Read Chol Ezequiel 18 Bible Online

Ezequiel 18 - Chol bible

Ezequiel 18

¹Tsa' tili i t'an lac Yum ba' añon: ¿Chucoch mi' lon alob ili t'an ti' lumal Israel? “Jini alʌlob mi' tojbeñob i mul i tatob”, che'ob.

³Pero mic subeñetla ti isujm, ma'anix mi caj la' chʌn al ili t'an ti Israel, che'en lac Yum.

⁴Come c cha'añetla ti la' pejtelel. Tsa cʌq'ueyob i cuxtʌlel jini tatʌlob yic'ot i yalobilob. Jini cha'an jini mu' bʌ i cha'len mulil i bajñel mi' caj ti chʌmel.

⁵Che' an winic mu' bʌ i mel chuqui toj yic'ot chuqui wen, mi caj j q'uel ti toj.

⁶Jini toj bʌ winic ma'anic mi' c'ux chuqui tic'bil, ma'anic mi' majlel i ch'ujutesan jini dios tac ti Israel. Ma'anic mi' pejcʌben i yijñam i pi'ʌl. Ma'anic mi' pi'len x'ixic che' woli' q'uel i c'amʌjel.

⁷Ma'anic mi' tic'lan i pi'ʌlob. Mi' cha' sutq'uiben i prenda jini xbet taq'uin. Ma'anic mi' cha'len xujch'. Mi' yʌq'uen i c'ux waj jini am bʌ i wi'ñal. Mi' yʌq'uen i pislel jini pits'il bʌ.

⁸Ma'anic mi' c'ajtin i jol taq'uin che' mi' yʌc' ti majan. Uts'at mi' ñusan q'uin ti' tojlel pejtelel winicob.

⁹Mi chʌn xuc'ul mi' jac'beñon c t'an ti pejtelel, awilan mi caj j q'uel ti toj ili winic. Cuxul mi caj i yajñel, che'en lac Yum Dios.

¹⁰Pero mi jontol i yalobil, mi xujch', mi stsʌnsa, mi ma'anic mi' jac' c mandar, mi caj i toj i mul.

¹¹Mi mach uts'atic mi' mel, mi yujil i ch'ujutesʌntel dioste' tac am bʌ ti mate'el, mi tsi' tic'la i yijñam i pi'ʌl,

¹²mi tsi' tic'la jini p'ump'un bʌ am bʌ i wocol, mi yujil xujch', mi ma'anic tsi' sutq'uibe i prenda jini am bʌ i bet, mi tsa' majli ba'an dios tac cha'an mi' mel chuqui tac bibi',

¹³mi letsem tsi' c'ajti i jol taq'uin che' bʌ tsi' yʌc'ʌ ti majan, ¿cuxul ba mi caj i yajñel ili winic? Ma'anic. Wersa mi' chʌmel, come pejtelel chuqui tsi' mele jiñʌch mulil. Jini cha'an an ti' bajñel wenta cha'an mi' toj i mul che' ti' yorajlel wocol.

¹⁴Pero mi an toj bʌ i yalobil jini xjontolil, mi leco tsi' q'uelbe pejtelel i jontolil i tat, uts'at mi caj j q'uel mi ma'anic mi' ñopben i melbal i tat.

¹⁵Come ma'anic tsa' majli i ch'ujutesan dioste' tac ya' ti wits. Ma'anic tsi' tic'lʌbe i yijñam i pi'ʌl.

¹⁶Ma'anic mi' tic'lan winicob. Mi' cha' sutq'uiben i prenda jini am bʌ i bet. Ma'anic mi' cha'len xuch'. Mi' yʌq'uen i c'ux waj jini am bʌ i wi'ñal. Mi' yʌq'uen i pislel jini pits'il bʌ.

¹⁷Ma'anic mi' tic'lan jini p'ump'un bʌ. Ma'anic mi' c'ajtiben i jol i taq'uin. Mi ti pejtelel ora mi' chʌn jac'beñon c t'an, ma'anic mi caj i chʌmel ili winic cha'an i mul i tat. Cuxul mi caj i yajñel.

