Read Chol Jeremias 31 Bible Online

Jeremias 31 - Chol bible

Jeremias 31

¹Ti jim bʌ ora, che'en lac Yum, mi caj c sujtel ti' Dios pejtel c tejclum Israel ti mojt ti mojt.

²Lac Yum woli' yʌl: Ya' ba' pam pujquemob i colojbal c winicob mach bʌ anic tsa' chʌmiyob ti espada, mi caj j cʌntañob che' bajche' tsaj cʌntʌbeyob i tatob ya' ti jochol bʌ lum. Tsac pʌsbeyob i yutslel c pusic'al che' bʌ tsi' sʌclayob ba' mi' c'ajob i yo, che'en.

³Wʌ' ti Sion lac Yum tsa' tsictiyi tic tojlel. Tsi' yʌlʌ: C'uxbibilet c cha'an c'ʌlʌl che' maxto anic pañimil. Mach yujilic jilel j c'uxbiya. Jini cha'an tsac pʌsbeyet i yutslel c pusic'al.

⁴Mi caj c cha' wa'chocoñet, Israel come c cha'añet. Mi caj a q'uejlel ti ñuc che' cha' wa'chocobilix a tejclum. Mi caj a ch'ʌl a bʌ che' bajche' c'ajtibil bʌ xch'oc. Mi caj a loq'uel ti son yic'ot música yic'ot jini tijicñayo' bʌ.

⁵Mi caj a pʌc' ts'usubil ti pam wits ya' ti Samaria. Jini mu' bʌ i cha'leñob pac' mi caj i c'uxob i wut.

⁶Tal jini q'uin che' mi caj i yʌlob xq'uel ts'usubilob ya' ti Efraín: “Conla ti Sion ba'an lac Yum Dios”, che'ob.

⁷Come Lac Yum woli' yʌl: Cha'lenla c'ay come tijicña Jacob. Yom tijicñayetla come ñuc Jacob ti' tojlel pejtel tejclum tac. Subula i ñuclel. Pam pucula. Subula: “Coltʌbilix i winicob lac Yum. Jini tsi' colta i colojbal israelob”. Che'ʌch yom mi la' sub.

⁸Awilan mi caj c cha' pʌyob loq'uel ti norte yic'ot ti jujunwejl pañimil. Mi caj c cha' tempañob tilel yic'ot jini mach bʌ wenic i yoc i c'ʌb yic'ot x'ixicob cʌntʌbilo' bʌ i yalobil yic'ot x'ixicob woliyo' bʌ ti bajq'uel. Cabʌlob mi caj c cha' pʌy tilel.

⁹Che' talob jini woliyo' bʌ ti uq'uel, mi caj c toj'esañob tilel ti wen bʌ bij ame i jats'ob i yoc. Mi caj c pʌyob tilel ba'an cuxul bʌ ja', come i taton Israel. Jiñʌch yʌx alʌl bʌ calobil Efraín.

¹⁰Ubinla i t'an lac Yum winicob ti jujump'ejl tejclum. Pam pucula ti ñajtʌl ya' ba'an lum joyol bʌ ti ja'. Subeñob: “Jini tsa' bʌ i pam pucu israelob mi caj i cha' much'quiñob tilel. Mi caj i cʌntañob che' bajche' xcʌnta tiñʌme', come i yʌlac'ob”. Che'ʌch yom ma' subeñob.

¹¹Come lac Yum tsi' mʌñʌ Jacob. Tsi' loc'sa ti' c'ʌb jini ñumen p'ʌtʌl bʌ.

¹²Cha' talob ti' tijicñʌyel i pusic'al cha'an mi' cha'leñob c'ay ti' chañelal jini wits Sion. Tijicñayob i wut cha'an coltʌbilob ti lac Yum. Tsi' yʌq'ueyob ixim yic'ot i ya'lel ts'usub yic'ot tsiji' bʌ aceite yic'ot i yal alʌc'ʌl yic'ot i yal wacax. Ch'ejl mi caj i sujtelob che' bajche' tsijcʌbil bʌ pʌc'ʌbʌl. Cha' ch'ejlix i ch'ujlel cha'an jini cuxul bʌ ja' mu' bʌ cʌq'ueñob. Ma'anix mi caj i chʌn ubiñob ch'ijiyem bʌ i pusic'al.

