Read Chol Jeremias 33 Bible Online

Jeremias 33 - Chol bible

Jeremias 33

¹Tsa' tili i t'an lac Yum ti' cha'yajlel ya' ba' ñup'ul Jeremías ti mʌjquibʌl am bʌ ti' pat i yotot rey.

²Lac Yum tsa' bʌ i mele pañimil, ti' p'ʌtʌlel jach i t'an tsi' mele. Tsi' xuc'choco. Jiñʌch lac Yum. Che'ʌch i c'aba'. Lac Yum tsi' yʌlʌ:

³C'ajtibeñon chuqui a wom. Joñon mi caj c jac'beñet. Mi caj c pʌsbeñet ñuc tac bʌ mach bʌ a cʌñʌyic mu' bʌ caj c melbeñet ti cabʌl c p'ʌtʌlel.

⁴Lac Yum, i Dios Israel, tsi' yʌlʌ: Jejmenix jini otot tac wʌ' ti tejclum yic'ot ja'el i yotot i reyob Judá. Tsi' jemeyob cha'an mi' mʌctʌbeñob i yespada i contrajob ya' ba' tsi' meleyob bujtʌl tac ti' t'ejl jini ts'ajc.

⁵Talob jini caldeojob cha'an mi' jisañob c winicob tsa' bʌ cʌc'ʌ ti tsʌnsʌntel cha'an cʌlʌx jax c mich'ajel. Mi caj i tsʌnsañob. Mi caj i but'ob ili tejclum ti ch'ujlelʌl. Tsa'ix c mʌyʌ c wut cha'an ti' caj i jontolil ili tejclum.

⁶Tal to i yorajlel che' mi caj c cha' mel ti uts'at. Mi caj c lajmesʌben i wocol cha'an mi' cha' c'oc'an. Mi caj cʌq'ueñob i ñʌch'tʌlel i pusic'al. Tijicña mi' cajelob ti chumtʌl yic'ot pejtel chuqui tac yomob.

⁷Joñon mi caj cʌc' ti colel Judá yic'ot Israel. Mi caj c cha' pʌyob tilel. Mi caj c cha' aq'ueñob i yumʌntel che' bajche' ti yambʌ ora.

⁸Joñon mi caj c sʌq'uesañob cha'an pejtel i mul tsa' bʌ i cha'leyob che' bʌ tsi' contrajiyoñob.

⁹Ili tejclum Jerusalén mi caj i tsictesan c ñuclel. Tijicña mi caj j q'uel. Pejtel tejclum ti yan tac bʌ lum mi caj i q'ueloñob ti ñuc che' tijicña ili tejclum cha'an pejtelel i yutslel c pusic'al mu' bʌ c pʌsben. Mi caj i toj sajtelob i pusic'al che' mi' ña'tañob cha' anix i ñʌch'tʌlel i pusic'al cha'an cabʌl tsaj colta.

¹⁰Lac Yum woli' yʌl: Tsi' yubiyob laj pujch'emix ili lum. Ma'anic majqui wʌ' chumul mi winic mi bʌte'el. Jocholix i tejclum tac Judá yic'ot i bijlel tac Jerusalén. Pero wʌ' ba' ch'ijiyem pañimil mi caj i cha' ubintel

¹¹i t'an jini tijicñayo' bʌ woliyo' bʌ ti tse'ñal. Mi caj i cha' ubintel i t'an jini xñujpuñijel yic'ot jini c'ajtibil bʌ i cha'an. Wʌ' ti ili tejclum mi caj i cha' ch'ujutesañoñob yic'ot c'ay. Mi caj i yʌlob: “Subenla lac Yum wocolix i yʌlʌ come i Yumʌch Panchan yic'ot Pañimil. Mi' pʌsbeñonla i yutslel i pusic'al ti pejtelel ora”. Che'ʌch mi' cajelob ti c'ay. Mi caj i cha' ch'ʌmbeñoñob tilel c majtan tac wʌ' tic Templo, come mi caj c cha' mel ti ñuc ili lum che' bajche' ti oñiyi, che'en lac Yum.

