Read Chol Ezequiel 1 Bible Online

Ezequiel 1 - Chol bible

Ezequiel 1

¹Joñon Ezequielon (i yalobilon Buzi). Motomajon* chumulon quic'ot c pi'ʌlob israelob tsa' bʌ cʌjchiyob majlel ti Babilonia. I jo'p'ejlelix jab che' cʌchʌl jini rey Joaquín. Ya' añon lojon ti' ti' ñoj ja' i c'aba' Quebar. Ti jump'ejl q'uin che' ti' jilibal junio che' anix lujump'ejl i cha'c'al (30) c jabilel, tsaj q'uele tsa' jajmi jini panchan ti' tojel c wut. An chuqui tilem ti Dios.

⁴Che' bʌ tsaj can q'uele pañimil, tsa' bʌc' tili p'ʌtʌl bʌ ic' ti norte yic'ot colem tocal. Ya' ti' yojlil tocal woli' lejmel c'ajc chʌc xowan i c'ʌc'al ti' joytʌlel. Ya' ti' yojlil jini c'ajc an chuqui tsa' tsictiyi che' bajche' c'ʌnc'ʌn taq'uin.

⁵Ya' tsa' loq'uiyob tilel chʌntiquil cuxulo' bʌ. Che'ʌch yilalob bajche' winic.

⁶Ti jujuntiquil an chʌmp'ejl i wut yic'ot chʌnq'uejl i wich'.

⁷Toj i ya' yic'ot i yoc che' bajche' i cuctal winic, pero lajal i mal i yoc bajche' i yoc wacax. Ts'ʌylaw i yoc che' bajche' c'ʌnc'ʌn taq'uin.

⁸Ti yebal jini chʌnq'uejl i wich' an i c'ʌb che' bajche' i c'ʌb winic. An tac i wut yic'ot i wich' ti chʌnwejlel.

⁹Jini i wich' tac tsi' laj bʌ tajayob i bʌ. Che' bʌ tsa' majliyob, ma'anic tsi' mʌyʌyob i wut. Toj jach tsa' majliyob ti jujuntiquilob.

¹⁰Che' yilal i wut am bʌ ti' tojel che' bajche' i wut winic. Jini am bʌ ti' ñoj che' yilal bajche' i wut bajlum. Jini am bʌ ti' ts'ej che' yilal bajche' i wut tat wacax. Jini am bʌ ti' pat i jol che' yilal bajche' i wut xiye'. Chʌmp'ejl i wut ti jujuntiquil.

¹¹Che'ʌch yilal i wut. Che' lich'il junlajm i wich' ya' ti chan tsi' laj bʌ tajayob i bʌ. Yambʌ junlajm i wich' tsi' moso i bʌc'tal.

¹²Ti jujuntiquil tsa' majli ti' bijlel ya' baqui tsi' pʌyʌ majlel i ch'ujlel. Ma'anic tsi' sutq'uiyob i bʌ baqui jach tsa' majliyob, come an i wut ti' chʌnwejlel.

¹³Ya' ti' tojlel jini cuxulo' bʌ tsaj q'uele che' bajche' i nich c'ajc woli bʌ ti lejmel, che' bajche' chʌcxowan bʌ c'ajc woli bʌ ti xʌmbal ti' tojlel jini cuxulo' bʌ. Ñajtʌ tsiquil che' bajche' i c'ʌc'al taj woli bʌ ti lejmel. Ya' tsa' loq'ui i xu'il chajc.

¹⁴Jini cuxulo' bʌ tsi' cha'leyob ajñel. Tsa' ts'ʌjyi che' bajche' i xu'il chajc.

¹⁵Che' bʌ tsac chʌn q'uele jini cuxulo' bʌ, tsaj can q'uele an chuqui xotol ti lum ti yebal i yoc. Ti jujuntiquil an i cha'an jini xotol bʌ tsucu taq'uin ya' ti' t'ejl.

¹⁶Jini xotol bʌ tsucu taq'uin melbil ti ambar yilal. Junlajal ti' chʌnxojtlel. Ti jujunxojt an yambʌ xotol bʌ tsucu taq'uin ti yojlil.

¹⁷Baqui jach tsi' cha'leyob xʌmbal toj tsa' majliyob ti' tojel i wut. Ma'anic tsi' sutq'uiyob i bʌ.

¹⁸Jini chʌmp'ejl xotol bʌ tsucu taq'uin an i xottʌlel yic'ot sʌpʌl tac bʌ ti' yojlil. Joy an i wut ti' xottʌlel.

¹⁹Che' bʌ tsi' cha'leyob xʌmbal jini cuxulo' bʌ, jini selel bʌ tsucu taq'uin tsa' tem majli yic'otob. Che' bʌ tsa' letsiyob majlel jini cuxulo' bʌ, tsa' letsi ja'el jini selel bʌ tsucu taq'uin.

²⁰Baqui jach tsi' pʌyʌyob majlel i ch'ujlel ya'i tsa' majliyob, come ya' tsa' ajni i ch'ujlel ya' ti selel bʌ.

²¹Che' bʌ tsi' cha'leyob xʌmbal jini cuxulo' bʌ, tsa' majliyob yic'ot jini selel tac bʌ. Che' bʌ tsa' wa'leyob, tsi' cʌyʌ xʌmbal ja'el. Che' bʌ tsa' letsiyob, tsa' letsi ja'el yic'otob, come ya' tsa' ajni i ch'ujlel jini cuxulo' bʌ ti jini selel tac bʌ.

²²Ya' ti' chañelal jini cuxulo' bʌ an jini panchan che' bajche' espejo. Wen i t'ojol jax.

²³Che' lich'il tac i wich' ti jujuntiquilob, tsi' laj bʌ tajayob i bʌ ti junlajm i wich'. Ti yambʌ junlajm i wich' tsi' mosoyob i bʌc'tal.

²⁴Che' bʌ tsa' majliyob, tsa cubibe i t'an i wich' che' bajche' i t'an but'ja', che' bajche' i t'an chajc tilem bʌ ti Dios, che' bajche' i t'an motocña bʌ winicob. Che' bʌ tsa' wa'leyob, tsi' ju'sayob i wich'.

²⁵Che' bʌ jubemobix i wich', tsa' loq'ui tilel t'an ti panchan.

²⁶Ya' ti chañelal jini panchan tsaj q'uele i buchlib rey yilal melbil bʌ ti zafiro xajlel. Ya' buchul juntiquil lajal bʌ bajche' winic ti q'uelol.

²⁷Ya' ti' chañelal i cajchiñʌc' c'ʌlʌl ti' jol tsaj q'uele che' bajche' c'ʌntsʌñan bʌ c'ʌnc'ʌn taq'uin, lajal bajche' c'ajc ti' joytʌlel. Ti yebal i cajchiñʌc' che' yilal bajche' c'ajc, chʌcxowan bʌ i c'ʌc'al, che' bajche' t'oxja' mu' bʌ i pʌs i bʌ che' ñumeñix ja'al. Che'ʌch yilal i sʌclel am bʌ ti' joytʌlel. Che'ʌch yilal i ñuclel lac Yum. Che' bʌ tsaj q'uele, tsa' ñuc yajliyon ti lum. Tsa cubi wolic pejcʌntel.