Read Chol Jeremias 2 Bible Online

Jeremias 2 - Chol bible

Jeremias 2

¹Tsa' tili i t'an lac Yum tic tojlel:

²Cucu subeñob c t'an jini winicob ti Jerusalén: “C'ajal to c cha'an bajche' añet che' ch'o'ch'oquet. Wen bʌxet tic tojlel. Wen cabʌl a c'uxbiya che' bajche' ti' yorajlel ñujpuñijel. Tsa' wen tsajcayon ti colem tiquin lum ba' ma'anic pʌc'ʌbʌl.

³Che' jini ch'ujulob israelob tic wut che' bajche' jini ñaxan bʌ i wut pac'. Pejtel tsa' bʌ i jisayob c winicob tsi' tojoyob i mul. Tsa' tili ñuc bʌ wocol ti' tojlelob”, che'en lac Yum.

⁴Ubinla i t'an lac Yum pejteletla i cha'añet bʌ la Jacob yic'ot pejteletla añet bʌ la ti Israel.

⁵Woli' yʌl lac Yum: ¿Chuqui c mul ti' tojlel la' tat? ¿Chucoch tsi' cʌyʌyoñob? Tsi' lon c'uxbiyob jini mach bʌ anic i c'ʌjñibal. Tsa' sojquiyob i ña'tʌbal.

⁶Ma'anic mi juntiquilic mu' bʌ i ña'tañon. Ma'anic majqui mi' yʌl: “¿Baqui an lac Yum tsa' bʌ i pʌyʌyonla loq'uel ti' lumal egiptojob? Tsi' toj'esayonla ñumel ba' jochol lum ba'an wits yic'ot ch'en ya' ba' wen pim i yi'ic'lel pañimil, ba' ma'anic xchumtʌl”. Ma'anic majqui mi' ña'tañon, mi juntiquilic.

⁷Pero joñon tsac pʌyʌyetla tilel ti jini wen bʌ lum ba' wen yujil colel pʌc'ʌbʌl cha'an on mi cʌq'ueñet la' c'ux i wut te' yic'ot yambʌ c'uxbil bʌ. Che' bʌ tsa' ochiyetla, tsa' la' bibesa jini lum. Tsa' la' wʌc'ʌ ti ts'a'lentel jini c lum.

⁸Jini motomajob ja'el ma'anic woli' yʌlob: “¿Baqui an lac Yum?” Jini yujilo' bʌ mandar mach i cʌñʌyoñobix. Jini año' bʌ i ye'tel wolix i contrajiñoñob. Jini subt'añob woli' subob ti ñuc jini Baal. Woli' tsajcañob jini lolom jach bʌ.

⁹Yomix mi la' mel la' bʌ quic'ot, che'en lac Yum. Ti wocol t'an mi caj c chʌn pejcañetla yic'ot la' walobilob yic'ot la' butsob.

¹⁰Cucuxla ti junwejl ja' ya' ba'an i lum Quitim joyol bʌ ti ja'. Chocola majlel winicob ti Cedar cha'an mi la' wen q'uel bajche' woli' melob. Sʌclanla ti yan tac bʌ lum.

¹¹¿Am ba jump'ejl lum ba' tsi' q'uexeyob i diosob? Anquese mach diosobic, pero mi' chʌn c'uxbiñob. Jatet jach la tsa' la' q'uexta la' Dios ba' tilem la' ñuclel cha'an mi la' c'uxbin jini mach bʌ diosic.

¹²Cha'lenla bʌq'uen añet bʌ la ti chan. Cha'lenla mich'. La' toj sajtic la' pusic'al ti bʌq'uen. Mele la' pusic'al.

¹³Come cha'chajp i mul c winicob x'ixicob. Tsi' cʌyʌyoñob, anquese joñon Cuxul bʌ Ja'on. Tsi' wersa t'oboyob xajlel cha'an mi' yajñel i ya'al. Tsi' sajcayob ja' ba' bajñel yomob i pusic'al. Mu' jach i jilel i ya'al cha'an tocolix i yajñib.

