Read Chol Levitico 4 Bible Online

Levitico 4 - Chol bible

Levitico 4

¹Lac Yum tsi' yʌq'ue Moisés mandar: Subeñob pejtelel israelob jiñʌch c mandar cha'an jini mu' bʌ i ñusan c t'an che' mach tsajalic i cha'an.

³Mi an juntiquil motomaj mu' bʌ i cha'len mulil che' mach tsajalic i cha'an, mi' tajob i mul pejtel winicob ti' caj. La' i yʌq'ueñon juncojt alʌ wacax i tat bʌ mach bʌ wis anic i chʌmel mi i lojwel, cha'an mi' ñusʌntel mulil.

⁴Yom mi' pʌy tilel jini wacax ya' ti' ti' jini Tabernáculo. Yom mi' c'ʌcchocon i c'ʌb ya' ti' jol jini wacax. Che' jini mi caj i tsʌnsan tic tojlel.

⁵Jini motomaj mi caj i ch'ʌm tilel i ch'ich'el ya' ti' mal Tabernáculo. La' i ts'aj i yal i c'ʌb ya' ti' ch'ich'el cha'an mi' tsijcan wucyajl tic tojlel ya' ti' tojel jini joc'ol bʌ pisil mu' bʌ i mʌctan jini Ch'ujul* bʌ Ajñibʌl.

⁷Jini motomaj mi caj i c'ʌn lamital jini ch'ich' cha'an mi' bomben i xulub tac pulʌntib ba' mi' pulel pom tic tojlel ya' ti Tabernáculo. Jini i colobal jini ch'ich' la' i col ya' ti' yebal jini pulʌntib ya' ti' ti' jini Tabernáculo.

⁸Che' jini yom mi' yʌq'ueñon pejtelel i lewil pʌc'ʌl bʌ ya' ti' soyta' yic'ot jini cha'p'ejlel i cuchi' tun yic'ot i lewil yic'ot i yolmal. Mi caj i pule' ya' ti pam jini pulʌntib che' bajche' mi' pul jini wacax cha'an mi' taj i tijicñʌyel i pusic'al.

¹¹Yom mi' ch'ʌm majlel i colobal jini alʌc'ʌl ya' ti' pat jini tejclum ba' sʌc pañimil. I pʌchʌlel jini wacax, yic'ot pejtelel i bʌc'tal, yic'ot i jol, yic'ot i yoc, yic'ot i soyta', yic'ot i ta' la' i pule' ya' ti pam jini si' ba' mi' yʌc'ob i tʌñʌl c'ajc loq'uem bʌ ti pulʌntib.

¹³Mi ti' pejtelel jini israelob tsi' cha'leyob mulil che' mach tsajalobic i cha'an, mi' tsi' ñusayob jump'ejl c mandar, laj añob i mul ti' pejtelelob.

¹⁴Che' bʌ tsa'ix i ña'tayob i mul, yom mi' yʌc'ob jujuncojt alʌ tat wacax cha'an i ñʌsʌntel mulil. La' i pʌyob tilel ya' ti' ti' jini Tabernáculo.

¹⁵Jini xñoxob ya' ti tejclum mi caj i c'ʌcchocoñob i c'ʌb ya' ti' jol jini wacax. Mi caj i tsʌnsañob jini wacax ya' tic tojlel.

¹⁶Jini wa'chocobil bʌ motomaj mi caj i chʌm ochel i ch'ich'el wacax ti' mal jini Tabernáculo.

¹⁷Jini motomaj mi caj i ts'aj i c'ʌb ti' ch'ich'el jini wacax. Wʌcyajl yom mi' cha'len tsijcaya tic tojlel ya' ba'an jini joc'ol bʌ pisil.

¹⁸Yom ja'el mi' ch'ʌm jini ch'ich' cha'an mi' bombembeñon i xulub jini pulʌntib am bʌ tic tojlel ti Tabernáculo. Jini i colobal jini ch'ich' la' i bec' ya' ti' yebal jini pulʌntib ya' ti' ti' jini Tabernáculo.

¹⁹Yom mi' loc'san pejtelel i lewil cha'an mi' pul ya' ti pam jini pulʌntib.

²⁰Che'ʌch yom mi' mel yic'ot jini wacax che' bajche' mi' mel yic'ot jini yambʌ majtañʌl mu' bʌ cʌq'uentel cha'an mi' ñusʌntelob i mul ti pejtelelob. Che' jini mi caj c ñusʌbeñob i mul ti' pejtelel.

