Read Chol Jeremias 16 Bible Online

Jeremias 16 - Chol bible

Jeremias 16

¹Tsa' tili i t'an lac Yum ba' añon:

²Mach ma' pʌy a wijñam. Mach wʌ'ic yom ma' tech a walobilob mi ch'iton mi xch'oc.

³Come mux caj i laj chʌmelob jini wʌ' bʌ chumulob ti ili lum, winicob x'ixicob yic'ot i yalobilob tsa' bʌ i q'ueleyob pañimil ilayi, che'en lac Yum.

⁴Mi caj i chʌmelob ti leco bʌ c'amʌjel. Ma'anic majqui mi caj i yuc'tañob. Ma'anic majqui mi caj i mucob. Mi caj i yoc'mʌl i bʌc'tal ti pam lum. Mi caj i jilelob ti machit yic'ot ti wi'ñal. Jini te'lemut ti pañimil yic'ot bʌte'el am bʌ ti jamil mi caj i c'uxob.

⁵Tsi' yʌlʌ lac Yum: Mach ma' wochel ti otot ba'an ch'ujlelʌl. Mach ma' wuc'tan, mach a ñʌch'tesʌbeñob i pusic'al i pi'ʌlob, come mach chʌn utsix mij q'uelob. Ma'anix mi caj c p'untañob. Ma'anic mi caj j coltañob, che'en lac Yum.

⁶Mi caj i laj chʌmelob ti ili lum jini ñuco' bʌ yic'ot jini ch'o'ch'oco' bʌ. Ma'anic mi caj i mujquelob. Ma'anic majqui mi caj i yuc'tañob. Ma'anic majqui mi caj i tsep i bʌ. Mach muq'uic i set' i jol cha'an ch'ijiyem.

⁷Ma'anic majqui mi caj i chocbeñob caxlan waj jini woliyo' bʌ ti uq'uel. Ma'anic majqui mi caj i yʌq'ueñob i jap vino cha'an mi' ñʌjch'el i pusic'al meba'ob cha'an chʌmenix i tat i ña'.

⁸Mach ma' wochel ti' yotot xq'uiñijelob. Mach a cha'len we'el uch'el yic'otob.

⁹Come i Yum Panchan yic'ot Pañimil, i Dios Israel, tsi' yʌlʌ: Q'uele mux caj c sʌc jisan winicob x'ixicob, jini tijicñayo' bʌ yic'ot jini woliyo' bʌ ti alas, yic'ot jini woliyo' bʌ ti ñujpuñijel.

¹⁰Che' ma' subeñob pejtel iliyi mi caj i yʌlob: “¿Chucoch tsi' ña'ta i jisañon lojon lac Yum? ¿Chuqui c mul lojon? ¿Chuqui tsac tumbe lojon c Yum Dios?” che'ob.

¹¹Che' jini mi caj a subeñob: “Lac Yum woli' yʌl: Tsi' cʌyʌyoñob la' tat. Tsi' ñopbeyob i diosob jini ñajt bʌ chumulob mach bʌ la' cʌñʌyic. Tsi' yumayob. Tsi' ch'ujutesayob. Tsi' cʌyʌyoñob. Ma'anic tsi' jac'beyoñob j cʌntesʌbal.

¹²Lajaletla bajche' la' tat. Cʌlʌx jax tsa' la' cha'le mulil. Ti pejteletla woli la' mel bajche' jach la' wom cha'an jontol la' pusic'al. Tsʌts la' pusic'al. Mach la' womic la' jac' che' mic pejcañetla.

¹³Jini cha'an mi caj c choquetla loq'uel ti ili lum cha'an mi la' majlel ti yambʌ lum mach bʌ cʌmbilic i cha'an la' tatob, mach bʌ la' cʌñʌyic ja'el. Ya' mi caj la' ch'ujutesan yan tac bʌ dios ti q'uiñil yic'ot ti ac'ʌlel, pero mach muq'uic i wis coltañetla.

¹⁴Jini cha'an, yom mi la' wotsan ti la' pusic'al ili t'an: Tal jini q'uin che' ma'anix mi caj i chʌn alob: Cuxul lac Yum tsa' bʌ i pʌyʌ loq'uel ti Egipto israelob.

¹⁵Pero mi caj i yʌlob: Cuxul lac Yum tsa' bʌ i pʌyʌ loq'uel israelob ti norte yic'ot ti pejtelel lum baqui tsa' wejts'iyob majlel”. Che'ʌch mi caj a subeñob, che'en lac Yum. Come joñon mi caj c cha' pʌyob tilel ti' lumal, ti jini jach bʌ lum tsa' bʌ cʌq'ueyob i tatob.

¹⁶Awilan mi caj c choc tilel la' contrajob, che'en lac Yum. Mi caj i chucob winicob che' bajche' mi la' chuc chʌy. Mi caj i pam sʌclañob che' bajche' mi la' sʌclan me' ti wits yic'ot ti bujtʌl yic'ot ti xajlelol. Mi caj i tajob baqui jach woli' mujcuñob i bʌ.

¹⁷Come q'uelel c cha'an ba' tsa' puts'iyob. Mach muculobic tic wut. Mach muculic i jontolil ja'el.

¹⁸Cha'yajl mi caj i tojob i mul cha'an tsi' bib'esayob c lum. Ya' ba' com chumtʌl tsi' p'ojlesayob i diosob. Leco mij q'uel i diosob che' bajche' ch'ujlelʌl ts'a'lebil bʌ c cha'an, che'en lac Yum.

¹⁹C Yum, ma'anic c bajñel p'ʌtʌlel. An jach c p'ʌtʌlel ti jatet. I wentajet ts'ajquibil bʌ otot tic joytʌlel. C puts'ibet ti' yorajlel wocol. Mi caj i tilelob ba' añet winicob ti jujunwejl pañimil. Mi caj i yʌlob: Tsi' ñopoyob lot c tat lojon. Tsi' lon tsajcayob jini mach bʌ isujmic, mach bʌ anic i c'ʌjñibal. Che' mi caj i yʌlob.

²⁰¿Chucoch mi' lon melob i diosob mach bʌ Diosic? Jini mero Dios mach i melbalic winicob.

²¹Jini cha'an mi caj c junyajlel pʌsbeñob c p'ʌtʌlel cha'an mi' cʌñoñob, cha'an mi' ña'tañob Yumʌlon, che'en lac Yum.