Read Chol Jeremias 48 Bible Online

Jeremias 48 - Chol bible

Jeremias 48

¹Jiñʌch i t'an i Yum Panchan yic'ot Pañimil, i Dios Israel, ti' contra Moab: Obol i bʌ Nebo, jejmenix i yotot tac. Woliyob ti quisin Quiriataim yic'ot Misgab. Tsa'ix jili i p'ʌtʌlel.

²Ma'anix i ñuclel Moab. Ya' ti Hesbón tsi' temeyob i t'an cha'an mi' contrajiñob: “Conla. La' lac jisan”, che'ob. Ñʌch'ʌl mi caj i cʌytʌl Madmena. Mi caj i laj puts'elob i winicob, ajñesʌbilob ti espada.

³Woliyob ti oñel ti Horonaim cha'an ñuc bʌ wocol. Lu' jejmen tac i yotot.

⁴Jisʌbilix Moab. C'ʌlʌl ti Zoar mi' yubintel i yuq'uel.

⁵Woliyob ti uq'uel majlel ti Luhit, come ya' ti' bijlel Horonaim tsi' yubibeyob i t'an jini woliyo' bʌ ti jisaya.

⁶Cucula ti puts'el. Coltan la' bʌ che' bajche' burro ti mate'el mach bʌ anic i yum.

⁷Tsa' la' ñopo la' coltan la' bʌ ti ts'ajquibil bʌ otot ba' lotol cabʌl chubʌ'añʌl. Jini cha'an mi caj la' cʌjchel majlel yic'ot la' dios Quemos yic'ot i motomajob yic'ot i yumob.

⁸Tal la' contra i lu' jisan la' tejclum tac yic'ot jini xchumtʌl tac ti joctʌl yic'ot ti' chañelal che' bajche' tsi' yʌlʌ lac Yum. Ma'anic la' coltʌntel.

⁹Aq'uen i wich' Moab, come yomix wejlel majlel yubil. Jochol mi caj i cʌytʌl i tejclum tac. Lu' jejmenix i yotot tac. Ma'anix i yum.

¹⁰Obol i bʌ jini am bʌ i ts'u'lel ti' ye'tel lac Yum. Obol i bʌ mu' bʌ i bajñel cʌntan i yespada ti' yotot che' pʌybilix cha'an mi' melben i ye'tel lac Yum.

¹¹C'ʌlʌl ti' cajibal tsi' mulayob alas año bʌ ti Moab. Tsi' meleyob bajche' jach yom i pusic'al. Ya' jach ti' lumal tsa' coliyob. Xuc'ul tsa' chumleyob. Ma'anic majch tsi' chocoyob loq'uel ti' yajñib. Ma'anic tsa' wersa pʌjyiyob majlel ti ñajtʌl. Jini cha'an chan mi' melob i bʌ. Mach ju'sʌbilobic i pusic'al.

¹²P'isi ti la' wenta, che'en lac Yum, tal i yorajlel che' mi caj c chocben tilel xtic'layajob mu' bʌ caj i wersa choc loq'uel Moab ti' lumal che' bajche' vino mu' bʌ la' ñusan ti jujump'ejl i yajñib. Ti wi'il mi caj i tojp'ejl jini vaso tac.

¹³Ti jim bʌ ora Moab mi caj i yubin quisin cha'an tsi' c'uxbi Quemos, che' bajche' tsi' cha'le quisin i p'olbal Israel cha'an tsi' ñopoyob lot ti Betel.

¹⁴Mi la' lon al: “Xguerrajon lojon. Wen ch'ejlon lojon. Mach cujilic lojon bʌq'uen”, che'etla.

¹⁵Talob mu' bʌ caj i jisañob Moab yic'ot pejtel i tejclum. Jini ch'iton winicob ti Moab tsa'ix majliyob ti chʌmel. Mi caj i tsʌnsʌntelob ti guerra. Che' tsi' yʌlʌ jini Rey, i Yum Panchan yic'ot Pañimil. Che'ʌch i c'aba'.

¹⁶Mach jalix mi caj i tilel ñuc bʌ wocol ti a tojlel Moab. P'is woli' tilel i tajet wocol.

¹⁷Uc'tanla Moab pejteletla mu' bʌ la' cʌn, chumulet bʌ la ti lʌc'ʌl. Subula: “Lástima, come tsa'ix bʌc' jili che' bajche' barate' che' p'ʌtʌl to, che' wen i t'ojol jax”.

¹⁸Loq'uenla ti Dibón ba' tijicñayetla. Buchi'la ti yambʌ lum mach bʌ la' cha'anic. Come tsa'ix juliyob mu' bʌ caj i jisañob Moab. Woli' jisañob ts'ajquibil bʌ la' wotot.

¹⁹Wa'i'la ti bij jini chumulet bʌ la ti Aroer. C'ajtibeñob xputs'elob chuqui woli' yujtel.

²⁰Jisʌbilix i yumʌntel Moab, jisʌbilix i ñuclel. Cha'lenla oñel yic'ot uq'uel. Subeñob xchumtʌlob ti' ti' jini Arnón cha'an jisʌbilix Moab.

²¹Dios tsi' yʌq'ueyob i toj i mul pejtel jini tejclum tac ti joctʌl. Jejmenix Holón yic'ot Jahaza yic'ot Mefaat,

²²yic'ot Dibón, yic'ot Nebo, yic'ot Bet Diblataim. La' sajtic Moab che' bajche' xyʌc'ajel, come chan tsi' mele i bʌ ti' tojlel lac Yum. La' cʌlec ti' xej. La' wajlentic,

²³yic'ot Quiriataim, yic'ot Betgamul yic'ot Betmeón,

²⁴yic'ot Queriot, yic'ot Bosra, yic'ot pejtel tejclum tac ti' lumal Moab, jini lʌc'ʌlo' bʌ yic'ot jini ñajto' bʌ.

