Read Chol Jeremias 38 Bible Online

Jeremias 38 - Chol bible

Jeremias 38

¹Che' bʌ woli ti t'an Jeremías ti' tojlel pejtel winicob, tsi' wen ubiyob Sefatías (i yalobil Matán), yic'ot Gedalías (i yalobil Pasur), yic'ot Jucal (i yalobil Selemías), yic'ot Pasur (i yalobil Malquías). Tsi' yʌlʌ Jeremías:

²Lac Yum woli' yʌl: “Mi caj i chʌmelob ti espada yic'ot ti wi'ñal yic'ot ti c'amʌjel pejtel mu' bʌ i cʌytʌlob ti ili tejclum, pero mi caj i cuxtʌyelob pejtel mu' bʌ i yʌc'ob i bʌ ti' c'ʌb jini caldeojob. Mi caj i mʌjlel i cha'an caldeojob. Cuxul mi caj i yajñelob jini mu' bʌ i yumañob.

³Ili tejclum mi caj i yʌjq'uel ti' c'ʌb la' contrajob mu' bʌ i yumañob jini rey ti Babilonia. Mi caj i ch'ʌmob. Che' woli' yʌl lac Yum”, che'en Jeremías.

⁴Jini cha'an jini yumʌlob tsa' cha' majli i subeñob jini rey: A wocolic la' chʌmic ili winic Jeremías. Come ti' caj i t'an woli' c'uñ'añob soldadojob yic'ot pejtel winicob che' bajche' jaytiquil tsa' cʌleyob wʌ' ti tejclum. Ili winic ma'anic woli coltañob. Woli' yʌc'ob ti jisʌntel, che'ob.

⁵Jini rey Sedequías tsi' yʌlʌ: Melela bajche' la' wom, come an ti la' wenta. Mach mejlic c tiq'uetla, che'en.

⁶Jini cha'an tsi' cʌchʌyob Jeremías. Tsi' ju'sayob ba' tocol lum cha'an i yajñib ja'. Ili lum i cha'añʌch Malquías i yalobil rey. An ti' wenta jini xq'uelojelob ti' pat i yotot rey. Tsi' ju'sayob ti lazo. Ma'anic ja' ti yebal, pero tam jini oc'ol. Jeremías tsa' sup' ochi ti oc'ol.

⁷Juntiquil etíope i c'aba' Ebedmelec, am bʌ i ye'tel ti' yotot rey, tsi' yubi ya'an Jeremías ti' yajñib ja'. Che' bʌ tsi' yubi, tsa' loq'ui ti' yotot rey. Tsa' majli i pejcan jini rey ya' ba' buchul ti' ti' ts'ajc i c'aba' Benjamín. Tsi' sube:

⁹C yum, c rey, an i mul ili winicob cha'an tsi' yotsayob jini x'alt'an Jeremías ti' yajñib ja'. Mi caj i chʌmel ti wi'ñal ya'i come tsa'ix jili waj ti tejclum, che'en.

¹⁰Jini cha'an jini rey tsi' sube Ebedmelec: Pʌyʌ majlel uxtiquil winicob. Letsanla loq'uel jini x'alt'an Jeremías ame chʌmic ti' yajñib ja', che'en.

¹¹Che' jini Ebedmelec tsi' pʌyʌ majlel uxtiquil winicob. Tsa' ochi ti' yotot rey ti yebal otot ba' lotol tsucul pisil. Tsi' cʌchʌ pisil ti lazo. Tsi' ju'sa ti' yajñib ja' ba'an Jeremías.

¹²Jini etíope Ebedmelec tsi' sube: Ac'ʌ jini tsucul pisil ti yebal a mis yic'ot jini lazo, che'en. Jeremías tsi' mele che' bajche' tsa' subenti.

¹³Che' jini tsi' letsayob loq'uel Jeremías ti patio am bʌ ti' wenta xq'uelojelob.

¹⁴Jini rey Sedequías tsi' pʌyʌ jini x'alt'an Jeremías. Tsi' pejca ya' ti yuxp'ejlel bʌ i ti' i Templo lac Yum. Jini rey tsi' sube: An chuqui com c'ajtibeñet. Yom ma' subeñon. Mach ma' muc, che'en.

¹⁵Jeremías tsi' sube: Mi che'ʌch mic mel bajche' wola' wʌl, ¿mach ba muq'uic a wʌc'on ti chʌmel? Che' mic subeñet bajche' yom ma' mel, ma'anic mi caj a jac', che'en Jeremías.