¹⁴¿Mach ba calobilic Israel? ¿Chucoch tsa' sujti ti to'ol jach bʌ x'e'tel ti yambʌ i yum? Tsa' cʌjchi majlel.

¹⁵Woli' mʌjlel i cha'an año' bʌ ti ñajtʌl. Mi' pam tsictiyel i t'añob che' bajche' bajlum. Tsi' yʌc'ʌyob ti pujch'el i lum Israel. Tsi' yʌc'ʌyob ti bujchel jini tejclum tac. Laj majlemobix i yumob otot. Ma'anix majqui an.

¹⁶Jini ch'oyolo' bʌ ti Menfis yic'ot ti Tafnes am bʌ ti Egipto tsi' chilbeyet a yumʌntel.

¹⁷¿Mach ba cha'anic a mul tsa' tili ili wocol? Tsa' cʌyʌ a Yum Dios che' bʌ tsi' wen pʌsbeyet jini wen bʌ bij.

¹⁸¿Chucoch wola' xʌn majlel i bijlel Egipto cha'an ma' taj a coltʌntel ya' ba'an jini ñoj ja' Nilo? ¿Chucoch wola' xʌn majlel i bijlel Asiria cha'an ma' taj a coltʌntel ya' ba'an jini ñoj ja' Eufrates?

¹⁹Jini a jontolil mi caj i yʌq'uet ti quisin che' mi' cajel ti t'an a pusic'al. Mi caj c jultesʌbeñet a pusic'al cha'an tsa' cʌyʌyon. Yomix ma' ña'tan quisintic jax a jontolil cha'an tsa'ix a cʌyʌyon. Tsa' cʌyʌ a Yum Dios. Ma'anix ma' bʌc'ñañon, che'en i Dios Panchan yic'ot Pañimil, jiñʌch lac Yum.

²⁰Ñʌmʌlet ti jontolil ti oñiyi c'ʌlʌl wʌle. Tsa' la' choco jubel a tajbal yic'ot a cuch tsa' bʌ cʌq'ueyetla. Tsa' la' wʌlʌ: “Mach comic c mel che' bajche' ma' wʌl”, che'et. Pero ti pejtelel jini chan bʌ bujtʌl yic'ot ti' yʌxñʌlel te' tsa' choco a bʌ che' bajche' sts'i'lel bʌ x'ixic.

²¹¿Chucoch? ¿Mach ba xuc'ulonic? Tsac yajca wen uts'at bʌ i ña'al ac' cha'an mic pʌq'uet. ¿Chucoch leco tsa' loq'ui i buts? Tsa' sujtiyet ti yambʌ ac' mach bʌ j cʌñʌyic. Mach c pʌc'baletic yilal.

²²Mi tsa' poco a bʌ yic'ot tan yic'ot sijonte', mach loq'uic a jontolil. Ya'to an ti' tojel c wut, che'en lac Yum Dios.

²³Ma' wʌl: “Ma'anic tsac sʌcla Baal dios”, lon che'et. ¿Chucoch woliyet ti lot? Q'uele chuqui tsa' mele ti joctʌl. Wen ña'tan a mul. Lajalet bajche' xch'oc camello. Mach yujilic ñʌjch'el che' woli' c'ajtin i tat.

²⁴Lajalet bajche' xch'oc burro mach bʌ anic i yum. Mi' sic' jini ic' che' woli' c'ajtin i tat. Mi' ñajti majlel i sʌclan. Ma'anic mi' jac' cʌjchel. Tijicña pejtel jini tat burro mu' bʌ i yajñesan, come mi caj i taj che' i yorajlelix.

²⁵Tsajaletme ame i tajet wocol. Come mux caj a wubin wocol che' pits'il a woc, che' tiquin a ti'. Pero wola' wʌl: “Lolom jach ma' tic'on. Wersa com c chʌn mel che' bajche' mi' melob jini parte bʌ i t'añob, come c'ux mi cubiñob”, che'et.