¹³Mi' cajelob ti son jini xch'ocob cha'an tijicñayob i pusic'al. Tijicñayob ja'el jini ch'iton winicob yic'ot jini xñoxob. Mi caj j q'uextʌbeñob i ch'ijiyemlel ti' tijicñʌyel. Mi caj c ñʌch'chocobeñob i pusic'al. Mi caj cʌq'ueñob i tijicñʌyel i pusic'al i q'uexol jini ch'ijiyem bʌ.

¹⁴On mi caj cʌq'ueñob i c'ux waj jini motomajob. Mi caj c tijicñesʌbeñob i pusic'al. Mi caj i ñaj'añob c winicob x'ixicob cha'an pejtel chuqui mi cʌq'ueñob, che'en lac Yum.

¹⁵Lac Yum woli' yʌl: Woliyob ti uq'uel ti Ramá. Raquel woli' yuc'tan i yalobilob. Wen wocol jax mi' yubin. Mach yomic lajmel i ch'ijiyemlel i pusic'al, come tsa'ix chʌmiyob i yalobilob.

¹⁶Lac Yum woli' yʌl: Sujcun i ya'lel a wut. Mach ma' chʌn cha'len uq'uel, come añʌch a chobejtʌbal cha'an a we'tel, che'en lac Yum. Mi caj i loq'uelob israelob ti' wenta i contra. Mi caj i cha' tilelob.

¹⁷Cabʌlʌch la' pijtaya. Mi caj la' sujtel ti la' lumal, che'en lac Yum.

¹⁸Tsa cubibe i t'an Efraín. Wen wocol woli' yubin cha'an i mul. Woli ti t'an i pusic'al. Woli' ña'tan: “Lajal tsac mele bajche' i yal wacax maxto bʌ uts'esʌbilic i pusic'al. Tsa' wersa aq'ueyon j cuch wocol cha'an ma' ju'sʌbeñon c pusic'al. Cha' pʌyʌyon, c Yum. Cha' uts'esʌbeñon c pusic'al, come c Yumet, c Dioset.

¹⁹Che' bʌ tsac tʌts'ʌ c bʌ, tsac mele c pusic'al. Che' cʌntesʌbilon, tsac ña'ta an c mul. Ch'ijiyem c pusic'al tsac cha'le quisin. Tsa' toj sajti c pusic'al cha'an chʌn cuchul to c mul c'ʌlʌl che' ch'itoñon to”. Che'ʌch woli ti t'an Efraín.

²⁰¿Mach ba calobilic Efraín? ¿Mach ba c'uxbibilic c cha'an? ¿Mach ba jinic tsa' bʌ c meq'ue? Jujunyajl che' mi cʌ'len mic chʌn ña'tan. Jini cha'an com to j coltan ti pejtelel c pusic'al. Mi caj c pʌsben i yutslel c pusic'al, che'en lac Yum.

²¹Cha' ña'tan i bijlel a lumal. Ac'ʌ seña tac ti bij cha'an toj mi' majlelob a pi'ʌlob. Chajpan a bʌ cha'an ma' cha' sujtel ti jini jach bʌ bij ba' tilemet. Cucux xch'oc bʌ calobil, Israel. Sujten ti ili tejclum tac.

²²¿Jala to ba ma' jalijel? ¿Cha'p'ejl jax ba a pusic'al? ¿Jala to ba ma' chʌn tʌts' a bʌ? Wʌlʌc pat ma' majlel. Come wʌ' ti pañimil lac Yum wolix i mel junchajp tsijib tac bʌ maxto bʌ anic c'ʌlʌl wʌle. Israel mi caj i c'ajtin i ñoxi'al. Ti jump'ejl i pusic'al mi caj i c'uxbiñon.

²³I Yum Panchan yic'ot Pañimil, i Dios Israel, woli' yʌl: Cha' wa'chocbilix i yumʌntel Israel. Mi' caj ti cha' ajlel: “Wʌ' ti ch'ujul bʌ wits ba' mi' melob chuqui toj, la' i yʌq'ueñetla i yutslel la' pusic'al lac Yum”. Che'ʌch mi' caj ti ajlel.

²⁴Wʌ' ti Judá mi' cajelob ti comol ajñel jini chumulo' bʌ ti tejclum tac yic'ot jini mu' bʌ i cha'leñob pac' yic'ot jini mu' bʌ i cʌntañob ñumel i yʌlac'.

²⁵Come joñon mi caj c cha' p'ʌtesan jini lujbobix bʌ. Mi caj cʌq'ueñob i tijicñʌyel i pusic'al jini ch'ijiyemo' bʌ, che'en lac Yum.

