Read Chol Jeremias 22 Bible Online

Jeremias 22 - Chol bible

Jeremias 22

¹Lac Yum woli' subeñon: Cucu ti' yotot jini rey ti Judá. Suben ili t'an:

²“Ubin i t'an lac Yum, reyet bʌ ti Judá, woli bʌ a cha'len yumʌntel ti' buchlib David. La' i yubiñob ja'el pejtel x'e'telob a cha'an yic'ot pejtel winicob x'ixicob mu' bʌ i yochelob ti' ti' tac tejclum.

³Lac Yum woli' yʌl: Cha'lenla meloñel ti toj. La' loq'uicob pejtel woliyo' bʌ ti wocol ti' c'ʌb xtic'layajob. Mach la' contrajin jini meba'ob yic'ot jini ñajt bʌ ch'oyolob. Mach la' to'ol ñusañob che' yomob i coltʌntel. Mach la' tsʌnsan jini mach bʌ añobic i mul.

⁴Mi xuc'ul mi la' mel che' bajche' wolic subeñetla, mi' cajelob ti ochel ti rey i p'olbalob David wʌ' ti' buchlib David ti ili otot. C'ʌchʌlob mi caj i cha'leñob xʌmbal. C'ʌchʌlob ja'el jini x'e'telob i cha'añob yic'ot pejtel mu' bʌ i yumañob.

⁵Pero mi mach la' womic la' jac'beñon c t'an, mi caj i junyajlel jejmel jubel ili otot. P'ulul mi caj i cʌytʌl. Tsa'ix c wa'choco c t'an. Joñon mi caj c ts'ʌctesan, che'en lac Yum”.

⁶Subeñob ja'el jini año' bʌ ti Judá: “Lac Yum woli' yʌl: I t'ojol jax mij q'uel i yotot jini rey David che' bajche' jini te'el am bʌ ti Galaad yic'ot ti Líbano. Pero mi caj c sutq'uin ti jochol bʌ lum. Ch'ijiyem mi caj la' cʌytʌl che' ma'anix la' yum.

⁷Mi caj cʌq'ueñob e'tijibʌl jini yujilo' bʌ jisaya mu' bʌ caj i tilelob i jem. Mi caj i sec'ob jubel jini yajcʌbil bʌ ch'ujte'. Mi caj i chocob ochel ti c'ajc.

⁸Cabʌl tejclum tac ñajt bʌ ch'oyolob mi caj i ñumelob ti' t'ejl ili tejclum. Mi caj i yʌlob: ¿Chucoch tsi' yʌc'ʌ ti jilel ili ñuc bʌ tejclum lac Yum? che'ob.

⁹Mi caj i jac'ob: Cha'an tsi' jemeyob jini xuc'ul bʌ t'an. Tsi' cʌyʌyob i Dios. Tsi' ch'ujutesayob yambʌ dios tac, mach bʌ mero Diosic. Tsi' c'uxbiyob, che'ob”. Che'ʌch yom ma' subeñob, che'en lac Yum.

¹⁰Mach yomic mi la' wuc'tan jini chʌmeño' bʌ. Mach la' p'untañob. Cha'lenla uq'uel cha'an majlemob ti ñajt bʌ lum jini cuxulo' bʌ, come ma'anix mi caj i chʌn sujtelob i q'uel i lumal ti pejtelel ora.

¹¹Lac Yum woli' yʌl: Mach chʌn talix Salum i yalobil Josías rey bʌ ti Judá. Wʌ' tsi' cha'le yumʌl ti' buchlib i tat ti jini jach bʌ otot jinto tsa' cʌjchi majlel. Mach chʌn sujtix ilayi ti pejtelel ora.

¹²Mi caj i chʌmel ya' ti ñajt bʌ lum ba' tsa' cʌjchi majlel. Ma'anix mi caj i chʌn q'uel i lumal.

¹³Obol i bʌ jini mu' bʌ i ñuq'uesan i yotot cha'an i xujch', jini mach bʌ tojic mi' mel ti' tojlel i pi'ʌlob. Mi' wersa c'ajtin taq'uin ñumen bajche' yom. Mi' c'ʌmben i ye'tel yambʌ, pero ma'anic mi' toj.

¹⁴Mi yʌl: “Uts'atax mi caj c mel cotot yic'ot cabʌl tsalʌl yic'ot corredor”, che'en. Mi' yotsan ventana tac. Mi' yʌq'uen i cha'lajmlel i bojte'lel ti wen fino bʌ ch'ujte'. I t'ojol jax mi' bon.

¹⁵¿Mu' ba a lon ña'tan ñuquet cha'an ñuc a wotot? ¿Mach ba ñuquic a tat? Tsi' cha'le chuqui uts'at a tat. Toj tsi' mele ti' tojlel i pi'ʌlob. Jini cha'an tsa' jal'a i yumʌntel. Dios tsi' colta, come tsi' colta i pi'ʌlob.

