Read Chol Ezequiel 20 Bible Online

Ezequiel 20 - Chol bible

Ezequiel 20

¹Che' ti julio, che' wʌcp'ejlix jab cʌchʌl Jeconías, tsa' tili xñoxob i c'ajtiñob i toj'esʌntel ti lac Yum. Tsa' cajiyob ti buchtʌl tic t'ejl.

²Lac Yum tsi' subeyon:

³I yalobil winic, subeñob jini xñoxob ti Israel: “Lac Yum Dios woli' yʌl: ¿Chucoch tsa' tiliyetla cha'an mi la' pejcañon? che'en. Ti isujm mic subeñetla, ma'anic mi caj c jac'beñetla”. Che' yom ma' subeñob.

⁴Jixcu jatet, i yalobil winic, tsictesʌbeñob i mul. Tsictesʌbeñob pejtelel chuqui bibi' tsi' meleyob i ñojte'elob c'ʌlʌl wʌle.

⁵Subeñob: “Lac Yum Dios woli' yʌl: Che' bʌ tsac yajca jini israelob, tsa cʌq'ueyob i cʌñon ya' ti' lumal Egipto. Tsa cʌq'ueyob c t'an, tsac subeyob. A Yumon a Dioson, cho'on.

⁶Tsac subeyob mi caj c loc'sañob ti' lumal Egipto cha'an mic pʌyob majlel ti wen bʌ lum ba' uts'at mi' colel pʌc'ʌbʌl ti chajp ti chajp. Wen uts'at jini lum, ñumen uts'at bajche' yan tac bʌ lum.

⁷Che' jini tsac subeyob: Cʌyʌ la' mel chuqui bibi'. Chocola jini dioste' woli bʌ la' ñop ti Egipto. Come joñon la Yumon, la' Dioson, cho'on.

⁸Pero tsi' chañ'esayob i bʌ tic tojlel. Ma'anic tsi' jac'beyoñob c t'an. Ma'anic tsi' chocoyob i dioste' egiptojob, ma'anic tsi' cʌyʌ i ñopob. Jini cha'an tsac ña'ta c jisañob tic mich'ajel che' ya'to añob ti Egipto.

⁹Pero ma'anic tsac jisayob. Tsaj coltayob cha'an mi cʌc' ti ñuc j c'aba' ame wajlentic ti' tojlel jini egiptojob ya' ba' chumulob. Jini cha'an tsa cʌq'ueyob i cʌn che' bʌ tsac loc'sayob ti' lumal Egipto.

¹⁰Che' bʌ tsac loc'sayob ti Egipto, tsac pʌyʌyob majlel ti colem bʌ i tiquiñal pañimil.

¹¹Ya'i tsa cʌq'ueyob c mandar. Tsac subeyob cuxul mi caj i yajñel pejtel mu' bʌ i jac'.

¹²Tsa cʌq'ueyob ja'el i q'uiñilel c'aj o i yejtal c xuc'ul bʌ t'an tsa' bʌ c mele yic'otob cha'an pʌybilob c cha'an. Joñon i cha'añoñob, i Dioson.

¹³Pero ya' ti colem bʌ i tiquiñal pañimil jini israelob tsa' caji i chañ'esañob i bʌ. Ma'anic tsi' jac'beyoñob c t'an tsa' bʌ j cʌntesayob anquese cuxul mi' yajñel majqui jach mi' jac'. Tsi' meleyob e'tel che' ti' yorajlel c'aj o. Jini cha'an tsac ña'ta c jisañob ya' ti colem bʌ i tiquiñal pañimil.

¹⁴Pero tsa' caji c cha' coltañob cha'an mi cʌc' ti ñuc j c'aba' ame wajlenticon cha'an jini ya' bʌ chumulob ba' tsac loc'sayob.

¹⁵Pero tsac wa'chocobeyob c t'an ya' ti tiquin bʌ lum cha'an ma'anic mi caj c pʌyob majlel ti wen bʌ lum ba' mi' colel pejtel pʌc'ʌbʌl ti chajp ti chajp ba' wen uts'at jini lum, ñumen uts'at bajche' pejtelel yan tac bʌ lum ti pañimil.

¹⁶Come tsi' ñusayob c t'an. Ma'anic tsi' jac'ʌyob c subal. Ma'anic tsi' ch'ujutesayoñob ti' q'uiñilel c'aj o, come tsi' c'uxbiyob jini dios tac ti pañimil.

¹⁷Anquese cabʌl i mul tsac p'untayob. Ma'anic tsac junyajlel jisayob. Ma'anic tsac junyajlel tsʌnsayob ya' ti tiquin bʌ lum.