²¹Jini motomaj mi caj i ch'ʌm majlel jini wacax ya' ti' pat i tejclum cha'an mi' pule' che' bajche' tsi' pulu cha'an i mul juntiquil. Che'ʌch ja'el mi caj i mel cha'an i mul pejtelel israelob.

²²Mi tsi' taja i mul juntiquil yumʌl ti' caj cha'an tsi' ñusʌbeyon c mandar che' mach tsajalic i cha'an,

²³mi tsi' ña'ta an i mul, la' tilic ti ora cha'an mi' yʌq'ueñon juncojt i tat chivo mach bʌ wis anic i c'amʌjel mi i lojwemal.

²⁴Yom mi' c'ʌcchocon i c'ʌb ti' jol jini chivo. Yom mi' tsʌnsan ya' baqui mi' tsʌnsʌntel jini pulbil tac bʌ majtañʌl. Che' jini yom mi' yʌq'ueñon. Jiñʌch majtañʌl cha'an i mul.

²⁵Jini motomaj mi caj i ts'aj i c'ʌb ya' ti' ch'ich'el chivo. Mi caj i bomben i xulub jini pulʌntib ba' mi' pulel jini majtañʌl. La' i bec' i colobal i ch'ich'el ya' ti' yebal jini pulʌntib.

²⁶Pejtelel i lewil tac yom mi' pulel ya' ti jini pulʌntib che' bajche' mi' pulel i lewil yan tac bʌ majtañʌl mu' bʌ cʌq'uentel cha'an wocolix cʌlʌ. Che'ʌch mi caj i yʌc' majtañʌl jini motomaj cha'an i tojol i mul jini yumʌl. Mi caj i ñusʌbentel i mul.

²⁷Mi an juntiquil winic mu' bʌ i cha'len mulil che' mach tsajalic i cha'an, tsa'ix i taja i mul.

²⁸Ti wi'il che' mi' ña'tan an i mul la' i pʌy tilel juncojt i ña'al bʌ chivo, mach bʌ wis anic i c'amʌjel mi i lojwemal cha'an i tojol i mul tsa' bʌ i mele.

²⁹Yom mi' c'ʌchocon i c'ʌb ya' ti' jol jini alʌc'ʌl woli bʌ i yʌc' cha'an i mul. Che' jini mi caj i tsʌnsan ya' ti ajñibʌl ba' mi' tsʌnsʌntel jini alʌc'ʌl tac mu' bʌ c pulbentel.

³⁰Ti wi'il jini motomaj mi caj i ts'aj i c'ʌb ya' ti' ch'ich'el jini chivo, cha'an mi' bon tac ya' ti' xulub pulʌntib ba' mi' pulel majtañʌl. La' i bec' i colobal ya' ti' yebal jini pulʌntib.

³¹Yom mi' loc'sʌbentel pejtelel i lewil che' bajche' tsa' loc'sʌnti i lewil jini majtañʌl cha'an wocolix cʌlʌ. An ti' wenta jini motomaj cha'an mi' pul ya' ti pam jini pulʌntib. Mi caj c mulan jini c majtan. Che'ʌch yom mi' mel jini motomaj cha'an mi' tojbentel i mul ili winic. Mi caj i ñusʌbentel i mul.

³²Che' ja'el mi tsi' pʌyʌ tilel juncojt alʌ tiñʌme' cha'an i ñusʌntel mulil, yom juncojt i ña'al bʌ tiñʌme' mach bʌ wis anic i c'amʌjel mi i lojwemal.

³³Yom mi' pʌy tilel ba' mi' tsʌnsʌntel majtañʌl. Yom mi' c'ʌcchocon i c'ʌb ya' ti' jol jini tiñʌme'. Che' jini mi caj i tsʌnsan jini tiñʌme' cha'an i mul.

³⁴Jini motomaj mi caj i ts'aj i c'ʌb ya' ti' ch'ich'el jini majtañʌl cha'an mi' bomben i xulub tac jini pulʌntib ba' mi' pulel jini majtañʌl tac. La' i bec' i colojbal jini ch'ich' ya' ti yebal jini pulʌntib.

³⁵La' i loc'sʌben pejtel i lewil che' bajche' tsa' loc'sʌbenti i lewil jini majtañʌl cha'an wocolix cʌlʌ. An ti' wenta jini motomaj cha'an mi' pul ya' ti pulʌntib che' bajche' yambʌ pulbil bʌ c majtan. Che' jini mi caj i tsʌnsʌbeñon cha'an i ñusʌntel mulil. Mi caj c ñusʌben i mul jini winic.