel i cha' mʌn.

²¹Che' ti' jabilel la' tijicñʌyel mi caj cʌq'uentel jini lum. Mi caj i yajñel ti wenta motomajob.

²²Mi an winic mu' bʌ i yʌc' i lum che' mʌmbil jach i cha'an, che' mach tilemic ti' tat, jini motomaj mi caj i ña'tan jayp'ejl to jab yom c'ʌlʌl ti' jabilel la' tijicñʌyel. Jini winic mi caj i yʌq'ueñon i tojol che' bajche' mi' yʌl jini motomaj. Ch'ujulʌch, c cha'añʌch.

²⁴Che' ti' jabilel la' tijicñʌyel, mi caj i cha' aq'uentel jini ñaxan bʌ i yum.

²⁵Ti pejtelel chuqui tac ma' ñoptʌben i tojol, uts'at ma' toj ti taq'uin am bʌ i c'ʌjñibal la' cha'an.

²⁶Mach mejlic la' cha' aq'ueñon jini ñaxan bʌ i yal tac la' wʌlac' come c cha'añʌch.

²⁷Pero mi mach sʌquic jini alac'ʌl, mi mejlel la' wʌq'ueñon taq'uin cha'an i wentajlel jini la' wʌlac' che' bajche' mi' ña'tan jini motomaj. Yom mi la' wʌc' yic'ot i ñumel, che' bajche' cha'yajl bʌ i diezmojlel. Mi mach la' womic la' cha' ch'ʌm, mi mejlel la' chomben yambʌ winic.

²⁸Pero mach mejlic ti chojñel jini tsa' bʌ la' wʌq'ueyon junyajlel, mi winicob, mi alʌc'ʌl tac, mi lum tac, come ch'ujulʌch, c cha'añʌch.

²⁹Jini winic tsa' bʌ aq'uenti i yorajlel cha'an mi' tsʌnsʌntel mach mejlic i toj i q'uexol ti taq'uin. Wersa mi caj i chʌmel.

³⁰Jini diezmo loq'uem tac bʌ ti la' lum, mi c'uxbil bʌ i wut jam, mi i wut pʌc'ʌbʌl, c cha'añʌch, ch'ujulʌch.

³¹Mi an juntiquil yom bʌ i cha' mʌn jini diezmo, mi tsepbil bʌ i wut jam, mi i wut pʌc'ʌbʌl, ts'ʌcʌl yom mi' yʌc' i tojol yic'ot i ñumel che' bajche' cha'yajl i diezmojlel.

³²Pejtelel i diezmojlel jini wacax, yic'ot tiñʌme', yic'ot pejtelel jini mu' bʌ i tsijquel, c cha'añʌch.

³³Mach yomic mi la' ñaxan q'uel mi uts mi jontol. Mach yomic mi la' q'uex. Mi tsa' la' q'uexe, che' jini yom mi la' wʌq'ueñon ti cha'cojtlel jini i q'uexol. Mach mejlic ti mʌñol. Che' tsi' yʌlʌ lac Yum.

³⁴Pejtelel iliyi jiñʌch i mandar lac Yum tsa' bʌ i sube Moisés ya' ti wits i c'aba' Sinaí cha'an mi' cha' subeñob jini israelob.