Read Chol Ezequiel 12 Bible Online

Ezequiel 12 - Chol bible

Ezequiel 12

¹Tsa' tili i t'an lac Yum ba' añon:

²I yalobil winic, wʌ' chumulet ti' tojlel xñusa t'añob. Añob i wut, pero ma'anic mi' c'otel. Añob i chiquin, pero ma'anic mi' yubiñob

³come laj xñusa t'añob. Jini cha'an i yalobil winic, yom ma' chajpan a chubʌ'an cha'an ma' ch'ʌm majlel a wic'ot che' cʌchʌl ma' majlel ti yambʌ lum. La' i q'ueletob a pi'ʌlob che' ma' majlel. Yom ma' pam ñumel ti jujump'ejl lum che' bajche' jini cʌchʌlo' bʌ. Tic'ʌl mi che' mi' q'ueletob, mi caj i ch'ʌmbeñob isujm anquese xñusa t'añob.

⁴Ti q'uiñil che' cañal i wut che' woli' q'ueletob, yom ma' ch'ʌm majlel a chubʌ'an che' bajche' xcʌjchelob. Ti ic'ajel la' i q'ueletob pejtelel winicob che' lujbeñet cha'an al bʌ a cuch yic'ot wocol.

⁵La' i q'ueletob che' ma' toc jini ts'ajc cha'an ma' loq'uel ba' tocol.

⁶La' i q'ueletob che' ma' cuch majlel a chubʌ'an ti ac'ʌlel. Yom ma' lich mos a wut cha'an ma'anic ma' q'uel ba' ma' majlel, come jiñʌch i yejtal bajche' mi caj i majlelob jini israelob. Che' tsi' subeyon lac Yum.

⁷Jini cha'an che'ʌch tsac lu' mele che' bajche' tsi' subeyon lac Yum. Tsac loc'sa c chubʌ'an ti q'uiñil cha'an mic wersa pʌjyel majlel. Che' ti ac'ʌlel tsa' c'unte' caji c toc jini ts'ajc. Che' ac'ʌlelix tsa' loq'uiyon majlel. Tsaj q'ueche loq'uel c chubʌ'an ti' wut pejtelel winicob.

⁸Ti yijc'ʌlal tsa' tili i t'an lac Yum ba' añon:

⁹I yalobil winic, jini xñusa t'añob ti Israel woli' c'ajtiñob isujmlel pejtelel woli bʌ a mel.

¹⁰Subeñob ili t'an: “Lac Yum Dios woli' yʌl: Jini woli bʌ la' q'uel i yejtalʌch bajche' mi caj i pʌjyel majlel ti wocol jini rey Sedequías yic'ot pejtelel jini ya' bʌ chumulob ti Jerusalén.

¹¹Che' bajche' wolic mel, che'ʌch mi caj la' wujtel. Cʌchʌl mi caj la' pʌjyel majlel ti ñajt bʌ pañimil.

¹²Sedequías, jini ñuc bʌ yumʌl i cha'añob, mi caj i q'uech loq'uel i chubʌ'an che' ti ac'ʌlel. Wocol mi caj i loq'uel majlel ba' tocol jini ts'ajc. Muq'uix i mos i wut che' mi' loq'uel, come ma'anix mi caj i chʌn q'uel pañimil.

¹³Mi caj c chuc che' bajche' ti yac. Cʌchʌl mi caj c pʌy majlel ti Babilonia ti' lumal jini caldeojob, pero ma'anic mi caj i q'uel jini lum. Ya'i mi caj i chʌmel.

¹⁴Pejtelel i winicob, i yaj cʌntayajob yic'ot soldadojob, mi caj c pam pucob ti pejtelel pañimil. Mi caj cajñesañob ti guerra.

¹⁵Ti jim bʌ ora mi caj i ña'tañob i Yumon che' pam pujquemobix ti yan tac bʌ lum.

¹⁶Pero mi caj j coltan lamital ame laj jisʌnticob yic'ot espada, yic'ot wi'ñal, yic'ot jontol bʌ c'amʌjel. Jini mu' to bʌ i cʌytʌlob mi caj i cha' ña'tañob pejtelel i jontolil come i Yumoñʌch”. Che' yom ma' subeñob. Che' tsi' yʌlʌ lac Yum.

¹⁷Tsa' cha' tili i t'an lac Yum ba' añon:

¹⁸I yalobil winic, c'uxu a waj yic'ot bʌq'uen. Tsiltsilña mi caj a jap ja'.

¹⁹Subeñob jini wʌ' bʌ chumulob: “Woli' yʌl lac Yum i Dios jini año' bʌ ti Jerusalén yic'ot ti Israel: Mi caj i c'uxob i waj yic'ot bʌq'uen. Tsiltsilñayob mi caj i japob ja', come mi caj i jilel pejtel i wenlel i lumal cha'an i jontolil jini wʌ' bʌ chumulob.

²⁰Jochocña mi caj i cʌytʌl pejtelel la' tejclum tac, yic'ot pejtelel la' lumal. Mi caj la' ña'tan la' Yumon”. Che' tsi' yʌlʌ lac Yum.

²¹Tsa' cha' tili i t'an lac Yum ba' añon.

²²I yalobil winic, ¿chuqui isujmlel jini t'an mu' bʌ i yʌlob?: “Woli' ñumel q'uin tac, pero ¿bacan tsiquil chuqui woli' lon alob x'alt'añob?” che'ob.

²³Jini cha'an subeñob: “Lac Yum Dios woli' yʌl: Mi caj cʌc' ti ñajʌyel ili t'an. Ma'anix ba' ora mi' cajel ti chʌn ajlel, come tsa' c'oti i yorajlel che' mi caj i lu' ts'ʌctiyel che' bajche' tsa cʌlʌ.

²⁴Jini xlot bʌ x'alt'añob ma'anix mi caj i chʌn tijicñesʌbeñob i pusic'al israelob yic'ot i lot. Ma'anic mi caj i to'ol jilel i t'an c winicob ja'el.

²⁵Come Yumʌlon. Pejtelel chuqui mic sub mi' caj ti ts'ʌctiyel. Mach jalix mi caj i yujtel, come wersa mi' yujtel che' cuxulet to la. Ti' caj la' jontolil mi caj i tilel jini wocol ti la' tojlel”, che'en lac Yum Dios.

²⁶Tsa' tili i t'an lac Yum ba' añon:

²⁷I yalobil winic, woli to i yʌlob jini israelob: “Jal to mi' caj ti ujtel jini woli bʌ i tsictesan. Woli jax to i wʌn tsictesan chuqui mi caj i yujtel ti' jilibal pañimil”, lon che'ob.

²⁸Jini cha'an subeñob ili t'an: “Lac Yum Dios woli' yʌl: Mach jalix mi' caj ti ujtel pejtelel chuqui tsac subeyetla. Wersa mi' caj ti ts'ʌctiyel”, che'en. Jiñʌch i t'an lac Yum Dios.