Read Chol Jeremias 15 Bible Online

Jeremias 15 - Chol bible

Jeremias 15

¹Lac Yum tsi' subeyon: Mach uts'atic mi caj c pʌs c bʌ ti' tojlel ili winicob. Muq'uic i xin otsañob i bʌ Moisés yic'ot Samuel cha'an mi' c'ajtibeñoñob wocol t'an, ma'anic mic jac'beñob. Chocoyob loq'uel tic tojlel. Subeñob majlel.

²Che' mi' yʌlob: “¿Baqui yom mic majlel lojon?” subeñob: “La' majlicob ti chʌmel jini mu' bʌ caj i chʌmelob. La' jejq'uicob ti espada jini mu' bʌ caj i jejq'uelob ti espada. La' chʌmicob ti wi'ñal jini mu' bʌ caj i yubiñob wi'ñal. La' majlicob ti yambʌ lum jini mu' bʌ caj i cʌjchelob majlel”. Che' yom ma' subeñob.

³Mi caj cʌc'ob ti chʌmel ti chʌnchajp wocol: jini espada yujil bʌ tsʌnsa, yic'ot jini jontol bʌ ts'i' yujil bʌ c'ux, yic'ot jini mate'el mut, yic'ot bʌte'el. Tsa cʌq'ueyob i p'ʌtʌlel ili chʌnchajp cha'an mi' jisañob.

⁴Mi' cajelob ti bʌq'uen pejtel winicob ti pañimil che' mi' q'uelob. Ti' caj i mul Manasés (i yalobil Ezequías) tsa' bʌ i cha'le yumʌl ti Jerusalén, woli cʌc'ob ti chʌmel.

⁵¿Majqui mi caj i p'untañet, Jerusalén? ¿Majqui mi caj i mel i pusic'al che' ch'ijiyemet? ¿Majqui mi caj i ts'ita' xoy i bijlel cha'an mi' tilel i q'uel bajche' a wilal?

⁶Tsa' cʌyʌyon, che'en lac Yum. Woli a chʌn tʌts' a bʌ tic tojlel. Jini cha'an tsac sʌts'ʌ j c'ʌb cha'an mic jisañet. Mach chʌn comix j cuch a mul. Wocol jax mi cubin.

⁷Ch'ijiyemix c pusic'al cha'an tsac jisa c winicob x'ixicob ti' caj i mul. Tsa'ix c chijcayob ya' ti' ti' tejclum. Ch'ijiyemon cha'an ma'anic tsi' sutq'uiyob i bʌ cha'an mi' cʌyob i bijlel.

⁸Tsac p'ojlesa meba' x'ixicob. Lajalob ti tsic che' bajche' i ji'il colem ñajb. Che' ti xinq'uiñil tsac chilbeyob jini ch'iton bʌ winicob. Tsac bʌc' chocbeyob tilel cabʌl i ch'ijiyemlel i pusic'al. Tsa' toj sajtiyob i pusic'al ti bʌq'uen.

⁹Meba'ix jini x'ixic tsa' bʌ i cʌnta wuctiquil i yalobilob. Laj chʌmeñobix. C'unix pañimil. Ma'anix tijicña bʌ. Bʌjlemix q'uin yubil che' xinq'uiñil to. Ts'a'lebilix, wolix ti quisin, come ma'anix i yalobil. Mi caj cʌc' i colojbal winicob ti' wenta i contrajob cha'an mi' chʌmelob ti espada, che'en lac Yum.

¹⁰Obol c bʌ, mamá. ¿Chucoch tsa' lon ac'ʌyon ti pañimil? Ts'a' mi' q'ueloñob pejtel winicob ti pejtelel pañimil. Anquese ma'anic tsa cʌc'ʌ c taq'uin ti bet, anquese ma'anic tsaj c'ajti ti bet, mi' laj p'ajoñob.

¹¹Lac Yum tsi' yʌlʌ: Mi caj j cʌybeñet lamital winicob, pero ma'anic jaytiquil mu' bʌ caj i colelob. Jixcu jatet, i colojbalet bʌ, mi caj j coltañet ti' tojlel a contrajob ti' yorajlel wocol che' mi' bʌc' tilel ñuc bʌ wocol, che'en.

¹²Jini tilemo' bʌ ti norte lajalob che' bajche' fierro yic'ot chʌchʌc taq'uin mach bʌ yujilic tojp'el.

¹³Ti' caj a mul mi caj cʌq'ueñob pejtel a taq'uin yic'ot pejtel chubʌ'añʌl c'uxbibil bʌ a cha'an ti pejtelel a lumal.

¹⁴Mi caj cʌq'uet ti to'ol e'tel ti' c'ʌb a contrajob ya' ti ñajt bʌ lum mach bʌ a cʌñʌyic. Cʌlʌx jax c mich'ajel che' bajche' c'ajc mu' bʌ caj ti lejmel ti pejtelel ora, che'en.

¹⁵Laj a wujil, c Yum. Chʌn coltañon. Ac'ʌyob ti toj mulil jini mu' bʌ i tic'lañoñob. Ti' yutslel a pusic'al mach ma' wʌc'on ti cʌjchel majlel. Ña'tan wolic ts'a'lentel cha'an xuc'ulon quic'otet.

¹⁶Tsac taja a t'an. Tsa cotsa tic pusic'al. Tijicñayon cha'an a t'an. Tsa' ñuc'a c pusic'al, come a cha'añon, c Yum, c tatet, I Dioset Panchan yic'ot Pañimil.

¹⁷Ma'anic tsac pi'leyob ti alas jini xq'uiñijelob. Ma'anic tsa' ñuc'a c pusic'al quic'otob. C bajñel jach wʌ' chumulon cha'an añon ti a c'ʌb. Mich'on cha'an tsi' cʌyʌyetob.

¹⁸¿Chucoch c'ux c pusic'al ti pejtelel ora? ¿Chucoch mach yujilic lajmel c lojwel? ¿Lajal ba mi caj a pʌs a bʌ tic tojlel che' bajche' pa' tiquin bʌ i ya'lel?

¹⁹Jini cha'an lac Yum tsi' yʌlʌ: Sutq'uin a bʌ ba' añon. Che' jini mi caj c cha' coltañet. Mux caj a wa'tʌl tic tojlel. Yajcan chuqui uts'at. Cʌyʌ jini mach bʌ uts'atic. Che' jini i wentajet quej, mux caj a sub c t'an. A pi'ʌlob mi caj i sutq'uiñob i bʌ ba' añet. Pero mach yomic ma' sutq'uin a bʌ ba' añob.

²⁰Lajal mi caj c melet bajche' ts'ajc melbil bʌ ti c'ʌnc'ʌn taq'uin. Mi caj i contrajiñetob, pero mach mʌjlicob i cha'an, come añon a wic'ot cha'an mij coltañet. Mi caj c mʌctañet, che'en lac Yum.

²¹Mi caj c loc'sañet ti' c'ʌb xjontolilob. Mi caj c mʌñet loq'uel ti' wenta xtic'layajob.