Read Chol Jeremias 24 Bible Online

Jeremias 24 - Chol bible

Jeremias 24

¹Che' lu' majlemobix, lac Yum tsi' pʌsbeyon cha'p'ejl chiquib ya' c'ʌcʌl ti' tojel i Templo lac Yum, but'ul bʌ ti higo. Nabucodonosor, jini rey ti Babilonia, tsi' cʌchʌ majlel Jeconías rey bʌ ti Judá (i yalobil Joacim), yic'ot jini ñuc bʌ yumʌlob, yic'ot jini wen yujilo' bʌ e'tel ti pʌchi yic'ot ti puy yic'ot ti tsucu taq'uin. Tsi' pʌyʌyob majlel ti Babilonia.

²Uts'at jini higo tac ti jump'ejl chiquib, che' bajche' jini cojax to bʌ mi' c'ʌñ'an. Oc'benix jini higo tac ti yambʌ chiquib. Mach c'uxbilic cha'an leco.

³Lac Yum tsi' subeyon: ¿Chuqui wola' q'uel Jeremías? che'en. Tsac sube: Cabʌl higo. Lamital uts'atax. Lamital oc'benix, mach c'uxbilic, cho'on.

⁴Tsa' tili i t'an lac Yum ba' añon.

⁵Tsi' subeyon lac Yum, i Dios Israel: Che' bajche' jini uts'at bʌ higo, che'ʌch yilalob tic wut jini winicob tsa' bʌ cʌc'ʌ ti cʌjchel majlel ti ñajtʌl ti' lumal Babilonia.

⁶Uts'at mi caj j q'uelob. Mi caj j coltañob. Mi caj c cha' pʌyob tilel ti chumtʌl ti ili lum. Mi caj c cha' aq'ueñob i yumʌntel. Ma'anix mi caj c chʌn jemob. Mi caj c pʌc'ob. Ma'anix mi caj c chʌn bocob.

⁷Mi caj cʌq'ueñob wen bʌ i pusic'al cha'an mi' cʌñoñob cha'an i Yumon. Mi caj i sujtelob tic cha'an bʌ. Mi caj i pejcañoñob ti' Dios. Mi caj i sutq'uiñob i bʌ cha'an mi' ñopoñob ti pejtelel i pusic'al.

⁸Jini oc'benix bʌ higo ma'anix i c'ʌjñibal. Che'ʌch yilal jini Sedequías rey bʌ ti Judá, yic'ot ñuco' bʌ i ye'tel año' bʌ ti' wenta, yic'ot pejtelob tsa' bʌ cʌleyob ti Jerusalén yic'ot ti ili lum yic'ot ti Egipto.

⁹Mi caj cʌc'ob ti pam pujquel ti pejtelel pañimil ba' ma'anic i lum. Ts'a' mi caj i q'uejlelob. Mi caj i chojquelob loq'uel ti jujump'ejl lum. Mi caj i yubiñob wocol yic'ot wajlentel. Mi caj i tic'lʌntelob. Mi caj i p'ajtʌlob baqui jach mic pucob.

¹⁰Mi caj c jisañob ti espada yic'ot ti wi'ñal yic'ot ti c'amʌjel jinto che' jocholix mi' cʌytʌl i lumal tsa' bʌ cʌq'ueyob i tatob, che'en.