Read Chol Ezequiel 21 Bible Online

Ezequiel 21 - Chol bible

Ezequiel 21

¹Lac Yum tsi' cha' subeyon: I yalobil winic, yom ma' sujtq'uin a wut ti' tojel Jerusalén cha'an ma' sub ili t'an ti' contra israelob yic'ot ti' contra jini Templo:

³“Lac Yum woli' yʌl: Wʌle wolij contrajiñetla, Israel. Tsa'ix c bots'o quespada cha'an mic jisan jini uts'ato' bʌ yic'ot jini xmulilob.

⁴Cha'an mic jisan jini xmulilob yic'ot jini tojo' bʌ, bots'bil quespada mi caj c ñumel ti contra pejtelel winicob año' bʌ ti norte yic'ot ti Neguev.

⁵Che' jini ti pejtelel pañimil mi caj i ña'tañob la' Yumon, wolic jisañob. Ma'anix mi caj c chʌn otsan quespada ti' yotot jinto mi' yujtel i ye'tel”.

⁶Jini cha'an, i yalobil winic, cha'len uq'uel ti' ch'ijiyemlel a pusic'al ti' tojlel pejtelel pañimil.

⁷Mi tsi' c'ajtibeyetob: “¿Chucoch ma' cha'len uq'uel?” mi che'ob, yom ma' subeñob: “Cha'an tsi' subeyon lac Yum tal bʌbʌq'uen tac bʌ ti' tojlel pejtelel winicob”, che'et. Che' mi' tilel mi caj i c'uñ'añob ti pejtelel. C'ax ch'ijiyem jax mi caj i yubiñob. Mi caj i c'uñ'an i pix jini p'ʌtʌlo' bʌ. Pejtelel iliyi mi caj i ts'ʌctiyel. Mach jalix mi caj i yujtel, che'en lac Yum Dios.

⁸Tsa' cha' tili i t'an lac Yum ba' añon: I yalobil winic, subeñob ili t'an: “Jini espada mu' bʌ caj i tilel, wen juc'bil i yej. Chajpʌbil jini espada cha'an mi' tsʌnsan winicob. ¿Yom bʌ tijicña mi la' wubin? Tsa'ix jisʌntiyob ñumen p'ʌtʌlo' bʌ bajche' jatetla”, che'en lac Yum Dios.

¹²Cha'len uq'uel, i yalobil winic. Cha'len c'am bʌ t'an yic'ot uq'uel, come mi caj i tsʌnsʌntelob ti espada c tejclumob yic'ot jini año' bʌ i ye'tel ti Israel. Ti pejtelelob mi caj i jilelob ti espada.

¹³Wersa mi caj i yujtel iliyi. Jiñʌch ñuc bʌ wocol mu' bʌ caj i tajob. Ma'anic mi caj i coltʌntelob.

¹⁴Jini cha'an che'ʌch yom ma' subeñob: “Jats'ʌ a c'ʌb. Ch'ʌmʌ jini espada. Cha'yajl uxyajl yom ma' pʌnts'un cha'an mi' ña'tañob bʌxob jini mu' bʌ caj i tsʌnsañob.

¹⁵Che' jini mi caj i bʌc'ñañob che' mi' q'uelob. Mi caj i toj sajtelob i pusic'al. Cabʌl mi caj i chʌmelob. Baqui tac jach mi' ñumelob mi caj i q'uelob espada, chajpʌbil cha'an mi' jisañob.

¹⁶La' i mel i ye'tel espada ti a ñoj yic'ot ti a ts'ej, baqui jach yom.

¹⁷Joñon ja'el mi caj c jats' j c'ʌb. Ma'anix mi caj c tic' c bʌ, come cʌlʌxix c mich'ajel. Joñon la' Yumon tsa' bʌ cʌc'ʌ c t'an”, che'en lac Yum.

¹⁸Tsa' cha' tili i t'an lac Yum ba' añon:

¹⁹I yalobil winic, yom ma' wʌq'uen i señajlel cha'ts'ijt bij ba' mi caj i tilel jini rey ti Babilonia. Jump'ejl bij mi' c'otel ti Jerusalén. Yambʌ mi' c'otel ti Rabá am bʌ ti junwejl Jordán. Yom ma' wʌq'uen i señajlel ya' ti xʌc' bij mu' bʌ i tilel ti Babilonia.