²⁵Ma'anix i yumʌntel Moab. Ma'anix i p'ʌtʌlel cha'an mi' coltan i bʌ, che'en lac Yum.

²⁶La' i cha'len yʌc'ajel. La' i ñolq'uin i bʌ ti' xej. La' wajlentic, come chan tsi' mele i bʌ ti' tojlel lac Yum.

²⁷An a mul cha'an tsa' wajle Israel. Tsa' xujch'ibe i chubʌ'an. Tijicñayet che' bʌ tsi' yubi wocol.

²⁸Pejtel chumulet bʌ la ti Moab, loq'uenla ti la' tejclum. Mux caj la' wajñel che' bajche' xmucuy mu' bʌ i mel i c'u' ti' ti' ch'en.

²⁹La cujil wen chan mi' mel i bʌ Moab. Ñuc mi' mel i bʌ. Mi' ts'a'len yaño' bʌ. Wen ch'ejl i pusic'al cha'an i mul.

³⁰Mi' ts'a'len c t'an, che'en lac Yum. Mi' bajñel sub i bʌ ti ñuc. Wen yujil lot, yujil mich'ajel. Mach wenic i melbal.

³¹Jini cha'an mic cha'len oñel, mi cuct'an Moab yic'ot jini p'ʌtʌlo' bʌ ti Kirar.

³²Winicob ti Sibma, ñumen mi cuc'tañet bajche' i winicob Jazer, come tsa' lu' jisʌnti la' ts'usubil. Tsa' chilbentiyetla pejtel i wut te' yic'ot i ya'lel ts'usub tsa' bʌ la' loto.

³³Ma'anix c'ajbal, ma'anix tijicña bʌ. Wen ch'ijiyem i lumal Moab. Jocholix i yotlel ts'usub. Ma'anix majqui mi' pets'ben loq'uel i ya'lel. Mi' cha'leñob oñel, pero cha'an jach bʌq'uen, mach cha'anic i tijicñʌyel i pusic'al.

³⁴Mi' cha'leñob c'am bʌ t'an ya' ti Hesbón yic'ot Eleale. C'ʌlʌl ti Jahaza woli' yubintel, ya' ti Zoar c'ʌlʌl ti Horonaim yic'ot ti Eglet ja'el. Woliyob ti uq'uel, come mi caj i tiquin i ya'lel jini colem ja' Nimrim.

³⁵Ya' ti Moab mi caj cʌc' ti jisʌntel jini mu' bʌ i yʌq'uen i majtan i dios yic'ot jini mu' bʌ i pulben pom, che'en lac Yum.

³⁶Jini cha'an mic cha'len tsic pusic'al. Ch'ijiyemon che' bajche' flauta cha'an woli ti wocol Moab yic'ot jini winicob chumulo' bʌ ti Kirbares. Tsa' lu' sajti pejtel i chubʌ'an tsa' bʌ i tempayob.

³⁷Juc'bilix i jol, bocbilix i tsucti'. Tsejpemix i c'ʌb. Lʌpʌl i cha'an coxtal.

³⁸U'ucñayob ya' ti' pam i yotot yic'ot ti' bijlel tac tejclum ti pejtelel i lumal Moab, come tsac bic'ti jemeyob che' bajche' mi' tojp'el uc'um che' ma'anix majch mi' mulan, che'en lac Yum.

³⁹Ma'anix i p'ʌtʌlel. Cabʌl woliyob ti uq'uel. Woli ti quisin Moab. Woliyob ti wajleya jini año' bʌ ti' joytʌlel. Mi' cajelob ti bʌq'uen.

⁴⁰Lac Yum woli' yʌl: Jini tal bʌ ti' contra Moab mi caj i bʌc' c'otel che' bajche' xiye' welel bʌ i wich'.

⁴¹Mi caj i ch'ʌmob jini tejclum tac yic'ot ts'ajquibil bʌ i yotot tac. Jini p'ʌtʌlo' bʌ winicob ti Moab lajal mi caj i sujtelob che' bajche' x'ixicob woliyo' bʌ ti bajq'uel.

⁴²Mi caj i lu' jisʌntel Moab. Mi caj i junyajlel sajtelob ili wʌ' bʌ chumulob, come chan tsi' meleyob i bʌ ti' tojlel lac Yum.

⁴³Baqui jach mi' majlelob an bʌq'uen, an yac, an i jajp ch'en, che'en lac Yum.

⁴⁴Jini mu' bʌ i puts'tan i contra mi caj i yajlel ochel ba' tocol lum. Jini mu' bʌ i letsel loq'uel ya'i mi caj i chujquel ti yac. Come joñon mi caj c chocbeñob tilel ili uxchajp wocol ti jim bʌ ora che' mi cʌq'ueñob i toj i mul, che'en lac Yum.

⁴⁵Mi' puts'elob majlel ti Hesbón, pero ma'anic i coltʌntel come tsa'ix tejchi c'ajc ti Hesbón. Wolix ti pulel i yotot rey yic'ot jini templo tac ti Sihon i tejclum rey. Mi caj i pam ñumel jini c'ajc ti Moab. Mi caj i laj jisʌntelob i winicob tsa' bʌ i chañ'esayob i bʌ.

⁴⁶Obol a bʌ Moab. Jisʌbilob jini mu' bʌ i c'uxbiñob a dios Quemos. Cʌchbilob majlel ch'iton bʌ yic'ot xch'oc bʌ a walobilob.

⁴⁷Pero ti jini tal to bʌ ora mi caj c cha' coltan Moab, che'en lac Yum. Che'i mi caj i yujtel meloñel.