²⁶Jini yujil bʌ xujch' mi' cajel ti quisin che' cʌmbilix i mul. Che' ja'el mi' cajelob ti quisin i yalobilob Israel. Ti pejtelob yic'ot i reyob yic'ot motomajob yic'ot x'alt'añob

²⁷mi' pejcañob te': “C tatet lojon”, che'ob. Mi' pejcañob xajlel: “C ña'et lojon. Tsa' wʌc'ʌyon lojon ti pañimil”, lon che'ob. Pero ma'anic mi' sʌclañoñob. Mi' mʌyob i wut tic tojlel. Che' ti' yorajlel i wocol mi' cajelob ti oñel: “Ch'ojyen, coltañon lojon”, che' mi caj i yʌlob.

²⁸Sʌclan a diosob tsa' bʌ a mele. ¿Baqui añob che' ti' yorajlel a wocol? La' ch'ojyicob che' woliyet ti wocol, mi yujilob coltaya. Tsiqui a diosob, Judá. Wen cabʌlob ti tsic che' bajche' a tejclumob.

²⁹¿Chucoch wola' wʌ'leñon cha'an a wocol? Junlajaletla, tsa' la' ñusʌbeyon c t'an, che'en lac Yum.

³⁰Tsa cʌc'ʌyob ti wocol la' walobilob, pero ma'anic tsa' la' mele la' pusic'al. Mach la' womic la' cʌy chuqui mi la' bajñel ña'tan ti la' pusic'al. Jontoletla che' bajche' bajlum. La' cha'añʌch jini espada tac tsa' bʌ la' c'ʌñʌ la' tsʌnsan jini x'alt'añob tsa' bʌ c chocbeyetla tilel.

³¹Jatetla cuxulet bʌ la wʌle, ¿mach ba la' womic la' jac'ben i t'an la' Yum? Ts'a' mi la' q'uelon che' bajche' tiquin lum. Lajal mi la' q'uelon che' bajche' ic'ch'ipan bʌ pañimil. Anquese mach che'ic añon mi la' wʌl: “Com lojon ñajt bʌ xʌmbal baqui jach yom c pusic'al. Mach chʌn talonix lojon ba' añet”, che'etla. ¿Chucoch che' mi' yʌl c tejclum bajche' jini?

³²Jini c'ajtibil bʌ xch'oc, ¿mach ba c'ajalic i cha'an i ch'ʌjlil mu' bʌ caj i lʌp ti ñujpuñijel? Pero cabʌlix q'uin chʌn ñajʌyemon i cha'an c winicob x'ixicob.

³³Ma' wen ch'ʌl a bʌ cha'an ma' q'uejlel ti uts'at, cha'an a wom a c'uxbintel. Wen a wujil ts'i'lel. Mi mejlel a cʌntesan ti jontolil jini sts'i'lel bʌ x'ixic.

³⁴An a mul ja'el ti' tojlel jini mach bʌ añobic i chubʌ'an. Tsa'ix pʌjq'ui a majts ti' ch'ich'el jini mach bʌ anic i mul mach bʌ anic chuqui tsi' xujch'ibeyet.

³⁵Pero wola' chʌn al: “Uts'at añon. Mach talic i mich'ajel Dios tic tojlel”, lon che'et. Awilan mi caj c pʌyet ti meloñel cha'an tsa' wʌlʌ ma'anic a mul.

³⁶¿Chucoch ma' ñajtʌ ñumel ti xʌmbal ba' jaxʌl a lum cha'an ma' sʌclan a coltʌntel ti' tojlel jini mach bʌ a cʌñʌyic? Ma' cajel ti quisin cha'an tsa' ña'ta a taj a coltʌntel ti Egipto, che' bajche' tsa' cha'le quisin cha'an Asiria.

³⁷Mi caj a tʌts' a bʌ ti' tojlelob che' bajche' xch'oc woli bʌ i mel i pusic'al che' leco tsa' tic'lʌnti. Ts'a'lebilob ti lac Yum jini winicob ba' wola' lon c'ajtin a coltʌntel. Mach muq'uic i coltañet.