Read Chol Jeremias 30 Bible Online

Jeremias 30 - Chol bible

Jeremias 30

¹I t'an lac Yum tsa' tili ba'an Jeremías.

²Woli' yʌl lac Yum i Dios Israel: Ts'ijban ti jun pejtel ili t'an tsa' bʌ c subeyet.

³Tal i q'uiñilel tac che' mi caj c cha' pʌy loq'uel c tejclum Israel yic'ot Judá ya' ba' cʌchʌlob. Mi caj c cha' pʌyob tilel ti jini lum tsa' bʌ cʌq'ueyob i tatob. I cha'añobʌch mi caj i sujtel jini lum.

⁴Che'ʌch tsi' yʌlʌ lac Yum cha'an mi caj i coltan Israel yic'ot Judá.

⁵Tsi' yʌlʌ lac Yum: Ubibilix c cha'an i t'an jini tsiltsilñayo' bʌ ti bʌq'uen. Ma'añobic i ñʌch'tʌlel i pusic'al.

⁶C'ajtibeñob jini winicob mi cʌntʌbilob i cha'an alʌl. ¿Chucoch sʌcobix i wut ti bʌq'uen? ¿Chucoch woli' ñet'ob i ya' che' bajche' x'ixic woli bʌ ti bajq'uel?

⁷Obolob i bʌ cha'an tsa'ix tili i q'uiñilel ñuc bʌ wocol. Ti pejtelel ora ma'anic yambʌ che' bajche' jini. I yorajlelix mi' yubin wocol Jacob, pero mux caj i coltʌntel.

⁸Ti jim bʌ ora, che'en lac Yum, mi caj j c'ʌsbeñob jini te' cʌchʌl bʌ ti' bic'. Mi caj cʌc'ob ti colel. Ma'anix mi caj i chʌn yumañob winicob mach bʌ i pi'ʌlobic.

⁹Mi caj i yumañob Dios. Mi caj i yumañob i Rey mu' bʌ caj cʌq'ueñob, loq'uem bʌ ti' p'olbal David.

¹⁰C winic Jacob, mach a cha'len bʌq'uen, che'en lac Yum. Mach a mel a pusic'al, Israel, come ya' ba' pam pujquemet ti ñajtʌl mi caj j coltañet. Mi caj j coltan a walobilob ya' ba' chumulob ti' wenta i yumob. Mi caj i cha' sujtel Jacob. Tijicña mi' caj ti chumtʌl ti' ñʌch'tʌlel i pusic'al. Ma'anix majqui mi caj i chʌn tic'lan.

¹¹Añon quic'otet cha'an mi cʌq'uet ti libre, che'en lac Yum. Mi caj c lu' jisʌbeñob i yumʌntel jini winicob ba' tsac chocoyet ti pujquel, pero ma'anic mi caj c lu' jisañet. Mi caj c ju'sʌbeñet a pusic'al cha'an a mul. Ma'anic mic to'ol ñusan mulil.

¹²Wen tam a lojwel. Mach yujilic lajmel. Wen wocol jax ma' wubin.

¹³Ma'anic majqui mi caj i coltañet che' mic melet. Lolom jach ma' cʌch a bʌ ya' ba' lojwemet, come ma'anic i ts'ʌcal.

¹⁴Jini c'uxbibilo' bʌ a cha'an ma'anix mi' chʌn ña'tañet. Ma'anix mi' sʌclañet. Joñon tsac jats'ʌyet. Tsaj c'ʌñʌ a contra mach bʌ yujilic p'untaya cha'an mi cʌq'uet ti wocol, come cabʌl a mul. Wen jontol jax a pusic'al.

¹⁵¿Chucoch woliyet ti uq'uel cha'an lojwemet? Mach lajmix a wocol, come cabʌl a mul. Wen jontolet. Jini cha'an tsa cʌc'ʌyet ti wocol.

¹⁶Pero mi caj c laj jisan a contrajob mu' bʌ i jisañet. Mi caj i cʌjchelob majlel ti majtan e'tel ti' wenta i yumob. Jini mu' bʌ i tic'lañet mi caj i tic'lʌntelob. Jini mu' bʌ i chilbeñet a chubʌ'an mi caj i chilbentel i chubʌ'an.

¹⁷Mi caj c cha' c'oq'uesañet. Mi caj c lajmesʌbeñet a lojwel, come mi' lon alob chocbilet c cha'an. “Ma'anic majqui mi' p'untan Sion”, lon che'ob, che'en lac Yum.

¹⁸Lac Yum woli' yʌl: Awilan joñon mi caj cʌq'uet ti colel, come joñon mic p'untanet. Mi caj c cha' pʌy tilel Jacob ti chumtʌl. Mi caj i cha' wa'chocontel i yotot tac yic'ot i yotot i rey che' bajche' ti ñaxan.

¹⁹Mi caj i cha'leñob c'ay che' mi' subeñoñob wocolix cʌlʌ. Mi caj i yubintel i t'an jini tse'tse'ñayo' bʌ ti alas. Mi caj c p'ojlesañob. Ma'anic mi caj i c'un jilelob. Mi caj c ñuq'uesañob. Mach ch'o'ch'ocobic mi caj i sujtelob.

²⁰Tijicñayob mi caj i yajñelob che' bajche' i tatob ti wajali. Mi caj i tempañob i bʌ tic tojlel ti jump'ejl i pusic'al. Mi caj cʌc'ob ti wocol pejtel mu' bʌ i tic'lañob.

²¹Jini mu' bʌ i cha'len yumʌl ti' tojlelob, mero i pi'ʌlʌch. Mi caj i colel ti' tojlelob. Mi caj c pʌy tilel tic tojlel. I bajñel mi caj i tilel ba' añon. ¿Am ba yambʌ mu' bʌ mejlel i tilel ba' añon che' ti' bajñel? Ma'anic yambʌ lajal bʌ bajche' jini.

²²Che' jini mi caj la' sujtel tic winicob x'ixicob. Joñon mi caj c sujtel ti la' Dios, che'en lac Yum.

²³Q'uelela jini p'ʌtʌl bʌ ic' chocbil bʌ tilel i cha'an lac Yum. Mi' pʌs i mich'ajel ti ic'. Mi caj i bʌc' tilel i wets' majlel jini jontolo' bʌ.

²⁴Mach lajmix i mich'ajel lac Yum jinto mi' yujtel i mel pejtel chuqui wʌn ña'tʌbil ti' pusic'al. Ti jini cojix bʌ q'uin tac, mux caj la' ch'ʌmben isujm.