Read Chol Levitico 5 Bible Online

Levitico 5 - Chol bible

Levitico 5

¹Mi an tsa' bʌ i q'uele ti mulil juntiquil i pi'ʌl, mi tsi' wen ubi chuqui tsa' ujti, mi ma'anic tsi' tsictesa, mi' yajñel ti' wenta jini mulil.

²Che' ja'el che' an majch mi' tʌl chʌmen bʌ alʌc'ʌl mi bʌte'el mi i chʌñil pañimil che' tic'bil bʌ mi la' c'ux, bibi' mi' cʌytʌl tic wut anquese mach tsajalic i cha'an che' bʌ tsi' tʌlʌ.

³Mi tsi' tʌlbe i pʌjq'uemal juntiquil winic, bibi' mi' cʌytʌl tic wut che' mi' cajel i ña'tan.

⁴Che' ja'el che' an juntiquil mu' bʌ i payxo ac' i t'an ti ora cha'an chuqui mi caj i mel, mi uts'at o mi mach uts'atic, añʌch i mul che' mi' cajel i ña'tan chuqui tsi' mele.

⁵Ti jujunchajp i mul tsa' bʌ i mele yom mi' tsictesan.

⁶Yom mi' pʌy tilel juncojt alʌc'ʌl ba' añon, mi xch'oc tiñʌme' mi xch'oc chivo. An ti wenta motomaj cha'an mi' tsʌnsʌbeñon cha'an i tojol mulil. Che' jini mi caj c ñusʌben i mul.

⁷Mi ma'anic i tojol jini alʌ tat tiñʌme' cha'an mi' yʌq'ueñon, la' i ch'ʌmbeñon tilel cha'cojt xpuruwoc mi cha'cojt x'ucujts, juncojt cha'an majtañʌl cha'an mulil, yambʌ cha'an majtañʌl mu' bʌ c pulbentel.

⁸Yom mi' ch'ʌm tilel ba'an jini motomaj. La' i mil, pero mach yomic mi' loc'sʌben i jol. Mi caj i pule' cha'an i mul.

⁹Yom mi' ts'aj i c'ʌb ti' ch'ich'el cha'an mi' tsijcan ti' ñʌc' jini pulʌntib. Jini i colojbal la' i choc ti' yebal jini pulʌntib, come cha'añʌch i ñusʌntel mulil.

¹⁰Jini yambʌ juncojt mi caj i pule' che' bajche' i tilel ti pejtelel ora. Che' jini, jini motomaj mi caj i yʌc' jini majtañʌl cha'an i mul jini winic. Mi caj c ñusʌben i mul.

¹¹Mi p'ump'un jini winic, mi mach mejlic i yʌc' cha'cojt xpuruwoc mi cha'cojt x'ujcuts, yom mi' ch'ʌm tilel jump'is juch'bil bʌ harina cha'an i ñusʌntel i mul. Mach yomic mi' xajc'un yic'ot aceite. Mach yomic mi' yʌq'uen pom, come majtañʌlʌch cha'an mulil.

¹²Mi caj i ch'ʌmben tilel jini motomaj mu' bʌ caj i ch'ʌm junmujch' harina cha'an mi' pule' ya' ti pam jini pulʌntib ba' mi' pulbeñon c majtan. Jiñʌch majtañʌl mu' bʌ i yʌjq'uel cha'an mulil.

¹³Che' jini, jini motomaj mi caj i yʌc' majtañʌl cha'an i tojol ti chajp ti chajp mulil. Mi caj i ñusʌbentel i mul jini winic. Jini i colobal i cha'añix jini motomaj che' bajche' c majtan trigo. Che' tsi' yʌc'ʌ mandar lac Yum.

¹⁴Lac Yum tsi' sube Moisés: Che' an majch mi' taj i mul tic tojlel cha'an tsi' yʌsi chuqui tac ch'ujul che' mach tsajalic i cha'an, la' i pʌybeñon tilel juncojt i tat tiñʌme' mach bʌ wis anic i c'amʌjel mi i lojwemal. Yom tiñʌme' am bʌ i tojol che' bajche' c'amel i multa jini winic. Jiñʌch c majtan cha'an i mul jini winic.

¹⁶Che' jini mi caj i ñusʌntel i mul cha'an tsi' yʌsi jini ch'ujul tac bʌ. Mi tsi' cʌyʌ i yʌc' i diezmo, mi caj i toj jini an to bʌ yom yic'ot i ñumel, cha'p'ejl i diezmojlel. Mi caj i yʌq'uen motomaj. An ti' wenta jini motomaj cha'an mi' yʌc' ti ñusʌntel jini mulil. Mi caj i yʌq'ueñon jini tat tiñʌme' cha'an mulil. Che' jini, mi' taj c ñusʌben i mul.

¹⁷Che' an majch mi' ñusan c mandar che' mach tsajalic i cha'an, muq'uix i taj i mul. La' i ch'ʌm tilel juncojt i tat bʌ tiñʌme' mach bʌ wis anic i c'amʌjel mi i lojwemal. Jini motomaj mi cajel i yʌc' cha'an i tojol i mul jini winic tsa' bʌ i mele che' mach tsajalic i cha'an. Che' jini ñusʌbilix i mul jini winic.

¹⁹Jiñʌch majtañʌl cha'an mulil cha'an ti' caj tsi' ñusʌbeyon c mandar. Che' tsi' yʌlʌ lac Yum.