Read Chol Jeremias 44 Bible Online

Jeremias 44 - Chol bible

Jeremias 44

¹Tsa' tili jini t'an ba'an Jeremías che' ya' to chumulob jini judíojob ti Egipto, ti Migdol yic'ot ti Tafnes yic'ot ti Menfis yic'ot ti junwejl Patros.

²I Yum Panchan yic'ot Pañimil, i Dios Israel woli' yʌl: Tsa' la' q'uele jini ñuc bʌ wocol tsa' bʌ c chocbeyob jini año' bʌ ti Jerusalén yic'ot i tejclum tac Judá. La' wilan lu' jocholix. Ma'anix i yum.

³Tsac jisayob cha'an cabʌl i jontolil. Tsi' ch'ujutesayob yambʌ diosob mach bʌ i cʌñʌyobic, ch'oyolo' bʌ ti ñajt bʌ pañimil. Tsi' pulbeyob pom. Che' jini tsi' techbeyoñob c mich'ajel.

⁴Tsac chocbeyetla tilel pejtel c winicob c'ʌlʌl ti oñiyi c'ʌlʌl wʌle cha'an mic subeñetla ti wocol t'an mach yomic mi la' mel ili jontolil, come ts'a' mij q'uel.

⁵Pero ma'anic tsi' jac'ʌyob. Ma'anic tsi' cʌyʌyob i pulben pom yambʌ diosob. Ma'anic tsi' cʌyʌyob i mul.

⁶Jini cha'an tsa cʌc'ʌyob ti ñuc bʌ wocol ti pejtelel tejclum tac ti Judá yic'ot ti' bijlel tac Jerusalén cha'an cabʌl c mich'ajel. Jochol tsa' cʌle la' lumal. Lu' jejmenix woli la' q'uel.

⁷Jini cha'an woli' yʌl lac Yum, i Dios Panchan yic'ot Pañimil, i Dios Israel: ¿Chucoch mi la' wʌc' la' bʌ ti wocol cha'an mi la' junyajlel jilel, winicob yic'ot x'ixicob yic'ot ch'itoñob yic'ot xch'ocob? Che' jini ma'anic mi' cʌytʌl mi juntiquilic ch'oyol bʌ ti Judá.

⁸¿Chucoch mi la' techbeñon c mich'ajel cha'an i melbal la' c'ʌb? Mi la' pulbeñob pom yambʌ diosob wʌ' ti Egipto ba' tsa' tiliyetla ti chumtʌl. Che' jini mi caj la' ts'a'lentel ti pejtelel lum tac ti pañimil.

⁹¿Tsa' ba ñajiyi la' cha'an i jontolil la' tatob yic'ot i jontolil jini reyob ti Judá yic'ot i jontolil jini yumʌlob? ¿Tsa' ba ñajiyi la' cha'an la' bajñel jontolil yic'ot i jontolil la' wijñam ya' ti' lumal Judá yic'ot ti' bijlel Jerusalén?

¹⁰C'ʌlʌl wʌle ma'anic tsi' peq'uesayob i bʌ. Ma'anic woli' bʌc'ñañoñob. Ma'anic woli' jac'ob c mandar che' bajche' tsaj cʌntesayetla yic'ot la' tatob.

¹¹Jini cha'an p'isila ti la' wenta chuqui wolic subeñet, che'en i Yum Panchan yic'ot Pañimil, i Dios Israel. La' wilan la' contrajon. Mi caj c chocbeñetla tilel ñuc bʌ wocol cha'an mic junyajlel jisan pejtel jini ch'oyolo' bʌ ti Judá tsa' bʌ i ñusʌbeyoñob c t'an.

¹²Tsa' tiliyob ti Egipto cha'an che'ʌch yomob i bajñel pusic'al. Mi caj cʌc'ob ti wocol. Wʌ' ti Egipto mi caj i laj jilelob. Mi caj i laj chʌmelob ti espada yic'ot ti wi'ñal, jini ñuco' bʌ yic'ot jini ch'o'ch'oco' bʌ. Mi caj i ts'a'lentelob, mi caj i yʌ'lentelob, mi caj i p'ajtʌlob.

¹³Mi caj cʌq'ueñob i toj i mul jini chumulo' bʌ ti Egipto che' bajche' tsi' tojoyob jini año' bʌ ti Jerusalén. Mi caj i jilelob ti espada yic'ot ti wi'ñal yic'ot ti c'amʌjel.

¹⁴Ti pejtelob tsa' bʌ tiliyob ti Egipto mi caj i jilelob ilayi. Ma'anic majqui mi caj i sujtel ti' lumal Judá ba' yomob chumtʌl, jini jach mu' bʌ i tʌts'ob i bʌ ti' tojlel i pi'ʌlob cha'an mi' sujtelob, che'en lac Yum.

¹⁵Ya' tempʌbilob bajc'ʌl winicob x'ixicob tsa' bʌ majliyob ti Egipto, chumulo' bʌ ti Patros. Añʌch i mul ili x'ixicob cha'an tsi' pulbeyob pom jini dioste' tac. Ña'tʌbil i cha'an i ñoxi'alob, pero ma'anic tsi' tiq'uiyob. Tsi' yʌlʌyob jini winicob:

¹⁶Mach tilemic ti Dios jini t'an woli bʌ a subeñon lojon. Ma'anic mi caj c jac' lojon.

