Read Chol Jeremias 36 Bible Online

Jeremias 36 - Chol bible

Jeremias 36

¹Ti' chʌmp'ejlel jab che' woli ti yumʌl Joacim (i yalobil Josías) jini rey ti Judá, tsa' tili i t'an lac Yum ba'an Jeremías:

²Ch'ʌmʌ tilel jun. Ts'ijban pejtel c t'an cha'an Israel yic'ot Judá yic'ot yan tac bʌ tejclum che' bajche' tsac subeyet che' woli ti yumʌl Josías c'ʌlʌl wʌle. Pʌsbeñob jini año' bʌ ti Judá.

³Tic'ʌl mux caj i p'isob ti wenta che' mi' ña'tañob chuqui mi caj c tumbeñob cha'an i mul. Tic'ʌl mi mux caj i cʌyob i jontolil cha'an mic ñusʌbeñob i mul, che'en.

⁴Jini cha'an Jeremías tsi' pʌyʌ tilel Baruc (i yalobil Nerías). Pejtel i t'an lac Yum tsa' bʌ subenti Jeremías, tsi' cha' sube Baruc. Baruc tsi' laj otsa ti jun.

⁵Jeremías tsi' sube: Tic'bilon, mach mejlicon ti ochel ti yotot lac Yum.

⁶Jini cha'an yom majliquet ti Templo che' temel añob pejtel winicob ti' q'uiñilel ch'ajb. Yom ma' q'uel ili jun ba' ts'ijbubil i t'an lac Yum che' bajche' tsac subeyet cha'an mi' laj ubiñob jini winicob loq'uemo' bʌ ti pejtelel tejclum tac ti Judá.

⁷Tic'ʌl mi mux caj i cʌyob i mul cha'an mi' pejcañob lac Yum ti wocol t'an ti jujuntiquil cha'an mi' ñusʌbeñob i mul. Come cabʌl woli ti mich' lac Yum. Tsa'ix i yʌc'ʌ i t'an cha'an mi' jisʌntelob, che'en Jeremías.

⁸Baruc (i yalobil Neraías) tsi' laj mele che' bajche' tsi' sube Jeremías. Ya' ti Templo tsi' pejca i t'an lac Yum am bʌ ti ts'ijbujel.

⁹Ti' jop'ejlel jab che' woli ti yumʌl Joacim (i yalobil Josías) rey bʌ ti Judá, che' ti diciembre, tsi' tempayob i bʌ ya' ti Jerusalén winicob loq'uemo' bʌ ti' tejclum tac Judá cha'an mi' cha'leñob ch'ajb ti' tojlel lac Yum.

¹⁰Ya' ti' yotot lac Yum, Baruc tsi' pejca i t'an Jeremías tsa' bʌ ts'ijbunti. Tsi' laj ubiyob ya' ti mal otot i cha'an Gemarías (i yalobil Safán) jini sts'ijbujel am bʌ i ye'tel ti' tojlel rey. Ya' añob ti chan bʌ coyerol ba'an tsiji' bʌ i ti' Templo.

¹¹Micaías (i yalobil Gemarías i yalobil bʌ Safán) tsi' laj ubibe i t'an lac Yum am bʌ ti ts'ijbujel.

¹²Tsa' toj majli ti' yotot rey ya' ba' temel añob jini año' bʌ i ye'tel. Ya'an Elisama jini sts'ijbujel (secretario), yic'ot Delaía (i yalobil Semaías), yic'ot Elnatán (i yalobil Achbor), yic'ot Gemarías (i yalobil Safán), yic'ot Sedequías (i yalobil Ananías), yic'ot yaño' bʌ año' bʌ i ye'tel.

¹³Micaías tsi' cha' subeyob jini t'an tsa' bʌ i yubi che' bʌ tsi' pejca jini ts'ijbujel Baruc ti' tojlel pejtelel winicob.

¹⁴Jini cha'an, jini año' bʌ i ye'tel tsi' chocoyob majlel Jehudí (i yalobil Netanías i yalobil bʌ Selemías i yalobil bʌ Cusi) cha'an mi' suben Baruc: La' abi, ch'ʌmʌ tilel jini ts'ijbujel tsa' bʌ a pejca ti' tojlel pejtel winicob, che'en. Jini cha'an Baruc (i yalobil Nerías) tsi' ch'ʌmʌ tilel jini ts'ijbujel ti' tojlel año' bʌ i ye'tel.

¹⁵Tsi' pʌyʌyob ochel. Buchi', pejcʌbeñon lojon chuqui ts'ijbubil, che'ob. Jini cha'an tsi' lu' pejcʌbeyob.

¹⁶Che' bʌ tsi' laj ubibeyob i t'an, tsa' cajiyob ti bʌq'uen. Tsi' yʌlʌyob: Wersa mi caj c cha' suben lojon jini rey pejtel ili t'an, che'ob.

