Read Chol Ezequiel 16 Bible Online

Ezequiel 16 - Chol bible

Ezequiel 16

¹Lac Yum tsi' cha' subeyon: I yalobil winic, yom ma' subeñob i mul jini chumulo' bʌ ti Jerusalén.

³Subeñob: “Lac Yum Dios woli' subeñetla wʌ' ti Jerusalén: Lajalet che' bajche' i p'olbal Canaán. Amorreo a tat, heteo a ña'.

⁴Che' bʌ tsa' wila pañimil, ma'anic tsa' tsejpi a mujc. Ma'anic majch tsi' ts'ʌnsayet ti ja' yic'ot ats'am. Ma'anic tsa' cʌjchi a ñʌc'.

⁵Ma'anic majch tsi' c'uxbiyet cha'an mi' wen q'uelet che' bʌ tsa' wila pañimil. Tsa' jach chojquiyet ti pañimil. Ts'a'lebilet che' ba' ora tsa' wila pañimil.

⁶Pero che' bʌ tsa' ñumiyon tsaj q'uele wen bibi'et ti a ch'ich'el. Tsac subeyet che' pʌjq'uemet ti a ch'ich'el: La' coliquet, cho'on.

⁷Joñon tsaj cosayet che' bajche' jini te'el ti pañimil. Che' bʌ tsa' taja a colel chañet, p'ʌtʌlet. Wen a t'ojol jax che' bʌ tsa' coli a chu', che' bʌ tsa' tam'a i tsutsel a jol, pero ma'anic a pislel.

⁸Che' bʌ tsa' cha' ñumiyon ti a t'ejl, tsaj q'uele x'ixiquetix cajel. Che' jini tsac pʌyʌyet. Tsac bʌc'ʌyet tic pislel. Tsa cʌq'ueyet a pislel cha'an ma' lʌp. Tsac pejcayet, tsa' ochiyonla ti trato. Che' jini tsa' ochiyet tic cha'an.

⁹Tsac pocoyet ti ja' cha'an mic loc'san a ch'ich'el am bʌ ti a bʌc'tal. Tsac boñoyet ti aceite.

¹⁰Tsac xojbeyet jini joch'bil bʌ a bujc yic'ot a zapato melbil bʌ ti pʌchi. Tsa cʌq'ueyet a cajchiñʌc' melbil bʌ ti lino bʌ pisil yic'ot seda bʌ a bujc.

¹¹Tsaj cʌchbeyet a ch'ʌjlil cadena melbil bʌ ti oro ti a bic' yic'ot ti a c'ʌb, yic'ot a wuj.

¹²Tsa cʌc'ʌ xotol bʌ ti a ñi' yic'ot a wuya' ti a chiquin. Tsaj c'ʌcchocobeyet corona ti a jol.

¹³Che' jini tsac ch'ʌlʌyet ti oro yic'ot ti plata yic'ot fino bʌ pisil melbil bʌ ti lino yic'ot seda, yic'ot joch'bil bʌ a bujc. Tsa' c'uxu wen uts'at tac bʌ i bʌl a ñʌc', pan yic'ot chab yic'ot aceite. Wen a t'ojol jax tsa' q'uejliyet che' bajche' x'ixic bʌ rey.

¹⁴Tsa' cʌjñiyet ti pejtelel pañimil cha'an wen a t'ojol jax. Wen uts'at tsa' q'uejliyet cha'an c wenlel tsa' bʌ cʌq'ueyet, che'en lac Yum Dios.

¹⁵Tsa' lon ña'ta a bajñel wenlelʌch. Tsa' caji a bajñel chañ'esan a bʌ cha'an a t'ojol jax. Che' jini tsa' caji a cha'len ts'i'lel yic'ot pejtelel winicob tsa' bʌ ajni awic'ot.

¹⁶Tsa' c'ʌñʌ a bujc cha'an i ch'ʌjlil jini pulʌntib i cha'an dioste' tac. Che' jini tsa' cha'le ts'i'lel. Ma'anic ba' tsa' ujti bajche' iliyi ti pejtelel ora. Ma'anix mi caj i chʌn ujtel.

