Read Chol Jeremias 1 Bible Online

Jeremias 1 - Chol bible

Jeremias 1

¹I t'an Jeremías i yalobil Hilcías. Motomajʌch Jeremías chumul bʌ ti Anatot ti' lumal Benjamín.

²Lac Yum tsa' caji' pejcan che' uxlujump'ejlix (13) jab i yumʌntel Josías (i yalobil Amón) ti' lumal Judá.

³Lac Yum tsi' chʌn pejca Jeremías che' woli ti rey Joacim (i yalobil Josías) ya' ti Judá c'ʌlʌl ti' junlujump'ejlel jab i yumʌntel Sedequías (i yalobil Josías). Che' ti' jo'p'ejlel uw tsa' cʌjchiyob majlel jini chumulo' bʌ ti Jerusalén.

⁴Tsa' tili i t'an lac Yum tic tojlel:

⁵J cʌñʌyetix che' maxto anic tsa cʌc'ʌyet ti cʌntʌntel ti' ñʌc' a ña'. Tsac yajcayet che' maxto anic tsa' q'uele pañimil. Tsac wʌn ña'ta j c'ʌñet ti subt'an ti' tojlel winicob ti pejtelel lum, che'en.

⁶Tsa cʌlʌ: Mach mejlicon, c Yum Dios. Mach cujilic t'an. Maxto anic c jabilel, ch'o'ch'ocon to, cho'on.

⁷Lac Yum tsi' chʌn pejcayon: Cʌyʌx a sub a bʌ cha'an ch'o'ch'oquet to. Anquese maxto anic a jabilel, mi caj a cha'len t'an baqui jach mic choquet majlel. Che' bajche' mic subeñet mi caj a cha' sub.

⁸Mach a wis bʌc'ñan winicob, come añon quic'otet cha'an mi cʌq'uet ti colel ti' c'ʌb, che'en lac Yum.

⁹Lac Yum tsi' sʌts'ʌ i c'ʌb. Tsi' tʌlʌ quej. Tsi' subeyon: Tsa'ix cotsa c t'an ti a wej.

¹⁰Awilan, wolix c wa'chocoñet cha'an ma' subeñob c t'an winicob ti pejtelel lum yic'ot i reyob, cha'an ma' chocob loq'uel, yic'ot cha'an ma' jisañob, cha'an ma' cha' techob yic'ot cha'an ma' xuc'chocoñob, che'en.

¹¹Tsa' cha' tili i t'an lac Yum tic tojlel: ¿Chuqui wola' q'uel, Jeremías? che'en. Tsac jac'ʌ: Wolij q'uel te'. Woli' pasel juntejc te' i c'aba' almendra, cho'on.

¹²Lac Yum tsi' yʌlʌ: Wen yʌxʌl a wo. Joñon ja'el yʌxʌl co cha'an mic ts'ʌctesan c t'an, che'en.

¹³Ti' cha'yajlel tsa' tili i t'an lac Yum tic tojlel: ¿Chuqui wola' q'uel? che'en. Tsac jac'ʌ: Wolij q'uel colem p'ejt. Wolix ti lojc ya' ti norte, cho'on.

¹⁴Lac Yum tsi' subeyon: Tal ñuc bʌ wocol loq'uem bʌ ti norte. Muq'uix i taj pejtelel chumulo' bʌ ti a lumal.

¹⁵Mi caj c pʌy tilel a contrajob chumulo' bʌ ti yan tac bʌ lum ya' ti norte. Talob i wa'chocon i yumʌntel ti' yochib Jerusalén yic'ot ti chan bʌ ts'ajc am bʌ ti' joytʌlel Jerusalén yic'ot ti pejtelel xchumtʌl tac ti Judá.

¹⁶Cabʌl jax i jontolil c tejclumob. Jini cha'an mi caj c chocbeñob tilel pejtel jini wocol cha'an tsa'ix i cʌyʌyoñob. Mi' pulbeñob pom yambʌ diosob. Mi' ñocchocoñob i bʌ ti' tojel jini melbil tac bʌ tsa' bʌ i meleyob.

¹⁷Chajpan a bʌ. Cucux subeñob pejtel jini t'an tsa' bʌ c subeyet. Mach a bʌc'ñañob che' ma' q'uelbeñob i wut, ame mi cʌq'uet ti quisin ti' tojlelob.

¹⁸Awilan tsa'ix c meleyet che' bajche' ts'ajquibil bʌ tejclum joyol bʌ ti a contrajob. Lajalet bajche' ts'ajquibil bʌ otot mach bʌ mejlic ti ch'ʌjmel. Xuc'ul mi caj a cha'len t'an ti' contra pejtel i reyob Judá yic'ot i yalobilob rey yic'ot jini chumulo' bʌ ti jini lum.

¹⁹Mi caj i contrajiñet, pero mach mejlic i jisañet come añon quic'otet. Mi caj cʌq'uet ti colel ti' c'ʌb, che'en lac Yum.