¹²I Yum Panchan yic'ot Pañimil woli' yʌl: Mux i cha' q'uejlelob xcʌnta tiñʌme'ob yic'ot i yʌlac' ba' ma'anic winic mi bʌte'el ti pejtelel ili tejclum tac.

¹³Ya' ti yebal wits yic'ot ti joctʌl yic'ot ti Sur, ti' lumal Benjamín yic'ot ti xchumtʌl tac am bʌ ti' joytʌlel Jerusalén yic'ot i tejclum tac Judá, mi caj i cha' ñumel alʌc'ʌl ti' wenta i yum, che'en lac Yum.

¹⁴Tal to i yorajlel che' mi caj c ts'ʌctesan pejtel c t'an tsa' bʌ c wʌn subeyet. Mi caj j coltan i p'olbal Israel yic'ot i p'olbal Judá.

¹⁵Ti jim bʌ ora mi caj c tsictesan juntiquil i p'olbal David i wentajʌch i Buts te' mu' bʌ caj i pasel ti junts'ijt i c'ʌb. Mero tojʌch ajñel. Mi caj i cha'len toj bʌ meloñel wʌ' ti ili lum.

¹⁶Ti jim bʌ ora mi caj i coltan Jerusalén. Xuc'ul mi caj i yajñel Jerusalén. Mi' caj ti ajlel: “Jiñʌch lac Yum mu' bʌ i yʌq'ueñonla lac tojel. Che'ʌch i c'aba'”, che'ob.

¹⁷Come woli' yʌl lac Yum: Ti pejtelel ora mi' caj ti yumʌntel i p'olbal David wʌ' ti' buchlib i tat ti' tojlel israelob. Ma'anic ba' ora poj jochol mi caj i yajñel i buchlib.

¹⁸Che' ja'el ma'anic ba' ora anto yom motomaj ti' tojlel levíjob cha'an mi' pulbeñoñob c majtan.

¹⁹Tsa' tili i t'an lac Yum ba'an Jeremías.

²⁰Woli' yʌl lac Yum: Muq'uic i mejlel a jem jini xuc'ul bʌ t'an tsa' bʌ c mele yic'ot jini q'uin yic'ot ac'ʌlel, cha'an mi' yʌsiyel, cha'an mi' xoy i bijlel,

²¹che' jini mi mejlel a jem ja'el jini xuc'ul bʌ t'an tsa' bʌ c mele yic'ot c winic David cha'an ma'anic mi' tilel juntiquil i yalobil mu' bʌ cajel i yumʌntel ti' buchlib. Che'ic jini mi mejlel a jem jini xuc'ul bʌ t'an tsa' bʌ c mele.

²²Mi caj c p'ojlesʌben i p'olbal David, c winic, yic'ot jini levíob mu' bʌ i melob que'tel, cha'an lajal mi' yajñelob che' bajche' jini ec' ti panchan mach bʌ tsicbilic, yic'ot i ji'il ñajb mach bʌ p'isbilic, che'en.

²³Tsa' tili i t'an lac Yum ba'an Jeremías.

²⁴¿A wujil ba chuqui woli' yʌlob ili winicob x'ixicob? Woli' yʌlob: “Lac Yum tsi' junyajlel choco Judá yic'ot Israel, jini yajcʌbilo' bʌ i cha'an”, che'ob. Che' jini woli' wajleñob c tejclumob. Woli' lon ña'tañob ma'anic i c'ʌjñibal ti' tojlel yan tac bʌ tejclum.

²⁵Lac Yum woli' yʌl: Mi mach xuc'ulic tsac mele q'uin yic'ot ac'ʌlel, mi mach c melbalic pañimil yic'ot panchan, mach xuc'ulic c t'an ja'el.

²⁶Che'ic jini mux c junyajlel choc i p'olbal Jacob yic'ot i p'olbal c winic David. Che'ic jini, ma'anic mic yajcan juntiquil i p'olbal David cha'an mi' cha'len yumʌl ti' tojlel Abraham yic'ot Isaac yic'ot Jacob yic'ot i p'olbalob. Pero xuc'ulʌch c t'an. Ña'tan che' jini mi caj c cha' coltañob. Mi caj c p'untañob, che'en lac Yum.