Read Chol Jeremias 10 Bible Online

Jeremias 10 - Chol bible

Jeremias 10

¹Ubiben i t'an lac Yum, Israel. Lac Yum woli' yʌl:

²Mach che'ic yom ma' ñop bajche' yan tac bʌ tejclum mu' bʌ i chʌcʌ q'uelob jini ec' ti panchan cha'an mi' ña'tañob chuqui tac tal. Mach a bʌc'ñan jini ec' che' bajche' yaño' bʌ.

³Come lot jach chuqui mi' yʌlob xq'uel ec'. I tilel mi' ñopob lot. Jini xjuc'te' mi' sec' jubel te'. Wen yujil e'tel ti te'. Mi' c'ʌn machit cha'an mi' melben i wut i dios.

⁴Yaño' bʌ mi' boñob ti oro. Mi' ch'ʌlob ti plata. Mi' ch'ijob yic'ot lawux ya' ba' mi' wa'chocoñob ti' t'uchlib ame yajlic.

⁵I melbalob jach winicob jini diosob. Leco yilal che' bajche' jini chajpʌbil bʌ i cha'an winicob ti pʌc'ʌbʌl mu' bʌ i bʌc'tesan majlel te'lemut. Mach yujilobic t'an. Wersa mi' q'uejchelob majlel come mach yujilobic xʌmbal. Mach a bʌc'ñañob come ma'anic i p'ʌtʌlel. Mach mejlic i melbeñet chuqui jontol mi chuqui uts'at.

⁶Ma'anic yambʌ ñuc bʌ Dios lajal bʌ bajche' jatet, c Yum. Wen ñuc a c'aba'. Cabʌl a p'ʌtʌlel.

⁷La' i bʌc'ñañet pejtel winicob ti pejtelel pañimil, come Reyet ti pejtelel tejclum tac. Ma'anic yambʌ, jatet jach.

⁸Tontojob jini diosob melbilo' bʌ ti te'. Ma'anic i c'ʌjñibal ti cʌntesaya. Tontojob ja'el mu' bʌ i ñopob.

⁹Ch'oyol ti Tarsis jini tsucu taq'uin, ch'oyol ti Ufaz jini oro, mi' ch'ʌmob tilel. Jini wen yujilo' bʌ mi' melob ejtalʌl. Mi' xojbeñob chʌchʌc bʌ yic'ot chʌccojan bʌ i pislel, wen letsem bʌ i tojol. Laj i melbalob winicob yujilo' bʌ i melol.

¹⁰Pero lac Yum jiñʌch Dios jini isujm bʌ, jini cuxul bʌ mach bʌ yujilic chʌmel ti pejtelel ora. Che' mich' lac Yum, mi' ñijcan i bʌ lum. Che' mich'ix, mi' puts'elob winicob ti pejtelel pañimil cha'an bʌq'uen.

¹¹Yom ma' subeñob: Ma'anic chuqui mi' melob jini diosob. Mach i melbalic panchan yic'ot pañimil. Jini cha'an mi caj i sʌc jilelob.

¹²Diosʌch tsa' bʌ i mele pañimil ti cabʌl i p'ʌtʌlel. Tsi' xuc'choco pañimil cha'an cabʌl i ña'tʌbal. Tsi' lich'i tac panchan jini wen yujil bʌ.

¹³Che' mi' cha'len t'an mi' ñijcan i bʌ tocal. Mi' yʌc' ti letsel i yowix lum ti' petol pañimil. Mi' choc tilel chajc yic'ot ja'al. Mi' loc'san ic' ya' ba' lotol cha'an mi' choc tilel.

¹⁴Tontojob pejtel winicob. Ma'añobic i ña'tʌbal. Jini yujil bʌ e'tel ti oro mi caj i yubin quisin cha'an tsi' mele tac dios, come lot jach i dios. Ma'anic i cuxtʌlel.

¹⁵Ma'anic i c'ʌjñibal. I melbal jach jini yujilo' bʌ wajleya. Che' ti' yorajlel toj mulil mi caj i jilel.

¹⁶Mach che'ic i Dios Jacob, come jini tsi' mele pejtel chuqui tac an. Tsi' yajca Israel cha'an mi yochel ti' cha'an bʌ. Jiñʌch i Yum Panchan.

¹⁷Tempan a pislel yic'ot a chubʌ'an cha'an ma' cuch majlel. Poj jumuc' jach wʌ' chumulet ba' wolix i tejchel guerra.

¹⁸Come lac Yum tsi' yʌlʌ: Otsan ti a pusic'al chuqui wolic mel. Wolix c choc loq'uel jini chumulo' bʌ ti ili lum. Mi caj cʌc'ob ti tic'lʌntel cha'an mi' yubiñob wocol, che'en.

¹⁹Obol c bʌ. Cabʌl c wocol. Wen ch'ijiyemon. Mach yujilic lajmel c wocol. Wersa mij cuch.

²⁰Ma'anix cotot. Pʌybilob majlel calobilob ba' ma'anix mi caj c chʌn q'uelob. Ma'anix majch mi caj i cha' wa'chocobeñon cotot. Laj majlemob.

²¹Jini yumʌlob ma'anic mi' cʌntañob c pi'ʌlob. Ma'anix mi' tsajcañob i Yum Dios. Jini cha'an mach uts'atic añob. Jini mu' bʌ i yumañob tsa'ix laj pʌjyiyob majlel lajal bajche' i yʌlac' jini xcʌnta tiñʌme'ob.

²²Ubinla. Motocñayob xguerrajob. Talob ti xʌmbal ya' ti norte. I tejclum tac Judá mi caj i sujtelob ti' ch'eñal jontol bʌ ts'i'.

²³C Yum, cujil ma'anic i ña'tʌbal winic cha'an mi' bajñel toj'esan majlel i bʌ. Mach mejlic i bajñel yajcan i bijlel.

²⁴Toj'esañon c Yum, pero ti' yutslel a pusic'al, mach ti a mich'ajelic, ame c'uñ'ac c pusic'al cha'an pec'on.

²⁵Pʌsbeñob a mich'ajel yan tac bʌ tejclum mach bʌ anic mi' cʌñet, mach bʌ anic mi' pejcañet, come tsi' jisayob Jacob. Tsi' laj jisʌbeyob i tejclum tac.