¹⁷Che' ja'el tsa' c'ʌñʌ a ch'ʌjlil melbil bʌ ti oro yic'ot plata tsa' bʌ cʌq'ueyet, jini wen i t'ojol jax bʌ, cha'an ma' mel dioste' tac. Jiñʌch a ts'i'lel.

¹⁸Tsa' ch'ʌmʌ a bujc cha'an ma' xojbeñob a diosob. Tsa' c'ʌñʌ jini aceite yic'ot pom tsa' bʌ cʌq'ueyet cha'an ma' ch'ujutesañob.

¹⁹Jini c waj yic'ot harina yic'ot aceite yic'ot chab tsa' bʌ cʌq'ueyet tsa' wʌq'ueyob che' bajche' xojocña bʌ i yujts'il majtañʌl, che'en lac Yum Dios.

²⁰Mach cojic jach jini, pero tsa' tsʌnsʌbeyob a walobilob, ch'itoñob yic'ot xch'ocob tsa' bʌ cʌq'ueyet. Tsa' puluyob ti c'ajc cha'an i majtan. Ma'anic tsa' jastiyiyet yic'ot a ts'i'lel.

²¹Tsa' tsʌnsa calobilob cha'an ma' pulbeñob i majtan dioste' tac.

²²Ti pejtelel ili a mul yic'ot a ts'i'lel mach c'ajalix a cha'an bajche' añet che' xch'oquet to, che' pits'ilet, che' ma'anic a pislel, che' pʌjq'uemet ti a ch'ich'el.

²³Awilan, tal a wocol cha'an pejtelel a jontolil, che'en lac Yum Dios.

²⁴Come tsa' wa'chocobe i yotlel dioste' tac ti plaza,

²⁵yic'ot ti pejtelel i bijlel tejclum ba' ma' ñocchocon a bʌ ti' wut pejtelel xñumelob. Ma' pʌsben a bʌc'tal majqui jach mi' pejcañet. Cabʌl ma' cha'len ts'i'lel yic'ot pejtel pañimil.

²⁶Tsa' cha'le ts'i'lel yic'ot winicob ti Egipto cha'an ma' techbeñon c mich'ajel.

²⁷Jini cha'an tsa' caji j contrajiñet. Tsac ts'ita' chilbeyet i bʌl a ñʌc'. Tsa cotsayet ti' wenta jini filisteojob mu' bʌ i ts'a'leñetob come mach a wujilic quisin.

²⁸Tsa' cha'le ts'i'lel ja'el che' bʌ tsa' mele trato yic'ot jini asiriajob, che' bʌ tsa' ch'ujutesa i diosob. Mach jasʌlic tsa' wubi.

²⁹Tsa' ch'ujutesa i diosob año' bʌ ti Babilonia che' bʌ tsa' cha'le choñoñel yic'ot mʌñoñel. Mach jasʌlic tsa' wubi ja'el.

³⁰¡Wen tsʌtsatax a pusic'al! che'en lac Yum Dios. Come lajal pejtelel chuqui tac tsa' mele che' bajche' mi' mel sts'i'lel bʌ x'ixic mach bʌ yujilix quisin.

³¹Tsa' wa'chocobe i yotlel dios tac ti' chañelal jujump'ejl bij, yic'ot ti jujump'ejl plaza ti tejclum. Ñumen jontolet che' bajche' sts'i'lel bʌ x'ixic mu' bʌ i c'ajtin i tojol. Ti chejachi tsa' wʌc'ʌ a bʌ cha'an i mulʌntel a jontolil.

³²Tsa' cʌyʌ a ñoxi'al cha'an ma' wajñel yic'ot winicob mach bʌ a cʌñʌyobic.

³³Jini sts'i'lel bʌ x'ixic yujil i ch'ʌmol i majtan, pero jatet tsa' wʌq'ueyob i majtan winicob cha'an mi' pi'leñetob.

