Read Chol Jeremias 6 Bible Online

Jeremias 6 - Chol bible

Jeremias 6

¹Cucula ti ajñel, winicob ti Benjamín. Loq'uenla ti puts'el añet bʌ la ti Jerusalén. Wusula jini trompeta ti Tecoa. Melela c'ajc ti Bethaquerem cha'an mi' ñajtʌ q'uelob jini bats' cha'an mi' laj ña'tañob talix wocol. Talob jini yujilo' bʌ jisaya loq'uemo' bʌ ti norte.

²C'uñet Sion che' bajche' i t'ojol jax bʌ xch'oc mach bʌ yujilic e'tel. Mi caj c jisañet.

³Talob i tic'lañet jontol bʌ xcʌnta tiñʌme'ob. Mi caj i joy mʌquetob. Mi caj i chilob a lum cha'an mi' buc'sañob i yʌlac'.

⁴Wolix i tejchel guerra, talob i contrajiñet. Mi' yʌlob: “Conla cha'an mi laj c'otel che' ti xinq'uiñil. Obol lac bʌ, come wolix ti bʌjlel q'uin. Wolix i tam'an axñal.

⁵Conla. La' lac jats' che' ac'ʌlelix. La' lac jisʌbeñob i yotot jini ñuc bʌ yumʌlob”, che'ob.

⁶I Yum Panchan yic'ot Pañimil woli' yʌl: Seq'uela jubel te'el tac cha'an mi la' cha'len jats'. Much'quinla lum ti' joytʌlel jini tejclum Jerusalén. Laj xaxabil ti jontolil. Wersa mi caj i toj i mul.

⁷Che' bajche' mi' bujlel loq'uel ja' ti' loq'uib, che' ja'el mi' loq'uel jontolil ti' pusic'al jini año' bʌ ti Jerusalén. Ya' ti' bijlel tac mi' cha'leñob jats' yic'ot xujch'. Ti pejtelel ora mi cubibeñob i t'an jini lojwemo' bʌ yic'ot jini xc'amʌjelob.

⁸Jac'ʌ a cʌntesʌntel Jerusalén. La' jultesʌntic a pusic'al ame mic junyajlel tʌts' c bʌ ti a tojlel, ame mic chilbeñet a lum, che'en.

⁹I Yum Panchan yic'ot Pañimil tsi' yʌlʌ: Che' bajche' ma' cha' ñumel ti ts'usubil cha'an ma' tuc'ben i colojbal i wut, yom ma' cha' majlel ti Jerusalén, cha'an ma' jisan i colojbal winicob, che'en.

¹⁰¿Majqui mi caj c pejcan? ¿Majqui yom i yubin c t'an? Awilan laj mʌcʌlob i chiquin. Jini cha'an ma'anic mi' ch'ʌmbeñob isujm. Ts'a' mi' yubiñob c t'an i wenta a'leya. Leco mi' yubiñob.

¹¹Jini cha'an an i mich'ajel Dios tic pusic'al. Mach chʌn cujchix c cha'an. Mi caj c mich'len Jerusalén. La' i yubiñob wocol jini alp'eñelob woliyo' bʌ ti alas ti bij yic'ot jini ch'iton winicob woli bʌ i tempañob i bʌ. Mi caj i cʌjchelob majlel winicob yic'ot i yijñamob, jini xñoxo' bʌ ja'el yic'ot jini mach bʌ añobix i p'ʌtʌlel.

¹²Mi caj i chilbentelob i yotot yic'ot i jamil yic'ot i yijñamob. Mi caj i ch'ʌmob i contrajob. Joñon mi caj cʌq'ueñob i toj i mul jini chumulo' bʌ ti jini lum, che'en lac Yum.

¹³Ti pejtelob añob i mul, jini ñuco' bʌ yic'ot jini ch'o'ch'oco' bʌ. Mi' ch'ʌmob taq'uin ñumen bajche' yom. Ti pejtelelob mi' cha'leñob lotiya. Che'ʌch mi' melob ja'el jini x'alt'añob yic'ot jini motomajob.

¹⁴Jini cha'an mach lajmic i lojwel c winicob, come mi' lon alob: “Ma'anic ba' lojwemonla”, che'ob, anquese woli' chʌmelob. Jini x'alt'añob yic'ot jini motomajob mi' lon alob: “Yom ñʌch'ʌletla”, che'ob, anquese ma'anic ba' ñʌch'ʌl.