¹⁸Pero i tat mi caj i bajñel toj i mul ti' caj cha'an tsi' mele chuqui jontol ti' tojlel i pi'ʌlob. Tsi' tic'la i pi'ʌl ti chumtʌl. Tsi' cha'le xujch'. Jini cha'an wersa mi caj i chʌmel.

¹⁹Jatetla mi la' wʌl: “¿Chucoch ma'anic mi' tojben i mul i tat jini ch'iton?” che'etla. Pero jini ch'iton mi tsi' mele chuqui wen yic'ot chuqui uts'at, mi tsi' jac'beyon c t'an, cuxul mi caj i yajñel.

²⁰Majqui jach mi' cha'len mulil, wersa mi caj i chʌmel. Jini ch'iton ma'anic mi caj i tojben i mul i tat. Jini tatʌl ma'anic mi caj i tojben i mul i yalobil. Jini winic mu' bʌ i mel chuqui wen an ti' bajñel wenta. Jini mu' bʌ i mel jontolil an ti' wenta.

²¹Jini xjontolil mi tsi' cʌyʌ i mel chuqui tac jontol, mi tsa' caji i wen jac'beñon c t'an yic'ot c subal cha'an mi' mel chuqui tac toj, cuxul mi caj i yajñel jini winic. Ma'anic mi caj i chʌmel.

²²Ma'anic mi caj i chʌn ña'tʌbentel pejtelel i mul tsa' bʌ i mele. Cha'an tsi' cʌyʌ i mul, cuxul mi caj i yajñel.

²³Lac Yum mi' yʌl: ¿Tijicñayon ba che' mi' chʌmel winic yic'ot i mul? Ma'anic. Com mi' cʌy i jontolil cha'an cuxul mi' yajñel.

²⁴Pero jini toj bʌ winic mi tsi' cʌyʌ i mel chuqui tac wen cha'an mi' cha'len mulil, mi tsa' caji i mel jontolil che' bajche' xmulilob, ¿cuxul ba mi caj i yajñel jini winic? Ma'anic. Pejtelel chuqui tac tsi' mele ti ñaxan ma'anic mi caj i chʌn ña'tʌntel, come tsi' soco i bʌ cha'an mi' mel jontolil. Ti' cajʌch i mul wersa mi caj i chʌmel.

²⁵Pero jatetla mi la' lon al: “Mach utsic lac Yum che' jini”, che'etla. Pero ubinla wʌle pejtelel israelob: ¿Mach ba uts'atic bajche' mic mel? ¿Mach ba lecojic bajche' mi la' mel jatetla?

²⁶Jini toj bʌ winic, mi tsi' cʌyʌ i mel chuqui wen cha'an mi' mel jontolil, wersa mi caj i chʌmel cha'an i mul.

²⁷Pero jini xmulil mi tsi' cʌyʌ i mel chuqui jontol, mi tsa' caji i mel chuqui toj yic'ot chuqui wen, cuxul mi caj i yajñel.

²⁸Ba' ora tsi' ña'ta che' bʌ jontol bajche' woli' mel, tsi' sutq'ui i bʌ cha'an mi' cʌy jontolil. Jini cha'an cuxul mi caj i yajñel jini winic. Ma'anic mi caj i chʌmel.

²⁹Mi woli' chʌn alob israelob: “Mach uts'atic i pusic'al lac Yum”, mi che'ob, tsiquil che' jini leco bajche' mi' ña'tañob jini israelob, pero uts'at bajche' mic mel.

³⁰Jini cha'an israelob, muq'uix caj cʌq'ueñetla la' chobejtʌbal che' bajche' an la' melbal. Cʌyʌ la' mul, cʌyʌ la' mel chuqui tac bibi' ame jiliquetla cha'an la' mul.

³¹Cʌyʌxla pejtel la' jontolil. Yom mi la' mel ti tsijib la' pusic'al yic'ot la' cuxtʌlel. ¿Chucoch mi la' lon jilel?

³²Come mach tijicñayonic che' mi la' chʌmel mi juntiquilic. Jini cha'an cʌyʌ la' mul cha'an cuxul mi la' wajñel, che'en lac Yum Dios.