¹⁷Mi caj c mel lojon che' bajche' com lojon. Mi caj c pulben pom jini x'ixic bʌ rey ti panchan. Mi caj cʌq'uen i majtan bajche' jach c'amel com, che' bajche' tsi' meleyob c tat lojon yic'ot c reyob lojon yic'ot año' bʌ i ye'tel ya' ti' tejclum tac Judá yic'ot ti' bijlel Jerusalén. Come che' jini ma'anic c wi'ñal lojon, tijicñayon lojon, wen chumulon lojon.

¹⁸Pero che' bʌ tsaj cʌyʌ lojon c pulben pom jini x'ixic bʌ rey ti panchan, che' bʌ tsaj cʌyʌ c ch'ujutesan lojon, an lojon c wocol c'ʌlʌl wʌle. Ma'anic c chubʌ'an lojon. Tic'lʌbilon ti espada yic'ot ti wi'ñal, che'ob. Jini x'ixicob tsi' yʌlʌyob:

¹⁹Che' bʌ tsac pulbe lojon pom jini x'ixic bʌ rey ti panchan, ¿mach ba yujilic c ñoxi'al lojon? Ña'tʌbil i cha'añob che' bʌ tsac ch'ujutesa lojon, che' bʌ tsa cʌq'ue lojon japbil bʌ i majtan. Ma'anic tsi' tiq'uiyon lojon, che'ob.

²⁰Jini cha'an Jeremías tsi' subeyob winicob x'ixicob ti pejtelelob:

²¹Che' bʌ tsa' la' pulu pom ya' ti' bijlel Jerusalén, jatetla a wic'ot la' tatob, la' reyob, yic'ot año' bʌ i ye'tel, ¿mach ba anic tsi' q'uele lac Yum? ¿Mach ba anic woli' chʌn ña'tan? ¿Mach ba anic tsi' p'isi ti' wenta?

²²Mach chʌn cuchbilix i cha'an la' jontolil yic'ot pejtelel chuqui mi la' mel. Jini cha'an tsa' pujch'i la' lum. Tsa' sujti ti tiquin bʌ lum mach bʌ anic i c'ʌjñibal. Ma'anix i yumob. Tsa' p'ajleyob jini ya' bʌ chumulob. Tsa' jiliyob. Jini cha'an woliyetla ti wocol wʌle.

²³Tsa' la' pulu pom. Tsa' la' cha'le mulil ti' tojlel lac Yum. Ma'anic tsa' la' jac'be i t'an. Tsa' la' ñusʌbe i mandar yic'ot pejtelel i cʌntesʌbal. Jini cha'an tsa' tili ti la' tojlel ili ñuc bʌ wocol, che'en.

²⁴Jeremías tsi' subeyob ti pejtelelob, yic'ot ja'el x'ixicob: Ubinla i t'an lac Yum, pejteletla ch'oyolet bʌ la ti Judá, añet bʌ la ti Egipto.

²⁵I Yum Panchan yic'ot Pañimil, i Dios Israel, woli' yʌl: Winicob yic'ot la' wijñamob, lajal tsa' la' mele che' bajche' tsa' la' wʌlʌ. Tsa' la' wʌlʌ: “Mux caj c wersa ts'ʌctesan lojon c t'an ti' tojlel jini x'ixic bʌ rey ti panchan che' bajche' tsac sube lojon. Mi caj c pulben pom. Mi caj cʌq'uen japil bʌ i majtan”, che'etla. Melela, abi, che' bajche' tsa' la' wʌlʌ.

²⁶Ubinla i t'an lac Yum, pejteletla ch'oyolet bʌ la ti Judá, añet bʌ la ti Egipto: P'isi ti la' wenta come ñucʌch j c'aba'. Tsa'ix cʌc'ʌ c t'an. Ma'anix mi caj la' chʌn pejcan j c'aba'. Ma'anix mi caj la' chʌn al ti Egipto: “Cuxul lac Yum”, mach chʌn che'etixla.

²⁷Yʌxʌlix co. Ma'anic mi caj j coltañetla. Mi caj cʌq'uetla ti wocol. Ti pejteletla ch'oyolet bʌ la ti Judá, añet bʌ la ti Egipto, mi caj la' chʌmel ti espada yic'ot ti wi'ñal jinto mi la' lu' jilel.

²⁸Jiñob jach mu' bʌ i puts'elob loq'uel ti Egipto, mu' bʌ i sujtelob ti Judá, mi caj i colelob. Ma'anic jaytiquilob. Ti la' pejtelel tsa' bʌ tiliyetla ti chumtʌl ti Egipto mi caj la' ña'tan xuc'ul c t'an. Mi caj i ts'ʌctiyel, pero mach ts'ʌctiyic la' t'an.

²⁹Mi caj cʌq'ueñet la' toj la' mul wʌ' ba' añetla. Che' talix wocol mi caj la' ña'tan wolix i ts'ʌctiyel c t'an tsa' bʌ c wʌn subeyetla, che'en.

³⁰Lac Yum woli' yʌl: P'isila ti la' wenta. Che' bajche' tsa cʌc'ʌ Sedequías rey bʌ ti Judá ti' c'ʌb Nabucodonosor rey bʌ ti Babilonia, yom bʌ i tsʌnsan, che' mi caj cʌc' Faraón Hofra rey bʌ ti Egipto ti' c'ʌb i contrajob yomo' bʌ i tsʌnsan, che'en lac Yum.