¹⁵¿Tsa' ba i yubiyob quisin che' bʌ tsi' cha'leyob jontolil? Ma'anic. Mach yujilobic quisin. Ma'anic mi' chʌc'an i wut. Jini cha'an mi caj i yajlelob yic'ot jini tsʌnsʌbilo' bʌ. Che' mi cʌq'ueñob i tojob i mul, mi caj i chʌmelob, che'en.

¹⁶Lac Yum woli' yʌl: Wa'i'la ba' mi' rusin i bʌ bij cha'an mi la' q'uel. C'ajtibenla xñumelob baqui an jini wen bʌ bij, jini oñiyix bʌ. Ya' yom mi la' cha'len xʌmbal cha'an mi la' taj i tijicñʌyel la' pusic'al. Pero tsi' yʌlʌyob: “Mach comic lojon xʌmbal ya'i”, che'ob.

¹⁷Tsac wa'chocobeyob xq'uel winicob cha'an mi' subeñob cha'an mi' ñich'tañob i t'an trompeta. Pero tsi' yʌlʌyob: “Mach comic c ñich'tan lojon”, che'ob.

¹⁸Jini cha'an ubinla chuqui mi caj c tumbeñob.

¹⁹Ubinla, pejtel cuxulo' bʌ ti pañimil: Awilan, wolix c choc tilel wocol ti' tojlel ili c tejclum. Mi caj i tojob i mul come ma'anic tsi' jac'ʌyob c t'an. Tsi' juch'teq'ueyob j cʌntesʌbal.

²⁰Lolom jach mi la' ch'ʌmbeñon tilel pom ch'oyol bʌ ti Seba yic'ot canela ch'oyol bʌ ti ñajtʌl. Mach uts'atic mij q'uel c majtan ti la' c'ʌb. Lolom jach mi la' wʌq'ueñon c majtan ti pulʌntib. Mach xojocñayic mi cubin, che'en.

²¹Jini cha'an lac Yum woli' yʌl: Woli cʌc' xajlel ti bij ba' mi caj i jats'ob i yoc winicob yic'ot i yalobilob, yic'ot i pi'ʌlob yic'ot i cʌñʌyo' bʌ.

²²Woli' yʌl lac Yum: Talob winicob ch'oyolo' bʌ ti norte. Woli' yutsi p'ojlel i p'ʌtʌlel ya' ti' ñajtʌlel pañimil.

²³Wen yujilob julbʌl. Chuculob i cha'an espada. Jontolob. Mach yujilobic p'untaya. Ju'ucñayob ti t'an che' bajche' colem ñajb. C'ʌchʌlob woli' tilelob, chajpʌbilob cha'an guerra. Mi caj i contrajiñet, xch'oc bʌ calobil Sion, che'en lac Yum.

²⁴Ubibilix lac cha'an bajche' woli' melob. Jini cha'an c'unix laj c'ʌb. Woliyonla ti wocol che' bajche' x'ixic woli bʌ ti bajq'uel.

²⁵Machme a majlel ti jamil. Mach yomic ma' majlel ti bij, come ya'ʌch an laj contra chucul bʌ i cha'an espada. Bʌbʌq'uen jax baqui jach mi lac majlel.

²⁶Lʌpʌ coxtal, Jerusalén, c'uxbibilet bʌ i cha'an c pi'ʌlob. Bʌlchocon a bʌ ti' tʌñil c'ajc. Cha'len uq'uel che' bajche' x'ixic mu' bʌ i yuc'tan cojach bʌ i yalobil. Mele a pusic'al, come wolix i bʌc' tilel wocol ti lac tojlel.

²⁷Lac Yum tsi' subeyon: Jeremías, tsa cʌq'ueyet a we'tel cha'an ma' wen q'uel c tejclum bajche' añob yic'ot bajche' mi' melob.

²⁸Laj sajtemob. Mi' tʌts'ob i bʌ tic tojlel. Mi' p'ajoñob. Tsʌtsob i pusic'al che' bajche' fierro yic'ot c'ʌnc'ʌn taq'uin. Sojquem i pusic'al.

²⁹Woli' wejluntel c'ajc cha'an mi' ticwan. Chʌquix c'ajc cha'an mi' sʌq'uesañob. Pero lolom jach. Mach loq'uic i bibi'lel. Ma'anic mi ts'ita'ic i wenlel. Junyajlel sajtem i pusic'al.

³⁰Lajalob bajche' i ta'il plata. Anquese wen ticʌw jini c'ajc, ma'anic mi' bʌc'ñañob. Mi' chʌn cha'leñob jontolil. Che' tsi' yʌlʌ lac Yum.