Read Chol Jeremias 11 Bible Online

Jeremias 11 - Chol bible

Jeremias 11

¹Tsa' tili i t'an lac Yum ba'an Jeremías:

²Ubin jini xuc'ul bʌ c t'an. Cʌntesan jini chumulo' bʌ ti Judá yic'ot ti Jerusalén cha'an tsac mele xuc'ul yic'otob.

³Subeñob ts'a'lebil ti Dios jini mach bʌ anic mi' ñich'tan jini xuc'ul bʌ c t'an. Tsac mele jini trato yic'ot la' tatob che' bʌ tsac pʌyʌyob loq'uel ti Egipto ya' ba' woliyob ti wocol e'tel. Tsac subeyob: “Ñich'tanla c t'an. Melela chuqui mic subeñetla. Che' jini c winiquetla, la' Dioson.

⁵Che' jini mi' caj ti ts'ʌctiyel chuqui tsac sube la' tatob che' bʌ tsa cʌq'ueyob jini wen bʌ lum ba' on mi tajtʌl lech yic'ot chab che' bajche' woli la' q'uel wʌle”, che'en lac Yum, i Dios Israel. Tsac jac'be: Isujm bajche' wola' wʌl, c Yum, cho'on tsac sube.

⁶Lac Yum tsi' subeyon: Subeñob pejtel ili t'an jini chumulo' bʌ ti' tejclum tac Judá yic'ot ti Jerusalén: Ñich'tanla jini xuc'ul bʌ c t'an. Melela.

⁷Come tsac subeyob la' tatob ti wocol t'an che' bʌ tsac pʌyʌyob loq'uel ti Egipto ti oñiyi c'ʌlʌl wʌle: “Jac'beñonla c t'an”, cho'on.

⁸Pero ma'anic tsi' jac'ʌyob, mach yomobic i ñich'tan. Ti jujuntiquil tsi' meleyob bajche' tsi' bajñel ña'tayob cha'an jontol i pusic'al. Jini cha'an tsac chocbeyob tilel wocol cha'an tsi' ñusayob c t'an, come ma'anic tsi' meleyob che' bajche' tsac subeyob, che'en.

⁹Lac Yum tsi' cha' subeyon: Jini chumul bʌ ti Judá yic'ot ti Jerusalén woli' temob i t'an.

¹⁰Tsa'ix sujtiyob ti' bijlel i tatob tsa' bʌ i juch'teq'ueyob c t'an. Tsa' majli i ch'ujutesañob yambʌ dios tac. Jini chumulo' bʌ ti Judá yic'ot ti Jerusalén tsa'ix i ñusayob jini xuc'ul bʌ c t'an tsa' bʌ c mele yic'ot i tatob.

¹¹Jini cha'an p'isi ti a wenta, wolic chocbeñob tilel ñuc bʌ wocol. Mach mejlicob ti puts'el. Anquese mi' lon c'ajtiñob, ma'anic mi caj cubin.

¹²Mi' majlelob i pejcan i diosob cha'an mi' c'ajtibeñob i coltʌntel. Cabʌl tsi' pulbeyob pom pero ma'anic mi' jac'ob. Ma'anic i p'ʌtʌlel ti coltaya ti' yorajlel ñuc bʌ wocol.

¹³Tsa'ix p'ojliyob a diosob ti jujump'ejl tejclum, Judá. Cabʌlix a pulʌntib che' bajche' jayts'ijt a bijlel tac, Jerusalén. Tsa' wa'chocobeyob pulʌntib jini Baal cha'an ma' cha'len chuqui quisintic jax.

¹⁴Jini cha'an, Jeremías, mach ma' tajob ti oración ili winicob x'ixicob, come ma'anic mi caj cubiñob che' mi' pejcañoñob ti' yorajlel wocol.

¹⁵Che' ujtel to i cha'len ts'i'lel jini c'uxbibil bʌ c cha'an, ¿yom ba mi' cha' ochel ti cotot? ¿Mu' ba caj i sʌc'an i pusic'al Judá yic'ot i t'an mu' bʌ i subeñon yic'ot cotol bʌ c majtan mu' bʌ i yʌq'ueñon? ¿Jasʌl ba iliyi cha'an mi' cha' taj i tijicñʌyel?

¹⁶Lac Yum tsi' q'ueleyet che' bajche' i t'ojol jax bʌ olivote' mu' bʌ i yʌc' cabʌl i wut, pero mach chʌn che'etix wʌle. Ju'ucña mi' tilel p'ʌtʌl bʌ ic', ju'ucña ja'el jini c'ajc mu' bʌ i tsujq'uel cha'an mi' lu' pulel jini te' yic'ot i c'ʌb tac.

¹⁷Come i Yum Panchan yic'ot Pañimil tsa' bʌ i pʌc'ʌyet mi caj i contrajiñet che' bajche' tsi' yʌlʌ cha'an ñuc a mul. Cabʌl tsa' jec'beyon c pusic'al che' bʌ tsa' pulbe pom Baal, che'en lac Yum.

¹⁸Lac Yum tsi' pʌsbeyon bajche' woli' ña'tañob ti mucul jach. Cujilix.

¹⁹Come lajalon bajche' c'uxbibil bʌ tiñʌme' mach bʌ yujilic ba' ora mi caj i pʌjyel majlel ti tsʌnsʌntel. Tsi' temeyob i t'an cha'an mi' tsʌnsañoñob. La' lac jisan che' c'oc' to che' bajche' te' anto bʌ i yetsel. La' lac junyajlel jisan cha'an ma'anix mi' chʌn ña'tʌntel ti pañimil, che'ob.

²⁰C Yum, i Yumet Panchan yic'ot Pañimil. Toj ma' cha'len meloñel. Lu' cʌñʌl a cha'an i pusic'al winicob. Ac'ʌyob ti toj mulil come tsa'ix cʌc'ʌ c bʌ ti a wenta cha'an ma' melon cho'on.

²¹Jini cha'an lac Yum tsi' yʌlʌ: Q'uelel c cha'an ili winicob ti Anatot tsa' bʌ i temeyob i t'an cha'an mi' tsʌnsañet. Mi' yʌlob: “Mach a chʌn pejcañon lojon ti' c'aba' lac Yum ame chʌmiquet tij c'ʌb lojon”, che'ob.

²²Jini cha'an mi caj cʌc'ob ti wocol, che'en lac Yum. Jini ch'iton winicob mi caj i chʌmelob ti espada. Mi caj i laj chʌmelob ti wi'ñal ch'iton bʌ yic'ot xch'oc bʌ i yalobilob.

²³Ma'anix mi caj i cʌytʌl mi juntiquilic ti' yorajlel ñuc bʌ wocol che' mi cʌq'ueñob i toj i mul jini winicob ti Anatot, che'en lac Yum.