²⁶Che' jini tsa' ch'ojyiyon. Wen sumuc jax wʌyel tsa cubi.

²⁷Tal jini q'uin tac che' mi caj c p'ojlesan jini israelob yic'ot i yʌlac'.

²⁸Ti yambʌ ora tsac chʌcʌ q'ueleyob cha'an mic jisañob, yic'ot cha'an mi cʌq'ueñob wocol. Wʌle mi caj c chʌcʌ q'uelob cha'an mic wa'chocoñob, che'en lac Yum.

²⁹Ti jim bʌ ora ma'anix mi caj i chʌn alob: “Woliyob ti wocol i yalobilob cha'an ti' caj i mul i tat i ña'”, mach chʌn che'obix.

³⁰Come jini mu' bʌ i cha'len mulil mi caj i toj i mul. Jini mu' bʌ i c'ux ts'usub che' maxto c'ʌnic, paj mi caj i yubin ti' yej.

³¹Tal jini q'uin tac che' mi caj c mel tsijib xuc'ul bʌ t'an yic'ot i p'olbal Israel yic'ot i p'olbal Judá.

³²Mach i pi'ʌlic jini xuc'ul bʌ t'an tsa' bʌ c mele yic'ot i tatob che' bʌ tsac pʌyʌyob loq'uel ti jini lum Egipto. Tsi' jemeyob jini xuc'ul bʌ t'an tsa' bʌ c mele yic'otob anquese i ñoxi'alon, che'en lac Yum.

³³Jiñʌch jini tsijib xuc'ul bʌ t'an mu' bʌ c mel yic'ot i p'olbal Israel, che'en lac Yum. Mi caj c ts'ijban c t'an ya' ti' pusic'alob. Che' jini mi caj i mulañob c t'an. Che' jini mero c cha'añʌch mi caj j q'uelob. Che' jini i Dioson.

³⁴Ma'anix mi caj i chʌn cha'leñob cʌntesa cha'an mi' yʌc'oñob ti cʌjñel, come cʌmbilonix i cha'an pejtelelob, jini ñuco' bʌ yic'ot jini ch'o'ch'oco' bʌ, che'en lac Yum, come joñon mi caj c ñusʌbeñob i mul. Ma'anic mi caj c chʌn ña'tʌbeñob i mul.

³⁵Che'ʌch woli ti t'an lac Yum tsa' bʌ i yʌc'ʌ ti chan jini q'uin yic'ot uw yic'ot ec' cha'an mi laj q'uel pañimil ti q'uiñil yic'ot ti ac'ʌlel. Lac Yum mi' t'ox colem ñajb. Mi' yʌc' ti ju'ucña bʌ t'an. I Yum Panchan yic'ot Pañimil, jiñʌch i c'aba'. Lac Yum woli' yʌl:

³⁶Wen yujil i jac'ol c mandar ti pejtelel. Muq'uic i cʌy i jac'beñon, che' jini mux a ña'tan mach xuc'ulic c t'an. Machic xuc'ul c t'an, tsa'ix sʌc jili Israel ti' tojel c wut ti pejtelel ora, che'en lac Yum.

³⁷Lac Yum woli' yʌl: Ma'anic mi caj c junyajlel choc Israel cha'an ti' caj i mul. Mi tsa' tajle winic mu' bʌ mejlel i p'is i c'ʌclib panchan yic'ot pañimil, che' jini mux a ña'tan mach isujmic c t'an, che'en lac Yum.

³⁸Tal jini q'uin tac che' mi caj i chʌn wa'chocontel Jerusalén cha'an mi' tsictiyel c ñuclel, che'en lac Yum. Mi caj i techob e'tel ya' ti chan bʌ i q'ueloñib Hananeel c'ʌlʌl ti' ti' ts'ajc am bʌ ti' xujc tejclum.

³⁹Mi caj i tam'esañob jini tejclum ya' ba'an jini bujtʌl Gareb. Wi'il mi caj i wa'chocontel c'ʌlʌl ti Goa.

⁴⁰C cha'añʌch pejtel jini joctʌl ba' muculob ch'ujlelʌl ya' ba'an i tʌñil c'ajc loc'sʌbil bʌ ti pulʌntib. Ch'ujul ja'el tic tojlel jini jamil tac c'ʌlʌl ti jini joctʌl Cedrón ya' ti' pasibal q'uin. Ma'anix mi caj i chʌn chijlel. Ma'anix mi' chʌn jisʌntel, che'en lac Yum.