Read Chol Jeremias 3 Bible Online

Jeremias 3 - Chol bible

Jeremias 3

¹Mi an winic mu' bʌ i choc loq'uel i yijñam, ¿mu' ba caj i cha' pʌy mi tsa' pʌjyi cha'an yambʌ winic? Tic'bilix ti mandar come tic'lʌbilix jini x'ixic. ¿Mach ba bibi'ic ti' wut Dios jini lum ba' mi' melob che' bajche' jini? Pero jatet sts'i'lel x'ixiquet yilal. Cabʌl jini c'uxbibilo' bʌ a cha'an. Jumuc' jach mi' yajñelob a wic'ot, jumuc' jach ma' cha' tilel quic'ot, che'en lac Yum.

²Pam q'uele jini bujtʌl tac. ¿Am ba jump'ejl bujtʌl ba' mach tic'lʌbiletic? Tsa' pijta a pi'ʌlob ti' t'ejl bij che' bajche' mi' mel árabe ti jochol bʌ lum. Tsa' bib'esa jini lum ti a ts'i'lel yic'ot a jontolil.

³Jini cha'an ma'anic ja'al, jamʌl to pañimil. Ma'anic tsac choco tilel jini ñaxan bʌ ja'al. Lajalet bajche' sts'i'lel bʌ x'ixic mach bʌ yomic i cʌy i mul. Mach a wujilic quisin come tsa' wersa tsʌts'esa a pusic'al.

⁴Ujtel to tsa' pejcayon: “C tatet c'ʌlʌl che' xch'ocon to, c'ʌlʌl wʌle c pi'ʌlet.

⁵¿Chucoch mich'et ti pejtelel ora? ¿Cha'an ba c mul? ¿Mach ba yomic ma' to'ol ñusan mulil?” lon che'et. Che'ʌch tsa' cha'le t'an pero cʌlʌx jax ma' tempan a mul. Ma' to'ol ñusan q'uin ti jontolil, che'en lac Yum.

⁶Che' woli to ti yumʌl jini rey Josías, lac Yum tsi' subeyon: ¿Tsa' ba a q'uele bajche' tsi' mele Israel che' bʌ tsi' cʌyʌyon? Tsajni i ch'ujutesan i diosob ti yebal te' tac ti jujump'ejl bujtʌl che' bajche' sts'i'lel x'ixic mu' bʌ i yʌc' i bʌ ti pi'lentel cha'an winicob mach bʌ i ñoxi'alic.

⁷Che' cabʌl i mul Israel, tsac sube: “La', sujten ba' añon”, cho'on. Pero ma'anic tsa' sujti. Ma'anic tsi' jac'ʌ.

⁸Junlajal i jontolil Judá, i chich Israel. Tsi' q'uele i ts'i'lel Israel. Q'uelelix i cha'an che' bʌ tsac choco majlel yic'ot i juñilel divorcio cha'an tsi' cʌyʌyon che' bajche' x'ixic mu' bʌ i cʌy i ñoxi'al. Pero mach yujilic bʌq'uen Judá. Junlajal tsa' caji' mel i ts'i'lel che' bajche' Israel.

⁹Tsa' caji' ch'ujutesan dios tac melbil bʌ ti te' yic'ot ti xajlel. Che' jini tsi' bib'esa jini lum cha'an i ts'i'lel.

¹⁰Che' bʌ tsi' ña'tayon mach ti jump'ejlic i pusic'al tsa' sujti ba' añon, pero tsa' jach i ñopo i lotiñon, che'en lac Yum.

¹¹Lac Yum tsi' subeyon: Cabʌl jax i mul Judá cha'an woli ti lotiya. Ts'ita' jach i mul Israel tsa' bʌ i cʌyʌyon.

¹²Cucu ti' tojel norte ba'an Israel. Suben ili t'an: “Tsa' cʌyʌyon, Israel, pero sujtenix, che'en lac Yum. Mach mich'onic, come wen cujil p'untaya. Lac Yum tsi' yʌlʌ: Mach ti pejtelelic ora mi caj c mich'leñet.

¹³Jini jach yom ma' mel a bʌ quic'ot. Subu a mul cha'an tsa' ñusʌbe i t'an a Yum Dios. Tsa' cha'le ts'i'lel ti' tojel c wut. Tsa' ch'ujutesa dios tac ti' yʌxñʌlel pejtel te' cha'an mach a womic a jac'beñon c t'an.