³⁴Mach lajaletic bajche' yaño' bʌ sts'i'lel x'ixicob. Come ma'anic majch tsi' bajñel ña'ta tilel i pejcañet, jini cha'an tsa' pʌsbeyob i tojol cha'an ma' pʌyob tilel. Ma'anic chuqui tsa' aq'uentiyet ti a majtan.

³⁵Wʌle, sts'i'lel bʌ x'ixic, ñich'tʌben i t'an lac Yum Dios.

³⁶Lac Yum Dios woli' yʌl: Quisintic jax tsa' pʌsʌ a bʌc'tal che' bʌ tsa' cha'le ts'i'lel. Tsa' ch'ujutesa jini dioste' tac. Tsa' wʌc'ʌ a walobilob ti tsʌnsʌntel cha'an i majtan.

³⁷Jini cha'an wʌle muq'uix caj c tempan pejtelel jini winicob tsa' bʌ i poj tijicñesʌbeyet a pusic'al, pejtelel jini winicob tsa' bʌ a c'uxbiyob, yic'ot jini tsa' bʌ a ts'a'leyob. Ti pejtelel pañimil mi caj c pʌyob tilel ti a tojlel. Mi caj c jochbeñet a bujc cha'an mi' q'ueletob che' pits'ilet.

³⁸Che' jini mi caj cʌq'ueñet a toj a mul che' bajche' sts'i'lel bʌ x'ixic yic'ot stsʌnsa.

³⁹Mi caj cʌq'uet ti jilel ti' c'ʌb jini winicob. Mi caj i jemob i yotlel tac a diosob yic'ot pulʌntib tac. Mi caj i jochbeñet a pislel. Pejtelel a ch'ʌjlil mi caj i ch'ʌmob majlel. P'ump'un jax mi caj i cʌyet.

⁴⁰Mi caj i pʌyob tilel cabʌl soldadojob ti a contra cha'an mi' julet ti xajlel. Mi caj i jisañet ti espada.

⁴¹Mi caj i pulob a wotot. Mi caj cʌq'ueñet a toj a mul ti' wut cabʌl x'ixicob cha'an ma' cʌy a ts'i'lel yic'ot cha'an ma' cʌy a ch'ujutesan dioste' tac.

⁴²Mi caj j contrajiñet jinto mi' lajmel c mich'lel. Mi caj c cha' uts'an. Ma'anix mi caj c chʌn contrajiñet.

⁴³Wʌle mich'on ti' caj a melbal, come mach c'ajalic a cha'an bajche' añet che' xch'oquet to che' bʌ tsaj coltayet. Jini cha'an mi caj cʌq'ueñet a toj pejtelel chuqui tsa' mele, come tsa' utsi p'ojlesa a mul yic'ot a ts'i'lel cha'an tsa' cʌyʌyon, che'en lac Yum Dios.

⁴⁴Awilan, pejtelel yujilo' bʌ ch'och'oc tac bʌ t'an ñuc tac bʌ i sujmlel mi caj i subeñet: Che' bajche' a ña', che'ʌch i yalobil, che'ob.

⁴⁵I yalobilet x'ixic tsa' bʌ i ts'a'le i ñoxi'al yic'ot i yalobilob. I yijts'iñet x'ixicob tsa' bʌ i ts'a'leyob i ñoxi'al yic'ot i yalobilob. Jiñʌch hetea a ña', amorreo a tat.

⁴⁶Jini ñaxan bʌ a chich jiñʌch Samaria ya' bʌ chumul yic'ot xch'oc bʌ i yalobilob ti' tojel norte. Jixcu la' wijts'in jiñʌch Sodoma yic'ot i yalobilob ya' bʌ chumulob ti' tojel sur.

⁴⁷Mach cojic jach tsa' tsajcʌbeyob i melbalob yic'ot i jontolil, pero ñumen leco chuqui tsa' mele.

