Read Chol Jeremias 27 Bible Online

Jeremias 27 - Chol bible

Jeremias 27

¹Che' ti' cajibal i yumʌntel Sedequías (i yalobil Josías) rey bʌ ti Judá, tsa' tili i t'an lac Yum ba'an Jeremías:

²Melben a bʌ yugo che' bajche' mi' cuch tat wacax. Ac'ʌ ti' pat a bic'.

³Chocbeñob majlel t'an jini rey ti Moab, yic'ot i rey amoñob, yic'ot jini rey ti Tiro, yic'ot jini rey ti Sidón. Talob ti Jerusalén suboñelob año' bʌ ti' wenta ili yumʌlob cha'an mi' pejcañob Sedequías rey bʌ ti Judá.

⁴Subeñob cha'an mi' majlelob ba'an i yumob cha'an mi' subeñob: “Tsi' yʌlʌ i Yum Panchan yic'ot Pañimil, i Dios Israel:

⁵Joñon tsac mele pañimil. Tsac mele pejtel winicob ti pañimil yic'ot bʌte'el. Lu' c melbalʌch cha'an cabʌl c p'ʌtʌlel. Mi cʌq'uen i p'ʌtʌlel majqui jach com.

⁶Wʌle tsa'ix cʌc'ʌ pejtel ili lum tac ti' c'ʌb c winic Nabucodonosor rey ti Babilonia. Tsa cʌq'ue ja'el pejtel alʌc'ʌl yic'ot bʌte'el. I cha'añʌch.

⁷Pejtel winicob ti pejtelel lum mi caj i yumañob jini rey yic'ot i yalobil yic'ot i buts jinto che' i yorajlelix i wocol ya' ti Babilonia, come talob ñuc bʌ reyob cha'an mi' t'uchtañob.

⁸Wʌle mi an jump'ejl tejclum mach bʌ yomic i yuman Nabucodonosor rey bʌ ti Babilonia, mi mach yomic i ch'ʌm i yugo cha'an mi' melben i ye'tel jini rey ti Babilonia, mi caj cʌq'uen i toj i mul ili tejclum. Mi caj i chʌmel ti espada yic'ot ti wi'ñal yic'ot ti c'amʌjel. Mi caj cʌq'uen i ye'tel jini rey ti Babilonia cha'an mi' jisan, che'en lac Yum.

⁹Jini cha'an mach yomic mi la' ñich'tan jini x'alt'añob la' cha'an yic'ot año' bʌ i ña'tʌbal cha'an mucul tac bʌ, yic'ot xñajalob yic'ot xpejca cruzob yic'ot xwujtob año' bʌ ti la' tojlel. Ti pejtelelob mi' yʌlob mach yomic mi la' yuman i rey Babilonia.

¹⁰Pero lot jach chuqui woli' subeñetla. Jini cha'an mi caj la' chojquel loq'uel ti la' lum. Joñon mi caj c choquetla loq'uel, che'en lac Yum.

¹¹Pero pejtel tejclum mu' bʌ i yuman jini rey ti Babilonia, mi tsi' yʌc'ʌ i bʌ cha'an cuchijel, mi caj i chʌn chumtʌl ti' lumal cha'an mi' chʌn q'uel i lum”. Che'ʌch tsac subeyob che' bajche' tsi' yʌlʌ lac Yum.

¹²Tsac sube ja'el Sedequías rey bʌ ti Judá: Yom ma' yuman jini rey ti Babilonia. Ch'ʌmben i yugo cha'an ma' melben i ye'tel mi a wom cuxtʌyel.

¹³¿Chucoch a wom a wʌc' a bʌ ti chʌmel yic'ot a pi'ʌlob, ti espada yic'ot ti wi'ñal yic'ot ti c'amʌjel? Come ti jujump'ejl tejclum mi' cajelob ti jilel jini mach bʌ anic mi' yumañob jini rey ti Babilonia.

¹⁴Mach yomic ma' ñich'tʌben i t'an jini x'alt'añob. Woliyob ti lot che' mi' yʌlob mach yomic ma' yuman jini rey ti Babilonia.

¹⁵Lac Yum tsi' yʌlʌ: “Ma'anic tsac choco tilel ili x'alt'añob, pero mi' cha'leñob lot tij c'aba'. Jini cha'an mi caj c choquet loq'uel. Mi caj a chʌmel a wic'ot jini x'alt'añob woli bʌ i cha'leñob lot”. Che'ʌch tsi' yʌlʌ lac Yum, cho'on tsac sube Sedequías.

¹⁶Tsac subeyob ja'el jini motomajob yic'ot yaño' bʌ: Lac Yum woli' yʌl: “Mach yomic mi la' ñich'tʌbeñob i t'an jini x'alt'añob la' cha'an mu' bʌ i yʌlob: La' wila to jini ch'oyolo' bʌ ti Babilonia, mi caj i cha' sutq'uiñob jini latu tac tsa' bʌ i ch'ʌmʌyob loq'uel ti' yotot lac Yum, che'ob. I lot jach.

¹⁷Mach yomic mi la' ñopbeñob i t'an. Yom mi la' yuman jini rey ti Babilonia cha'an mi la' cuxtʌyel. ¿Chucoch mi la' lon ac' ti jisʌntel ili tejclum?

¹⁸Mi isujm bajche' woli' yʌlob ili x'alt'añob, mi ch'oyol ti Dios i t'an, la' i c'ajtibeñob i Yum Panchan yic'ot Pañimil cha'an ma'anic mi' cha' tilelob jini ch'oyolo' bʌ ti Babilonia mu' bʌ caj i xujch'iñob majlel ili latu tac anto bʌ ti Templo yic'ot ti' yotot Sedequías wʌ' ti Jerusalén.

¹⁹Come i Yum Panchan yic'ot Pañimil woli' yʌl: Jini oy tac yic'ot i yajñib ja' yic'ot i t'uchlib tac yic'ot pejtel jini latu tac tsa' bʌ cʌle ti ili tejclum mi caj i lu' ch'ʌjmel majlel.

²⁰Come ma'anic tsi' lu' ch'ʌmʌ majlel ti Babilonia jini rey Nabucodonosor che' ti ñaxan che' cʌchʌl tsi' pʌyʌ majlel Jeconías (i yalobil Joacim), rey bʌ ti Judá, yic'ot pejtel año' bʌ i ye'tel ti Judá yic'ot ti Jerusalén”.

²¹I Yum Panchan yic'ot Pañimil, i Dios Israel woli' yʌl: “Pejtel i bʌl tsa' bʌ cʌle ti' yotot lac Yum yic'ot ti' yotot jini rey yic'ot ti Jerusalén

²²mi caj i lu' ch'ʌjmel majlel ti Babilonia. Ya' jach mi caj i cʌytʌl jinto mic cha' ña'tan. Ti jim bʌ q'uin mi caj c cha' sutq'uin wʌ' ti' yajñib”. Che' tsi' yʌlʌ lac Yum, cho'on tsac subeyob.