²¹Come poj jumuc' mi caj i wa'tʌl ti xʌc' bij jini rey ti Babilonia. Ma'anic mi' ña'tan mi yom majlel i contrajin Jerusalén o mi yom majlel i contrajin Rabá. Mi caj i pʌy tilel jini yujil bʌ wujt cha'an mi' cha'len yajcaya ti alas. Mi caj i tsʌnsʌben i majtan dioste' tac cha'an mi' q'uelben i yolmal.

²²Ya' ti ñoj bʌ i c'ʌb mi caj i taj i yejtal Jerusalén. Ya' mi caj i tech guerra yic'ot tsʌnsa. Mi caj i jats'ob i ti' tac Jerusalén. Mi caj i p'ulchocoñob lum ti' t'ejl cha'an i buchlib i juloñib. Mi caj i melob chan tac bʌ ts'ajc cha'an mi' letselob ti' ts'ajquil Jerusalén.

²³Pero jini winicob ti Jerusalén mi caj i yʌlob lot jach a t'an, Ezequiel, che' bajche' i t'an xwujt. Come Babilonia tsi' yʌc'ʌ i t'an cha'an mi' coltan Jerusalén. Pero tal i rey Babilonia cha'an mi' jisañob, come tsi' ñusʌbeyob i t'an.

²⁴Jini cha'an lac Yum Dios woli' yʌl: Cha'an ti' caj woli' la' chʌn p'ojlesan jontol bʌ la' melbal yic'ot chuqui tac bibi' mach mejlic c ñusan la' mul. Jini cha'an wersa mi caj c jisañetla.

²⁵Jixcu jatet Sedequías, yumʌlet ti Israel, xñusa t'añet. Wolix i c'otel i yorajlel a wocol cha'an ma' toj a mul.

²⁶Lac Yum Dios woli' yʌl: Loc'san a corona. Woli' laj q'uextʌyel come jini pec' bʌ mi caj i chañ'esʌntel. Jini chan bʌ mi caj i peq'uesʌntel.

²⁷Mi caj c jisan a yumʌntel yic'ot a tejclum. Ma'anix mi caj i chʌn ña'tʌntel jinto che' mi' tilel jini Toj bʌ Winic yajcʌbil bʌ, mu' bʌ caj i ch'ʌm ti' wenta. Che' tsi' yʌlʌ lac Yum Dios.

²⁸I yalobil winic, suben jini amoñob ili t'an come tsi' wajleyob c tejclumob che' woliyob ti wocol: “Lac Yum woli' yʌl: Bots'bilix jini espada cha'an mi' set' t'ojben i bic' jini amoñob. Wen juc'bil jini espada cha'an jisaya.

²⁹Come jini payxo bʌ x'alt'añob la' cha'an woli' subeñetla lot ti' c'aba' la' dioste' tac. Woli' lon alob mi caj la' coltʌntel che' mi' tilelob jini ch'oyolo' bʌ ti Babilonia. Che' jini woli' yʌq'uetla ti chʌmel ti espada. Jini espada mi caj i jisañetla ti' q'uiñilel toj mulil.

³⁰Jinto che' tsa'ix c meleyetla maxto mi caj c cha' otsan quespada ti' yotot. Ya' ti lum ba' tsa' coliyetla, ba' chumuletla, mi caj c jisañetla.

³¹Yic'ot cabʌl c mich'ajel mi caj c jisañetla che' bajche' c'ajc. Mi caj cʌq'uetla ti' c'ʌb jini jontol bʌ winicob yujilo' bʌ tsʌnsa.

³²Lajaletla che' bajche' si' mu' bʌ i pulel ti c'ajc. Ti pejtelel la' lumal mi caj i bejq'uel la' ch'ich'el. Ma'anix mi caj la' chʌn ña'tʌntel. Come joñon Yumʌlon, tsa'ix c subu”, che'en lac Yum.