Read Chol Jeremias 5 Bible Online

Jeremias 5 - Chol bible

Jeremias 5

¹Cucu ti ñumel ya' ba'an garita tac ti Jerusalén. Wen q'uele bajche' mi' melob. Otsan ti a pusic'al. Sʌclan ñumel juntiquil mu' bʌ i mel chuqui toj ya' ti choñoñibʌl. Q'uele mi an juntiquil mu' bʌ i yotsan ti' pusic'al chuqui tac isujm cha'an mic pʌsben i yutslel c pusic'al.

²Che' mi' wa'chocoñob i t'an, mi' cha'leñob lot anquese mi' yʌlob j c'aba': “Cuxul lac Yum”, lon che'ob. Che' tsi' yʌlʌ lac Yum.

³C Yum, ¿mach ba wolic a sʌclan juntiquil mu' bʌ i sub chuqui isujm? Tsa' cʌntesayob. Tsa' jats'ʌyob ja'el cha'an mi' melob chuqui isujm. Pero ma'anic mi' p'isob ti' wenta. Tsa' wʌq'ueyob i wocol, pero mi' ts'a'leñetob. Mi' yutsi tsʌts'esañob i pusic'al che' bajche' xajlel. Mi' to'ol melob chuqui yomob. Mach yomobic i cʌy i mul.

⁴Tsa cʌlʌ tic pusic'al: Jini jach jini pobrejob mi' mel che' bajche' jini. Ma'anic mi' ch'ʌmbeñob isujm come mach cʌntesʌbilobic. Mach i cʌñʌyobic i bijlel lac Yum yic'ot i mandar.

⁵Mu' to c majlel ba'an jini ñuco' bʌ cha'an mic pejcañob, come cʌñʌlob i cha'an i bijlel lac Yum yic'ot i mandar, lon cho'on. Pero junlajal tsi' chocoyob jubel i tajbal yic'ot i cuch tsa' bʌ a wʌq'ueyob.

⁶Jini cha'an tal bajlum am bʌ ti mate'el cha'an mi' tsʌnsañob. Tal jontol bʌ ts'i' i jisañob. Woli ti chijtaya lʌc'ʌl ti tejclum. Majqui jach mi' puts'el ti tejclum mi caj i bic'ti tsijlel cha'an ti' caj tsi' ñusʌbe i t'an Dios. Cabʌl jax tsi' cʌyʌyob lac Yum.

⁷Lac Yum woli yʌl: ¿Bajche' mi mejlel c ñusʌbeñet a mul? Tsi' cʌyʌyoñob a walobilob. Tsi' wa'chocoyob i t'an ti' c'aba' jini diosob mach bʌ mero Diosic. Che' bʌ ñajobix yic'ot i bʌl i ñʌc' tsa' bʌ cʌq'ueyob, tsajniyob ti' yotot sts'i'lel bʌ x'ixicob.

⁸Lajalob bajche' tat caballo yom bʌ i ch'oclel che' mi' yujtel ti buc'bal. Jujuntiquil mi' sʌclan x'ixic am bʌ i ñoxi'al.

⁹¿Mach ba muq'uic i tojob i mul? che'en lac Yum. Joñon mi caj cʌq'uen i toj i mul jini tejclum cha'an cabʌl i mul.

¹⁰Cucu ti ts'usubil tac, pero mach ma' lu' jisan. Loc'sʌben i c'ʌb te', come mach i cha'anic lac Yum.

¹¹Come junlajalob Judá yic'ot Israel. Tsi' junyajlel cʌyʌyoñob.

¹²Cha'p'ejax i pusic'al tic tojlel. Mi' yʌlob: “Mach muq'uic i q'uelonla lac Yum. Mach talic wocol ti lac tojlel. Ma'anic mi caj lac chʌmel ti espada yic'ot ti wi'ñal.

¹³Jini x'alt'añob che' jach mi' ñumelob che' bajche' sutujt ic'. Lolom jach i t'an. Mi caj i tajob jini wocol woli bʌ i lon alob”, lon che'ob.

¹⁴I Dios Pañimil yic'ot Panchan, jiñʌch lac Yum, woli' yʌl: Tsa cubibeyob i t'an. Jini cha'an mi caj c sutq'uin ti c'ajc jini c t'an tsa' bʌ cʌq'ueyet a sub. Mi caj c sutq'uin ili winicob che' bajche' te' mu' bʌ caj i pulel ti c'ajc.

¹⁵Awilan wolic pʌy tilel winicob ñajt bʌ chumulob. Talob i contrajiñet, Israel, che'en lac Yum. Añob i p'ʌtʌlel ti wajali c'ʌlʌl wʌle. Yambʌyʌch i t'an mach bʌ a wujilic. Ma'anic ma' ch'ʌmben isujm.