¹⁷Tsi' c'ajtibeyob Baruc: ¿Bajche' tsa' ts'ijba pejtel ili t'an? Subeñon lojon mi tilem ti Jeremías, che'ob.

¹⁸Baruc tsi' yʌlʌ: Isujm, Jeremías tsi' subeyon pejtel ili t'an. Tsac ts'ijba ti jun yic'ot tinta, che'en.

¹⁹Jini cha'an jini año' bʌ i ye'tel tsi' subeyob Baruc: Cucu mucu a bʌ a wic'ot Jeremías. Mach yomic ma' suben a pi'ʌlob mi juntiquilic baqui ma' majlel, che'ob.

²⁰Tsa' majliyob ti' yotot jini rey, pero tsi' cʌyʌyob jini ts'ijbujel ti' wenta Elisama jini secretario. Tsa' jach i subeyob jini rey pejtel chuqui ts'ijbubil.

²¹Jini rey Joacim tsi' choco majlel Jehudí cha'an mi' ch'ʌm tilel jini ts'ijbujel. Tsa' majli i tajob ba' lotol ti' wenta Elisama jini secretario. Tsi' ch'ʌmʌ tilel. Jehudí tsi' pejca ti' tojlel rey yic'ot ti' tojlel jini año' bʌ i ye'tel ya' bʌ wa'alob.

²²I yorajlelix tsʌñal che' ti diciembre. Woli' q'uixñesan i bʌ ti c'ajc jini rey.

²³Jehudí tsa' caji' q'uel jini ts'ijbujel. Che' bʌ tsa' ujti i q'uel ts'ita', jini rey tsi' bic'ti tsepe loq'uel ti machit. Tsi' choco ochel ti c'ajc jinto tsa' laj puli ti c'ajc. Ma'anic chuqui tsa' cʌle.

²⁴Ma'anic tsi' cha'le bʌq'uen jini rey yic'ot i winicob che' bʌ tsi' yubiyob ili t'an. Ma'anic majch tsi' mele i pusic'al.

²⁵Elnatán yic'ot Delaía yic'ot Gemarías tsi' subeyob jini rey: Tsajaletme, che'ob, pero ma'anic tsi' jac'beyob i t'an.

²⁶Jini rey tsi' choco majlel Jerahmeel (i yalobil Hamelec) yic'ot Seraías (i yalobil Azriel) yic'ot Selemías (i yalobil Abdeel) cha'an mi' cʌchob tilel jini sts'ijbujel Baruc yic'ot Jeremías jini x'alt'an. Pero lac Yum tsi' wen mucuyob.

²⁷Tsa' tili i t'an lac Yum ba'an Jeremías che' pulbilix jini jun ba' tsi' ts'ijba Baruc pejtel jini t'an tsa' bʌ i sube Jeremías. Tsi' yʌlʌ:

²⁸Ch'ʌmʌ tilel yambʌ jun. Cha' ts'ijban pejtel jini t'an che' bajche' ti ñaxan, cha'an tsi' pulu ti c'ajc jini ñaxan bʌ jun Joacim rey bʌ ti Judá.

²⁹Mi caj a suben Joacim: “Lac Yum woli' yʌl: Tsa' puli jini ts'ijbujel. Tsa' wʌ'le c winic cha'an tsi' yotsa ti jun: Talix jini rey ch'oyol bʌ ti Babilonia cha'an mi' jisan ili lum yic'ot pejtel wʌ' bʌ chumulob yic'ot bʌte'el”.

³⁰Jini cha'an mi caj a suben Joacim rey bʌ ti Judá: Ti pejtelel i yalobil ma'anic mi juntiquilic mu' bʌ caj ti yumʌl ti' buchlib David ti pejtelel ora. Che' mi' chʌmel, mi' caj ti chojquel i bʌc'tal ti pam lum ba' mi' pulel ti q'uin ba' mi' tsʌñ'an ti ac'ʌlel.

³¹Joñon mi caj cʌq'uen i toj i mul yic'ot i yalobilob yic'ot i winicob cha'an i jontolil. Mi caj cʌc'ob ti ñuc bʌ wocol yic'ot pejtel jini chumulo' bʌ ti Jerusalén yic'ot ti Judá che' bajche' tsac subeyob ti ili jun, come mach yomic i yubiñob, che'en lac Yum.

³²Jini cha'an Jeremías tsi' ch'ʌmʌ yambʌ jun. Tsi' yʌq'ue jini sts'ijbaya Baruc (i yalobil Nerías). Baruc tsi' cha' otsa ti jun pejtel chuqui tsi' sube Jeremías che' bajche' ti ñaxan, come jini rey Joacim tsi' pulu ti c'ajc jini ñaxan bʌ jun. Pero tsi' cha' otsa yambʌ t'an i pi'ʌl bʌ.