Read Chol Jeremias 13 Bible Online

Jeremias 13 - Chol bible

Jeremias 13

¹Lac Yum tsi' subeyon: Cucu, mʌñʌ a cajchiñʌc' melbil bʌ ti lino. Cʌchʌx a bʌ ti jini lino. Mach ma' ts'aj ti ja', che'en.

²Jini cha'an tsac mʌñʌ jini cajchiñʌc' che' bajche' tsi' subeyon lac Yum. Tsaj cʌchʌ c bʌ.

³Tsa' cha' tili i pejcañon lac Yum ti' cha'yajlel:

⁴Ch'ʌmʌ jini cajchiñʌc' lʌpʌl bʌ a cha'an tsa' bʌ a mʌñʌ. Cucu ti Eufrates ja'. Mucu ti ch'en ba' lech'el xajlel, che'en.

⁵Jini cha'an tsajniyon ti Eufrates ja'. Tsac mucu che' bajche' tsi' yʌlʌ lac Yum.

⁶Ñumeñix cabʌl q'uin lac Yum tsi' cha' subeyon: Cucu ti Eufrates. Cha' loc'san a cajchiñʌc' ya' ba' tsa' mucu che' bajche' tsac subeyet, che'en.

⁷Tsajniyon ti Eufrates. Tsac cha' loc'sa jini cajchiñʌc' ya' ba' tsac mucu. Awilan junyajlel oc'benix. Ma'anix i c'ʌjñibal.

⁸Tsa' cha' tili i t'an lac Yum ba' añon. Tsi' yʌlʌ: Che'ʌch mi caj c ju'sʌben i pusic'al Judá yic'ot Jerusalén cha'an chan woli' melob i bʌ.

¹⁰Jontolob. Mach yomobic i yubin c t'an. Mi' bajñel melob bajche' yom i bajñel pusic'al. Majlemobix yic'ot yan tac bʌ dios cha'an mi' ch'ujutesañob. Jini cha'an lajal mi caj i sujtelob che' bajche' jini cajchiñʌc' mach bʌ anix i c'ʌjñibal.

¹¹Che' bajche' tsi' toyoyet jini cajchiñʌc', che'ʌch ja'el tsi' toyoyon Israel yic'ot Judá come c cha'añobʌch ili winicob. Tsa' cʌlʌ mux caj i q'ueloñob ti ñuc ti' tojlel pejtel tejclum tac. Pero ma'anic tsi' jac'ʌyob.

¹²Jini cha'an subeñob: “Lac Yum Dios, i Dios Israel woli' sub: Mi caj i bujt'el ti vino pejtel tinaja tac”, che'et. Mi caj i jac'ob: “¿Mach ba cujilic lojon mi caj i laj bujt'el ti vino?” che'ob.

¹³Subeñob che' jini: “Lac Yum woli' sub: Che' bajche' mi la' yʌc'an ti vino, che' ja'el mi caj la' yʌc'an ti wocol ti pejteletla yic'ot ja'el jini rey am bʌ ti' buchlib David yic'ot motomajob yic'ot x'alt'añob yic'ot pejtel winicob x'ixicob.

¹⁴Mi caj cʌc'ob i contrajiñob i bʌ winicob yic'ot ch'iton bʌ i yalobilob, che'en lac Yum. Ma'anic mi caj c p'untañob. Ma'anic mi caj j coltañob. Mi caj c jisañob”. Che'ʌch yom ma' subeñob, che'en.

¹⁵Ñich'tanla c t'an. Mach yomic chan mi la' mel la' bʌ, come tsa'ix i cha'le t'an lac Yum.

¹⁶Q'uelela ti ñuc la' Yum Dios che' anto i yorajlel, ame la' jats' la' woc ti wits che' ac'ʌlelix. Che' ochemetixla ti ic'ch'ipan bʌ pañimil mi caj la' sʌclan i sʌclel pañimil, pero jini jach bʌbʌq'uen bʌ mi caj la' taj ti ic'ch'ipan bʌ pañimil.

¹⁷¿Maxto ba anic mi caj la' jac'? Mi tsʌts to la' pusic'al, mi caj c cha'len uq'uel ti mucul. Wen ch'ijiyem c pusic'al cha'an chan woli la' mel la' bʌ. Cabʌl mic cha'len uq'uel cha'an cʌchʌl mi caj i pʌjyel majlel i tejclum lac Yum.

¹⁸Lac Yum woli' yʌl: Suben jini rey yic'ot i ña': “Loq'uenla ba' buchuletla ti rey. Buchi'ixla ti tem, come tsa'ix chilbentiyetla jini corona i yejtal bʌ la' p'ʌtʌlel”.

¹⁹Tsʌts ñup'ulob jini tejclum tac ti sur. Ma'anic majch mi caj i coltañob. Tsa'ix cʌjchiyob majlel pejtel año' bʌ ti Judá.

²⁰Q'uele pañimil ti norte. Ix tilelob laj contrajob. ¿Baqui an a wʌlac' tsa' bʌ aq'uentiyet, jini wen uts'atax bʌ a wʌlac'?

²¹¿Chuqui mi caj a wʌl che' ma' yuman a contra? ¿Bajche' mi caj a mulan? ¿Tijicña ba mi caj a wubin? ¿Mach ba muq'uic a wubin wocol che' bajche' x'ixic woli bʌ ti bajq'uel?

²²Che' mi' letsañob a majts cha'an mi yʌq'uet ti quisin, mi caj a wʌl ti a pusic'al: “¿Chucoch woli cubin wocol?” Ña'tan che' jini, cha'an ti' caj a mul wola' wubin wocol.

²³Jini etíope, ¿mejl ba i q'uextan i pʌchʌlel? Jini bajlum, ¿mejl ba i yʌp i ts'ijbal am bʌ ti' pʌchʌlel? Che'ʌch añetla ja'el. Ñʌmʌletla ti jontolil. Mach muq'uic la' mel chuqui uts'at.

²⁴Mi caj c puquetla che' bajche' i sujl ixim mu' bʌ i wejlan majlel ic'.

²⁵Che'ʌch mi caj a jilel cha'an tsa' cʌyʌyon. Tsa' ñopo lot. Jini cha'an chocbilet c cha'an. Mi caj c tsictesañet che' pits'ilet. Mi caj c chilbeñet a majts.

²⁶Mi caj cʌq'uet ti quisin.

²⁷Q'uelel c cha'an pejtel a jontolil yic'ot a ts'i'lel yic'ot bajche' ma' pejcan a pi'ʌlob cha'an mi' pi'leñetob ya' ti ye' wits yic'ot ti jamil. Obol a bʌ, Jerusalén. ¿Jala to ba mi caj a sʌq'uesʌntel?