¹⁸Tsac sube i yalobilob ya' ti tiquin bʌ lum: Mach la' tsajcʌben i melbal la' ñojte'elob. Mach la' jac'beñob i mandar. Mach la' ch'ujutesan i dioste' tac.

¹⁹Come la' Yumon la' Dioson. Jini cha'an yom mi la' jac' pejtelel c t'an, che' bajche' tsaj cʌntesayetla.

²⁰Yom c'ajal la' cha'an i q'uiñilel c'aj o, jatetla yic'ot la' walobilob, come jiñʌch i yejtal xuc'ul bʌ c t'an tsa' bʌ c mele la' wic'ot cha'an mi la' ña'tan la' Yumon la' Dioson, cho'on.

²¹Pero tsa' caji' chañ'esañob i bʌ tic tojlel che' bajche' i tatob. Ma'anic tsi' jac'beyoñob c t'an. Ma'anic tsi' meleyob chuqui tsac subeyob, anquese cuxul mi' yajñel jini mu' bʌ i mel. Tsi' cha'leyob e'tel ti' q'uiñilel c'aj o. Jini cha'an tsac ña'ta muq'uix c jisañob ti pejtelelob cha'an cabʌl tsac mich'leyob ya' ti tiquin bʌ lum.

²²Pero tsac tiq'ui c bʌ cha'an mi cʌc' ti ñuc j c'aba' ame i wajleñob jini tejclumob ba' tsac pʌyʌyob loq'uel.

²³Ya' ti tiquin bʌ lum tsac wa'chocobeyob c t'an cha'an muq'uix c pam pucob ti pejtelel lum tac yic'ot ti pejtelel tejclum tac.

²⁴Come ma'anic tsi' meleyob chuqui tsac subeyob, pero tsi' ñusayob c t'an. Ma'anic tsi' p'isiyob ti wenta i q'uiñilel c'aj o. Tsi' ch'ujutesayob i dios tac i ñojte'elob.

²⁵Jini cha'an tsaj cʌyʌyob cha'an mi' tsajcañob yambʌ mandar tac yic'ot costumbre tac mach bʌ anic i c'ʌjñibal, anquese ma'anic mi' tajob i cuxtʌlel jini mu' bʌ i jac'ob.

²⁶Tsaj cʌyʌyob cha'an mi' bib'esañob i bʌ yic'ot i majtan tac tsa' bʌ cʌq'ueyob. Tsi' puluyob jini ñoj ñaxan bʌ i yalobilob cha'an i majtan tac i diosob. Tsa cʌlʌ uts'at mi' toj sajtel i pusic'al cha'an jini leco bʌ i melbal, cha'an mi' ña'tañob Yumʌloñʌch”.

²⁷Jini cha'an, i yalobil winic, subeñob jini israelob: “Lac Yum Dios woli' yʌl: Tsi' p'ajayoñob la' ñojte'elob che' bʌ tsi' ñusayob c t'an.

²⁸Che' bʌ tsac pʌyʌyob tilel ila ti lum tsa' bʌ cʌq'ueyob che' bajche' tsac subeyob i tatob, tsi' ch'ujutesayob dioste' tac ba'an colem te' tac ti bujbujtʌl. Ya' tsa' majli i tsʌnsʌbeñob i majtan cha'an mi' yutsi techbeñoñob c mich'ajel. Ya' tsi' puluyob jini xojocña bʌ pom. Tsi' bec'beyob jini japbil bʌ majtañʌl tac.

²⁹Joñon tsac subeyob: ¿Chuqui isujmlel mi la' pul majtañʌl ti bujbujtʌl? cho'on. Jini cha'an mi' chʌn pejcʌntel ti bujbujtʌl ba' mi yʌc'ob tsʌnsʌbil bʌ majtañʌl. Jiñʌch i c'aba' c'ʌlʌl ti ili ora”.

³⁰Jini cha'an suben jini israelob: “Lac Yum Dios woli' yʌl: ¿Mu' ba caj la' chʌn cha'len ts'i'lel che' bajche' la' ñojte'elob? ¿Mu' ba caj la' chʌn ch'ujutesan dios tac?

³¹Mi la' tsʌnsʌben i majtan jini dioste' tac. Mi la' pul la' walobilob. Jini cha'an mach chʌn mejlix c ñich'tañetla. ¿Woli ba la' lon ña'tan, Israel, mi caj c chʌn jac'beñetla? Isujm mic subeñetla, ma'anic mi caj c jac'beñetla.