¹⁶Ma'anic mi' to'ol chocob i te'el jalʌjb. Wen yujilob tsʌnsa. Laj p'ʌtʌlob jini soldadojob.

¹⁷Mi caj i lu' c'uxob a wixim yic'ot i bʌl a ñʌc'. Mi caj i jisañob ch'iton bʌ yic'ot xch'oc bʌ a walobilob. Mi caj i c'uxob a wʌlac' yic'ot a wacax. Mi caj i lu' c'uxob jini i wut a ts'usubil yic'ot i wut higuera te'. Mi caj i jisañob ti espada jini p'ʌtʌl bʌ tejclum tac la' cha'an mʌcʌl bʌ ti ts'ajc ba' lon xuc'ul la' pusic'al.

¹⁸Pero ti' yorajlel ili wocol che' mic jisañetla, ma'anic mi caj c lu' jisañetla.

¹⁹Che' mi' yʌlob: “¿Chucoch tsi' yʌq'ueyonla ili wocol jini lac Yum Dios?” che'ob, yom ma' subeñob: “Tsa' la' cʌyʌyon cha'an mi la' ch'ʌm tilel ti la' lumal i diosob jini ñajt bʌ ch'oyolob cha'an mi la' melbeñob i ye'tel. Jini cha'an mi caj la' cʌjchel majlel ti ñajt bʌ lum cha'an mi la' melbeñob i ye'tel jini winicob parte bʌ i lumal”. Che'ʌch yom ma' subeñob, che'en lac Yum.

²⁰Pam pucu jini t'an. Subeñob jini año' bʌ ti Judá yic'ot jini año' bʌ ti Israel:

²¹Ñich'tanla ti la' pejtelel. Tontojetla. Ma'anic la pusic'al. An la' wut pero ma'anic mi' c'otel la' wut. An la' chiquin, pero ma'anic mi la' wubin t'an.

²²¿Chucoch ma'anic mi la' bʌc'ñañon? che'en lac Yum. ¿Chucoch mach tsiltsilñayeticla tic tojlel? Tsa cʌc'ʌ jini ji'il che' bajche' bujtʌl ti' ti'il colem ja' cha'an ya' jaxʌl mi' c'otel ja'. Mach mejlic ti ñumel ti pejtelel ora anquese we'ecña ja', anquese chan mi' mel i bʌ. Wersa mi' jac'beñon c t'an.

²³Pero jontolob c winicob. Chan mi' melob i bʌ. Ma'anic mi' jac'ob c t'an. Tsi' cʌyʌyoñob. Tsa' caji' ch'ujutesañob jini mach bʌ Diosic.

²⁴Joñon mic chocbeñob tilel ja'al ti' yorajlel, che' woli' colel pac'. Joñon mi cʌq'ueñob i wut lum che' ti' yorajlel c'ajbal. Pero ma'anic majqui mi' p'ison ti' wenta. Ma'anic majqui mi' q'uelon ti ñuc. Ti' caj la' mul ma'anic mi' tilel ja'al. Ti' caj la' mul ma'anic i bʌl la' ñʌc'. Ma'anic c'ajbal.

²⁶Come an xjontolilob ti la' tojlel. Mi' cha'leñob chijt che' bajche' xchuc mutob. Lajalob bajche' yac mu' bʌ i ten winicob.

²⁷But'ulob i yotot cha'an chuqui tsi' tajayob ti lotiya yic'ot ti jontolil. Che' yilal bajche' chiquib but'ul bʌ ti alʌ te'lemut. Chan mi' melob i bʌ cha'an cabʌl i chubʌ'an.

²⁸Cabʌl i wo'lel ti' bʌl i ñʌc'. Jujp'emobix. Mi' ñumel ti p'is i jontolil. Mach yujilobic toj bʌ meloñel. Ma'anic mi' coltañob meba' alʌlob ti' tojlel i contra. Ma'anic mi' coltañob jini mach bʌ añobic i mul.

²⁹¿Mach ba muq'uic i tojob i mul? che'en lac Yum. Joñon mi caj cʌq'ueñob i toj i mul jini tejclum.

³⁰Leco chuqui woli' yujtel tic lum. Bʌbʌq'uen jax.

³¹Jini x'alt'añob mi' cha'leñob lot. Jini motomajob mi' melob che' bajche' bajñel yomob. Tijicñayob winicob x'ixicob, come che'ʌch mi' mulañob. Pero ¿chuqui mi caj i melob che' ti' jilibal?