¹⁶A tat tsi' colta jini mach bʌ anic i chubʌ'an. Tsi' colta jini woli bʌ ti wocol. Jini cha'an uts'at tsi' taja i coltʌntel ti Dios. Jini mach bʌ che'ic mi' mel ma'anic mi' cʌñon. Mach j cʌñʌyic ja'el, che'en lac Yum.

¹⁷Pero mach lajaletic bajche' a tat. Pejtel chuqui tac ma' q'uel yic'ot pejtel chuqui tac ma' mulan ma' wersa ch'ʌm, anquese mach tojic bajche' ma' taj. Ma' wʌc' ti chʌmel jini mach bʌ anic i mul. Ma' tic'lan a pi'ʌlob. Ma' chilbeñob i chubʌ'an.

¹⁸Jini cha'an lac Yum tsi' yʌlʌ: Ma'anic majqui mi caj i yuc'tan Joacim (i yalobil Josías) rey bʌ ti Judá. Ma'anic mi caj i yuc'tañob i yijts'iñob mi i pi'ʌlob, mi i winicob, mi yaño' bʌ mu' bʌ i yumañob.

¹⁹Mi caj i mujquel che' bajche' burro. Mi caj i tujc'ʌntel majlel ti calle cha'an mi' chojquel loq'uel ti' ti' Jerusalén.

²⁰Cha'len uq'uel come ma'anix a waj coltayajob. Tsa'ix sujtiyob ti a contra. Sʌclañob ñumel ya' ti Líbano yic'ot ti Basán yic'ot ti pejtelel xchumtʌl tac ti wits, come jisʌbilobix pejtel tejclum tac c'uxbibil bʌ a cha'an ba' tsa' ñopo a taj a coltʌntel.

²¹Che' wen chumulet, che' wen cabʌl a chubʌ'an, tsac subeyet tsajaletme. Tsa' wʌlʌ: “La' ajnicon”, che'et. A tilel che'ʌch ma' mel c'ʌlʌl che' ch'itoñet to. Mach a womic a ñich'tañon.

²²Wʌle bʌc' majlemobix pejtel a waj q'ueloñelob che' bajche' i yopol te' mu' bʌ i wejlan ic'. Mi caj i cʌjchelob majlel a pi'ʌlob c'uxbibilo' bʌ a cha'an. Che' jini mi caj i toj sajtel a pusic'al ti quisin cha'an pejtel a jontolil.

²³Tijicñayet ya' ba' chumulet. Joyolet ti ch'ujte' ch'oyol bʌ ti Líbano. Pero mux caj a cha'len bajq'uel che' bajche' x'ixic mu' bʌ i yʌc' ti pañimil i yalobil. Cabʌl mi caj a wubin wocol yic'ot ch'ijiyem bʌ a pusic'al.

²⁴Mi caj c choc loq'uel Conías (i yalobil Josías). Mi caj i ts'ʌctiyel che' bajche' tsa cʌlʌ come cuxulon. Anquese c'uxbibil che' bajche' c mʌtc'ʌb ba' ts'ijbubil j c'aba', anquese mi lʌpʌl c cha'an ti ñoj bʌ j c'ʌb, mach c'uxic mi caj cubin.

²⁵Mi caj cʌq'uet ti' wenta a contrajob mu' bʌ a bʌc'ñan, ti' wenta Nabucodonosor, jini rey ti Babilonia, yic'ot i soldadojob cabʌl bʌ i p'ʌtʌlel.

²⁶Mi caj c wersa choquet majlel ti yambʌ lum yic'ot a ña' tsa' bʌ i yʌc'ʌyet ti pañimil. Ya' mi caj la' chʌmel.

²⁷Mi caj la' ña'tan sujtel ti la' lumal che' wen ch'ijiyem la' pusic'al, pero ma'anix mi caj la chʌn sujtel.

²⁸¿Bajche' yilal Conías? Che'ʌch yilal bajche' junxejt' p'ejt. ¿Mach ba anic majqui mi' chʌn c'uxbin? ¿Chucoch tsʌts chocbilix ti yambʌ lum mach bʌ i cʌñʌyic?

²⁹Ubinla c t'an pejtel wʌ' bʌ añetla ti ili lum. La' i yubin pejtel pañimil.

³⁰Otsan ti jun chuqui tsi' yʌlʌ lac Yum cha'an ma'anic i yalobil ili winic. Come ti pejtelel i yalobilob ma'anic mi juntiquilic mu' bʌ caj i cha'len yumʌl ti' buchlib David. Ma'anic i yalobil mu' bʌ caj i yumʌntel ti Judá, che'en lac Yum.