¹⁴Sujtenla, israelob. Calobiletla anquese tsa' la' cʌyʌyon, i wenta la' ñoxi'alon. Mi caj c pʌyetla loq'uel, juntiquil ti jump'ejl tejclum, cha'tiquil ti jump'ejl otot cha'an mic pʌyetla majlel ti Sion.

¹⁵Mi caj cʌq'ueñetla xcʌnta tiñʌme'ob jump'ejl bʌ i pusic'al quic'ot. Mi caj i we'sañet tic t'an i wenta i bʌl la' ñʌc' cha'an mi la' wen ch'ʌmben isujm yic'ot cha'an mi la' wen cʌñon.

¹⁶Che' cabʌletla ti la' lum, che' ñuquetixla, ma'anix mi caj i chʌn ajlel: Jini Arca ba' lotol jini xuc'ul bʌ t'an i cha'an lac Yum. Mach che'ic. Ma'anix mi caj i chʌn ña'tʌntel. Mach chʌn c'ajalix i cha'añob. Ma'anix mi caj i cha' melob yambʌ Arca.

¹⁷Ti jim bʌ ora mi' caj ti ajlel Jerusalén i buchlib lac Yum. Ya' ti Jerusalén mi caj i tempañob i bʌ ti' c'aba' lac Yum jini ch'oyolo' bʌ ti pejtel tejclum tac. Ma'anix mi caj i chʌn tsajcañob i bajñel pusic'al yujil bʌ jontolil.

¹⁸Ti jim bʌ ora mi caj i tem cha'leñob xʌmbal i yalobilob Judá yic'ot i yalobilob Israel. Loq'uemo' bʌ ti norte mi caj i tem julelob ti jini lum tsa' bʌ cʌq'ueyob i tatob.

¹⁹Tsa cʌlʌ tic pusic'al: Tijicñayon che' mi cʌq'ueñetla la' ñuclel yic'ot calobilob ti jini wen bʌ lum, jini i t'ojol jax bʌ ti' wutob pejtel tejclum tac. Che' jini mi caj la' pejcañon ti uts'at. Ma'anix mi caj la' chʌn xoy la' bijlel cha'an mi la' cʌyon, cho'on tic pusic'al.

²⁰Pero lajal tsa' la' melbeyon che' bajche' x'ixic yujil bʌ lotiya mu' bʌ i cʌy i ñoxi'al. Tsa'ix la' cʌyʌyon, tsa'ix la' wʌc'ʌ la' bʌ cha'an mi la' c'uxbin dios te' tac”, che'en lac Yum Dios.

²¹Mi cubibeñob i t'an i yalobilob Israel ya' ba' ma'anic te'el ti pam wits. Woliyob ti uq'uel. Woliyob ti c'ajtiya. Woli' melob i pusic'al cha'an tsa' sajtiyob ti bij. Tsa'ix ñajʌyi i cha'añob i Yum.

²²“Sujtenla, calobilob, anquese ñajt tsa' la' tʌts'ʌ la' bʌ. Mi caj c lajmesañetla cha'an mi la' tsajcañon”, che'en lac Yum. “Talon lojon, che'ob, come jatet c Yumet lojon, c Dioset lojon.

²³Mach chʌn comix lojon c cha'len ch'ujutesaya ti bujtʌl tac che' bajche' tsac mele lojon che' lotibil lojon c pusic'al. Lolom jach pejtel chuqui tsac mele lojon ti wits tac. Ya' jach ti lac Yum Dios mi caj i taj i coltʌntel Israel.

²⁴Jini dios Baal tsa' jach i yʌc'ʌ ti quisin lac tatob. Tsi' to'ol jisʌbeyob i chubʌ'an che' ch'itoñob to c'ʌlʌl wʌle. Tsi' jisʌbeyob i c'ajbal yic'ot i yʌlac'. Tsi' yʌc'ʌ ti sajtel i yalobilob.

²⁵La' lac pʌcchocon lac bʌ cha'an cabʌl woliyonla ti quisin. Wen wocol añonla, come tsa' laj contraji lac Yum Dios, joñonla yic'ot lac tatob c'ʌlʌl che' ch'itoñon to la c'ʌlʌl wʌle. Ma'anic tsa' lac jac'be i t'an lac Yum Dios”. Che'ʌch woli' comol pejcañob i bʌ, che'en lac Yum.