Read Chol Jeremias 12 Bible Online

Jeremias 12 - Chol bible

Jeremias 12

¹Tojet c Yum anquese mach tijicñayonic. La' c subeñet chuqui mach tojic woli bʌ i yujtel. ¿Chucoch tijicñayob jini xjontolilob? ¿Chucoch wen chumulob jini yujilo' bʌ lotiya?

²Jatet ma' pʌc'ob. Mi' wen colelob, mi' p'ojlel cabʌl i chubʌ'an. Mi' yʌlob wocolix i yʌlʌ Dios pero ñajt añet ti' pusic'al. Ma'anic mi' p'isetob ti wenta.

³A cʌñʌyon c Yum. A wujil com c tsajcañet. C Yum, tujc'añon loq'uel che' bajche' tiñʌme' mu' bʌ caj i yʌjq'uel ti chʌmel. Meleyob c Yum.

⁴¿Jala to mi' yujtel wocol? Tiquinix lum. Tiquinix pejtel jini jam. Majlemobix bʌte'el yic'ot te'lemut. Jochol mi' cʌytʌl lum cha'an i mul xjontolilob. Mi' yʌlob: Mach jiliconla. Mach muq'uic i jisañonla Dios, che'ob.

⁵Lac Yum tsi' subeyon: Mi tsa' lujb'ayet ti xʌmbal yic'ot jini woliyo' bʌ ti ajñel ti' yoc, ¿bajche' mi caj a taj jini c'ʌchʌlo' bʌ yumʌlob yic'ot motomajob? Mi tsa' jats'ʌ a woc, mi tsa' yajliyet wʌ' ba wen pamacña lum, ¿bajche' mi caj a ñumel ti mate'el ti' ti' Jordán ja'?

⁶Jini a wijts'iñob yic'ot a pi'ʌlob año' bʌ ti' yotot a tat tsi' yʌc'ʌyet ti' c'ʌb a contrajob. Tsi' yajñesayet ti lot cha'an ma' majlel ti puts'el. Mach a ñopbeñob i t'an anquese uts mi' pejcañetob.

⁷Lac Yum tsi' yʌlʌ: Tsa'ix j cʌyʌ cotot. Tsa'ix c choco c tejclum ba' tsac ña'ta c taj c ñuclel. Tsa'ix cʌc'ʌ jini c'uxbibilo' bʌ c cha'an ti' c'ʌb i contrajob.

⁸Jini c tejclum ba' tsac ña'ta c taj c ñuclel tsa'ix sujti ti mate'el ba' chumul bajlum. Mi' yʌ'leñoñob che' bajche' bajlum yom bʌ i jisañon. Jini cha'an ts'a' mij q'uelob.

⁹Jini c tejclum ba' tsac ña'ta c taj c ñuclel mi' mel i bʌ che' bajche' xiye' yom bʌ i c'uxon. ¿Mach ba joyolic c tejclum ti xta'jol mu' bʌ caj i c'uxob? Cucu pʌyʌ tilel ti we'el pejtel bʌte'el.

¹⁰Jini año' bʌ i ye'tel cha'an mi' cʌntañob c tiñʌme' tsa'ix i biy t'uchtayob c ts'usubil. Tsi' tic'layob c lum ba' tsa' ñumiyob. Jini i t'ojol jax bʌ c lum tsa'ix sujti ti colem bʌ xajlelol wen ch'ijiyem bʌ.

¹¹Ma'anix i c'ʌjñibal. Ma'anix i yum. Wen ch'ijiyem mij q'uel. Ma'anic majqui mi' p'untan. Ma'anic majqui woli' mel i pusic'al cha'an chuqui woli' yujtel, che'en.

¹²Julemobix jini yujilo' bʌ jisaya i wentajobʌch i yespada lac Yum. Pam pujquemob ti pam wits ba' ma'anic pʌc'ʌbʌl. Baqui jach añob woliyob ti jisaya. Ma'anic majqui ñʌch'ʌl. Woliyob ti bʌq'uen pejtel winicob.

¹³Tsi' pʌc'ʌyob trigo, pero woli' c'ajob ch'ix. Lolom jach tsi' ñusayob q'uin ti e'tel. Ma'anic i chobejtʌbal. Mi' cajelob ti quisin cha'an woli' c'ajob i mich'lel lac Yum.

¹⁴Lac Yum mi' yʌl: Ubin chuqui mi caj c tumben jini xjontolilob ñajt bʌ ch'oyolob mu' bʌ i tilelob cha'an mi' jisʌbeñob i lumal c tejclum Israel, jini lum tsa' bʌ cʌq'ueyob. Mi caj c chocob loq'uel ti' lumal jini israelob che' bajche' mi caj c choc loq'uel Judá.

¹⁵Che' colbilobix c winicob ti' p'ʌtʌlel i contrajob, cha' talon c pʌsbeñob i yutslel c pusic'al. Mi caj c cha' pʌyob tilel ti' lumal, jujuntiquil ti' yajñib ba' tsa cʌq'ueyob i lum.

¹⁶Mi yomob i ñopon ti pejtelel i pusic'al cha'an mi' jac'ob c mandar che' bajche' tsaj cʌntesa c winicob, che' jini c cha'añobix. Temel yic'ot c winicob mi caj j coltañob mi tsi' junyajlel cʌyʌyob Baal cha'an mi' tsajcañoñob cha'an mi' q'ueloñob ti ñuc. Ti yambʌ ora tsi' tsajcayob Baal. Che'ʌch tsi' cha'leyob cʌntesa ja'el.

¹⁷Mi mach yomobic i jac'beñon c t'an, mi caj c junyajlel chocob loq'uel ti' lumal. Mi caj c jisañob, che'en lac Yum.