⁴⁸Isujm mic subeñet, che'en lac Yum Dios, jini a chich ya' ti Sodoma yic'ot xch'oc bʌ i yalobilob ma'anic tsi' p'ojlesayob i jontolil che' bajche' jatet yic'ot jini xch'oc bʌ a walobilob.

⁴⁹Awilan jiñʌch i mul a wijts'in ti Sodoma. Tsi' chañ'esa i bʌ, tsi' ñaj'esa i bʌ yic'ot cabʌl i bʌl ñʌc'ʌl. Ma'anix tsi' chʌn ñopo i mel chuqui uts'at, junlajal xch'oc bʌ i yalobilob. Ma'anic tsi' coltayob jini p'ump'uño' bʌ. Ma'anic tsi' p'ʌtesayob jini año' bʌ i wocol.

⁵⁰Cabʌl tsi' lon chañ'esayob i bʌ. Tsi' ch'ujutesayob dioste' tac ti' tojel c wut. Jini cha'an tsac chocoyob loq'uel tic tojlel.

⁵¹Awilan mach cabʌlic i mul Samaria che' bajche' a mul, pero ñumen tsa' ch'ujutesa dioste' tac che' bajche'ob. Ti a tojlel ma'anic i mul a chich yic'ot a wijts'in yilal, come c'ax cabʌl tsa' mele jontolil.

⁵²Jini cha'an yom ma' cha'len quisin cha'an a mul tsa' bʌ a mele, come ñumen leco chuqui tac tsa' mele. Ti' caj a mul toj yilal a chich.

⁵³Pero mi caj c cha' pʌy tilel jini loq'uemo' bʌ ti Judá yic'ot jini año' bʌ ti Sodoma, yic'ot ti Samaria,

⁵⁴cha'an ma' wubin quisin cha'an pejtelel chuqui tac tsa' mele. Che' mi' q'ueletob yic'ot a wocol, mi caj i toj ñuc'añob i pusic'al jini ch'oyolo' bʌ ti Sodoma yic'ot Samaria, come ts'ita' jach tsi' yubiyob wocol cha'an i mul.

⁵⁵Jini a chich Samaria yic'ot a wijts'in Sodoma yic'ot Judá mi caj i sujtelob ti' lum ti jim bʌ ora, temel yic'ot pejtelel i yalobilob.

⁵⁶Che' chan tsa' mele a bʌ, tsa' ts'a'le jini año' bʌ ti Sodoma. Ma'anic tsa' pejcayob che' maxto tsiquilic a mul.

⁵⁷Pero wʌle wola' ts'a'lentel ti pejtelel pañimil, ti' tojlel Siria yic'ot Edom, yic'ot pejtelel i pi'ʌlob, yic'ot filisteojob. Ti pejtelelob mi' ts'a'leñetob.

⁵⁸Che' jini mi caj a wubin wocol cha'an a jontolil yic'ot a ts'i'lel, che'en lac Yum.

⁵⁹Come lac Yum Dios woli' yʌl: Mi caj cʌq'ueñet a toj a mul tsa' bʌ a mele, come tsa' ñusa jini xuc'ul* bʌ trato tsa' bʌ a mele quic'ot.

⁶⁰Pero wʌle mu' to c chʌn ña'tan jini trato tsa' bʌ c mele a wic'ot che' xch'oquet to. Muq'uix i jalijel jini trato ti pejtelel ora.

⁶¹Che' ma' cha' ña'tan bajche' tsa' mele, mi caj a cha'len quisin come mi caj cʌq'ueñet ti a wenta a chich yic'ot a wijts'in i wenta a walobilob cha'an mi' yumañetob.

⁶²Mi caj c wa'chocon jini xuc'ul bʌ c t'an a wic'ot. Ti jim bʌ ora mi caj a ña'tan a Yumon.

⁶³Che' ma' ña'tañon mi caj i toj sajtel a pusic'al. Ma'anix chuqui mi caj a wʌl come cabʌl mi caj a wubin quisin che' mic subeñet pejtelel a mul”. Che' yom ma' subeñob, che'en lac Yum Dios.