Read Chol Ezequiel 14 Bible Online

Ezequiel 14 - Chol bible

Ezequiel 14

¹Tsa' tiliyob ba' añon jini xñoxob ti Israel cha'an mi' c'ajtibeñoñob i t'an lac Yum.

²Tsa' tili i t'an lac Yum ba' añon:

³I yalobil winic, pejtelel ili winicob tsa'ix i yʌc'ʌyob i pusic'al cha'an mi' ch'ujutesañob dioste'. Tsi' yʌc'ʌyob i pusic'al ba' mi' yutsi tajob i sojquemal. ¿Yom ba' mi' tilelob i c'ajtibeñon chuqui yomob?

⁴Jini cha'an yom ma' subeñob: “Lac Yum Dios woli' yʌl: Majqui jach tsi' yʌc'ʌ ti' pusic'al dioste' yic'ot majqui jach tsi' ñopo i mel jontolil, mi tsa' tili ti c'ajtiya ti' tojlel x'alt'an, joñon mi caj c tsictesʌben i mul cha'an tsi' p'ojlesa dioste' tac.

⁵Che' jini mi caj c jec'beñob i pusic'al jini israelob, come tsi' tʌts'ʌyob i bʌ tic tojlel cha'an mi' ch'ujutesañob jini dioste' tac”.

⁶Jini cha'an yom ma' subeñob ili t'an jini israelob: “Che'ʌch woli' yʌl lac Yum Dios: Cʌyʌx la' mul, mach mi la' chʌn ch'ujutesan jini dioste' tac. Yom mi la' cʌy pejtelel chuqui tac ts'a'lebil c cha'an.

⁷Mi caj cʌq'ueñob i toj i mul pejtel israelob yic'ot jini chumulo' bʌ ti Israel ñajt bʌ ch'oyolob mu' bʌ i cʌyoñob cha'an mi' ch'ujutesañob jini dios tac. Jujuntiquil woli' bajñel yajcan i bijlel mulil. Che' mi' tilel i c'ajtin i coltʌntel ti' tojlel jini x'alt'an, joñon mi caj c tsictesʌben i mul.

⁸Mi caj c pʌsben c mich'lel jini winic. Mi caj cotsʌben i bʌq'uen yic'ot quisin. Mi caj c choc loq'uel ti' tojlel c cha'año' bʌ. Mi caj la' ña'tan la' Yumon.

⁹Che' mi' bajñel cha'len t'an jini x'alt'an jiñʌch lot. Mach che'ic mi caj i yujtel bajche' tsi' yʌlʌ. Joñon mi caj j contrajin jini x'alt'an. Mi caj c jisan ti' tojlel c tejclum Israel.

¹⁰Junlajal mi caj i tajob wocol jini payxo x'alt'añob yic'ot jini cha'p'ejlob jax bʌ i pusic'al. Mi caj i tojob i mul.

¹¹Che' jini, ma'anix mi caj i chʌn cʌyoñob jini israelob. Ma'anix mi caj i chʌn melob chuqui jontol. Mi caj i yochelob tic tejclum. Mi caj c sujtel ti' Dios. Jiñʌch i t'an lac Yum Dios”. Che' yom ma' subeñob, che'en.

¹²Tsa' tili i t'an lac Yum ba' añon:

¹³I yalobil winic, subeñob: “Mi caj c chilbeñob i bʌl i ñʌc' che' mi' ñusañob c mandar cha'an i tsʌtslel i pusic'al. Mi caj c chocbeñob tilel wi'ñal. Che' jini mi caj c jisañob yic'ot i yʌlac'.

¹⁴Wʌ'ic chumulob Noé yic'ot Daniel yic'ot Job ti' tojlelob, ma'anic i p'ʌtʌlel cha'an mi' coltañob. I bajñelob jach mi' colelob jini tojo' bʌ cha'an ti wen bʌ i melbalob, che'en lac Yum Dios.

¹⁵Che' mic choc tilel jontol bʌ bʌte'el cha'an mi' lu' jisañob, ma'anix majqui mi caj i chʌn cʌytʌl ti pañimil.

¹⁶Isujm mic subeñetla, che'en lac Yum Dios, wʌ'ic chumulob jini uxtiquil winicob, mach mejlic i coltañob jini tejclumob. I bajñelob jach mi' coltʌntelob yic'ot i yalobilob. Jochol mi caj i cʌytʌl jini lum.

¹⁷Che' mic choc tilel guerra cha'an mi' laj jisʌntelob yic'ot espada, ma'anic bajche' mi caj i coltʌntelob.

¹⁸Isujm mic subeñet, che'en lac Yum Dios, wʌ'ic chumulob ili uxtiquilob, mach mejlic i coltañob jini tejclumob. I bajñelob jach mi' tajob i coltʌntel.

¹⁹Che' mij contrajiñob yic'ot jontol bʌ c'amʌjel, mi caj i laj jisʌntelob yic'ot pejtelel cotol tac bʌ.

²⁰Isujm mic subeñetla, che'en lac Yum, wʌ'ic chumulob Noé yic'ot Daniel yic'ot Job ti' tojlelob, i bajñelob mi' tajob i coltʌntel cha'an toj bʌ i melbalob.

²¹Lac Yum Dios woli' yʌl: Talix chʌnchajp ñuc bʌ wocol cha'an mi' jisan pejtelel cuxulo' bʌ ti Jerusalén: guerra, wi'ñal, jontol bʌ bʌte'el, yic'ot jontol bʌ c'amʌjel.

²²Mi an mu' bʌ i ñusañob, mi cuxulob mi' tilelob wʌ' ba' cʌjchemetla ti Babilonia, mi caj la' q'uel wen jontolob. Mi caj la' ña'tan tsac jisa jini chumulo' bʌ ti Jerusalén ti' caj i mul.

²³Mi caj i ñuq'uesʌntel la' pusic'al che' mi la' ña'tan tsac melbeyob che' bajche' an i melbalob. Ma'anic tsac to'ol aq'ueyob wocol”. Che' yom ma' subeñob, che'en lac Yum Dios.