³²Jini cha'an ma'anic mi caj i yujtel che' bajche' woli la' ña'tan. Come mi la' lon al: Yom lajalonla bajche' yan tac bʌ tejclum, che' bajche' lac pi'ʌlob ti yan tac bʌ lum, mu' bʌ i ch'ujutesañob jini te' yic'ot xajlel, che'etla.

³³Pero isujm mic subeñetla, cha'an tic p'ʌtʌlel yic'ot cha'an tic mich'ajel, mi caj c wersa cha'len yumʌl ti la' tojlel.

³⁴Mi caj c loc'sañetla ti' tojlel jini winicob ba' pam pujquemetla. Mi caj c cha' tempañetla tic p'ʌtʌlel yic'ot tic mich'ajel.

³⁵Mi caj c pʌyetla tilel ti tiquin bʌ lum ti' bijlel colem tejclum tac cha'an ya'i mic meletla ti jujuntiquil che' bajche' tsac mele la' tatob ya' ti tiquin bʌ lum che' bʌ tsac loc'sayob ti Egipto.

³⁶

³⁷Mi caj c wen ch'ʌmetla ti tsic. Ma'anic jaytiquil mu' bʌ i sujtelob tic wenta.

³⁸Mi caj c choc loq'uel ti la' tojlel jini mu' bʌ i chañ'esañob i bʌ yic'ot jini mu' bʌ i ñusañob c t'an. Mi caj c pʌyob loq'uel ti colem tejclum tac ba' chumulob, pero ma'anic mi caj i yochelob ti' lumal Israel. Ti jim bʌ ora mi caj la' ña'tan la' Yumon.

³⁹Israelob, lac Yum Dios woli' yʌl: Cucula ch'ujutesan la' dioste' tac mi mach la' womic la' jac' chuqui mic subeñetla, pero mach mi la' wʌq'ueñon c majtan tac cha'an mi la' bib'esan j c'aba'.

⁴⁰Ya' ti Jerusalén ti jini ch'ujul bʌ wits, pejtelel israelob mi caj i ch'ujutesañoñob. Mi caj i yumañoñob ya' ti jini lum. Ya'i mi caj c ch'ʌmetla tic wenta. Ya'i mi caj j c'ajtibeñetla ofrenda tac yic'ot ñaxan tac bʌ i wut la' pʌc'ʌb, yic'ot pejtelel chuqui tac mi la' wʌq'ueñon.

⁴¹Che' mic cha' pʌyetla loq'uel ya' ba' cʌchʌletla, lajaletla tic wut bajche' xojocña bʌ i yujts'il pom. Che' jini ch'ujul mi caj j q'uejlel ti' wutob winicob ti pañimil che' mi la' c'uxbiñon.

⁴²Che' mic cha' pʌyetla tilel ti' lumal Israel ti jini lum tsa' bʌ cʌq'ueyob la' ñojte'el, mi caj la' ña'tan la' Yumon.

⁴³Ya'i mi caj la' cha' ña'tan bajche' tsa' la' ñusa q'uin ti yambʌ ora, yic'ot pejtelel leco tac bʌ la' melbal, yic'ot chuqui tac bibi' tsa' la' mele. Mi caj la' mel la' pusic'al cha'an la' mul.

⁴⁴Mi caj la' ña'tan la' Yumon che' bʌ tsa'ix c cha' meleyetla cha'an mi cʌc' ti ñuc j c'aba'. Ma'anic mi caj c jisañetla cha'an jontol bʌ la' melbal yic'ot leco tac bʌ tsa' bʌ la' mele”. Che'en lac Yum Dios.

⁴⁵Tsa' tili i t'an lac Yum ba' añon: I yalobil winic, yom ma' sujtq'uin a wut ti' tojel Jerusalén, cha'an ma' cha'len t'an ti' contra jini ya' bʌ chumulob yic'ot ti' contra jini winicob año' bʌ ti colem te'el ya' ti Neguev.

⁴⁶

⁴⁷Subeñob: “Ñich'tanla i t'an lac Yum: Mach jalix mi caj c jisañetla ti c'ajc. Mi caj i laj pulel jini yaxto bʌ te' yic'ot jini tiquin tac bʌ te'. Ma'anic mi caj i yajpel jini c'ajc. Mi caj i pulel i wut jini chumulo' bʌ ti sur c'ʌlʌl ti norte.

⁴⁸Ti pejtelel pañimil mi caj i q'uelob joñon tsac choco tilel jini c'ajc. Ma'anic mi caj i yajpel”. Che' tsi' yʌlʌ lac Yum.

⁴⁹Che' jini tsa cʌlʌ: ¡C Yum Dios! Jini winicob mi caj i yʌlob lajiya jach jini mu' bʌ c sub, cho'on tsac sube.