¹⁶Jini cha'an jini rey Sedequías tsi' mucu wa'choco i t'an ti' c'aba' lac Yum ti' tojlel Jeremías. Tsi' yʌlʌ: La' i q'uelonla lac Yum tsa' bʌ i meleyonla, jini cuxul bʌ lac Yum. Ma'anic mi caj cʌq'uet ti chʌmel. Ma'anic mi caj cʌq'uet ti' wenta ili winicob yomo' bʌ i tsʌnsañet, che'en.

¹⁷Jini cha'an Jeremías tsi' sube: Lac Yum jiñʌch i Dios Panchan yic'ot Pañimil, i Dios Israel. Lac Yum woli' yʌl: “Mi a wom a jac'on, ac'ʌ a bʌ ti' wenta jini yumʌlob chocbilo' bʌ tilel i cha'an i rey Babilonia. Che' jini mi caj a cuxtʌyel. Che' jini mach muq'uic i pulel ti c'ajc ili tejclum. Cuxul mi caj a wajñel temel yic'ot a pi'ʌlob año' bʌ ti a wotot.

¹⁸Pero mi ma'anic ma' wʌc' a bʌ ti' c'ʌb jini yumʌlob loq'uemo' bʌ ti Babilonia, mi caj i yʌjq'uel ili tejclum ti' c'ʌb jini caldeojob. Mi caj i pulob ti c'ajc. Che' jini ma'anic majch mi caj i coltañet loq'uel ti' c'ʌbob”, che'en Jeremías.

¹⁹Jini rey Sedequías tsi' yʌlʌ: Mic bʌc'ñan jini judíojob tsa' bʌ i yʌc'ʌyob i bʌ ti' c'ʌb jini caldeojob. Tic'ʌl mi caj cʌjq'uel ti' wenta cha'an mi' tic'lañoñob, che'en.

²⁰Pero Jeremías tsi' sube: Ma'anic mi caj a wʌjq'uel ti' wenta. Jac'beñon wʌle. Mij c'ajtibeñet ti wocol t'an, come jiñʌch i t'an lac Yum woli bʌ c subeñet. Muq'uic a jac', tijicñayet mi caj a cuxtiyel.

²¹Pero mi ma'anic ma' loq'uel ti tejclum, mi caj i tilel wocol che' bajche' tsi' pʌsbeyon lac Yum.

²²Tsaj q'uele pejtel jini x'ixicob tsa' bʌ cʌleyob ti' yotot jini rey ti Judá. Tsa' laj pʌjyiyob loq'uel ti' wenta jini yumʌlob chocbilo' bʌ tilel i cha'an i rey Babilonia. Jini yumʌlob tsi' subeyob: “Tsa' la' ñopbe i t'an la' pi'ʌlob, pero tsa' jach i lotiyetla. Jini cha'an ma'anic la' coltʌntel. Che' bʌ tsi' q'ueleyetla ti wocol, tsi' cʌyʌyetla”, che'ob.

²³Ña'tan che' jini, mi caj i pʌjyelob loq'uel ti a wotot pejtel a wijñamob yic'ot a walobilob ti' wenta jini caldeojob. Jatet ja'el ma'anic mi caj a colel ti' c'ʌbob. Jini rey am bʌ ti Babilonia mi caj i chuquet ti' c'ʌb. Mi caj i pul ili tejclum. Che' tsi' yʌlʌ Jeremías.

²⁴Sedequías tsi' sube: Mach yomic ma' suben yambʌ winic chuqui tsa' subeyon. Che' jini ma'anic mi caj a chʌmel.

²⁵Mi tsa' caji yubiñob jini yumʌlob wolij c'ajtibeñet bajche' yom mic mel, mi tsa' tili i c'ajtibeñet chuqui tsa' subeyon yic'ot bajche' tsac jac'ʌ, co jach yom ma' subeñob

²⁶tsa' c'ajtibeyon cha'an mic p'untañet cha'an mach awomic mic cha' choquet majlel ti' yotot Jonatán ame chʌmiquet ya'i, che'en jini rey. Tsa' majli Jeremías.

²⁷Tsa' tiliyob jini yumʌlob ba'an Jeremías cha'an yomob i ña'tan chuqui tsi' sube jini rey. Jeremías tsi' yʌlʌ che' bajche' tsi' sube jini rey. Jini cha'an tsa' cha' majliyob jini yumʌlob. Ma'anic majqui tsi' yubi chuqui tsa' ujti ti mucul.

²⁸Jini cha'an Jeremías tsa' cʌle ti jini patio ba'an xq'uelojelob jinto tsa' ochiyob jini caldeojob ti Jerusalén. Ya'to an ti Jerusalén che' bʌ tsa' mʌjli i cha'añob.