Read Chol Ezequiel 22 Bible Online

Ezequiel 22 - Chol bible

Ezequiel 22

¹Tsa' tili i t'an lac Yum ba' añon: I yalobil winic, subeñob i mul jini año' bʌ ti Jerusalén, come puru stsʌnsajob. Tsictesʌbeñob jontol bʌ i melbal.

³Subeñob: “Lac Yum woli' yʌl: Stsʌnsajetla, mi caj la' toj la' mul. Mi la' mel la' dios tac cha'an mi la' ch'ujutesan. Bibi'etla, jontoletla.

⁴Tsa'ix la' cha'le tsʌnsa. Tsa'ix la' ch'ujutesa dioste' tac. Tsa'ix la' bajñel pʌyʌ tilel la' wocol. I yorajlelix mi caj cʌq'uetla ti ts'a'lentel yic'ot ti wajlentel ti pejtelel pañimil.

⁵Mi caj i tse'tañetla jini lʌc'ʌl bʌ añob yic'ot jini ñajt bʌ añob che' mi la' toj la' mul, come cabʌl tsa' la' tic'la yaño' bʌ.

⁶Pejtelel jini ñuco' bʌ i ye'tel ti Israel woli' c'ʌñob i p'ʌtʌlel cha'an mi' jisañob i pi'ʌlob.

⁷Jini ch'itoñob yic'ot xch'ocob mi' ts'a'leñob i tatob yic'ot i ña'ob. Mi la' tic'lan jini ñajt bʌ ch'oyolob yic'ot jini meba' alʌlob yic'ot meba' x'ixicob.

⁸Mi la' ts'a'len jini ch'ujul bʌ ajñibʌl. Mi la' cha'len e'tel ti' yorajlel c'aj o.

⁹An mu' bʌ i cha'leñob jop't'an cha'an mi' yʌc'ob ti chʌmel i pi'ʌlob. An mu' bʌ i c'uxbiñob dioste' tac ti bujbujtʌl. Leco i melbalob ti pejtelel la' lumal.

¹⁰An mu' bʌ i cha'leñob ts'i'lel yic'ot i yijñam i tat. Mi' pi'leñob x'ixicob woli bʌ i q'uelob i c'amʌjel.

¹¹Cabʌletla mi la' pi'leben i yijñam yambʌ winic. Mi la' pi'len la' wʌ'lib yic'ot la' majan ijti'an.

¹²Mi la' ch'ʌm la' tojol cha'an mi la' cha'len tsʌnsa. Mi la' tic'lan la' pi'ʌlob. Tsa'ix ñajʌyiyon la' cha'an, che'en lac Yum Dios.

¹³Jini cha'an tsa'ix c letsa j c'ʌb tic mich'lel. Mi caj c meletla cha'an la' xujch' yic'ot la' tsʌnsa.

¹⁴¿Ch'ejl ba la' pusic'al ti jim bʌ ora che' mic tilel c meletla? Joñon la' Yumon tsac subeyetla. Mi caj c ts'ʌctesan, che'en lac Yum.

¹⁵Mi caj c pam puquetla ti pañimil. Mi caj c sʌq'uesañetla ti pejtelel la' jontolil.

¹⁶Mi caj la' ts'a'lentel ti pejtelel pañimil. Che' jini mi caj la' ña'tan la' Yumon”. Che' yom ma' subeñob, che'en lac Yum.

¹⁷Tsa' tili i t'an lac Yum ba' añon:

¹⁸I yalobil winic, tsa'ix sujtiyob jini israelob che' bajche' misujelʌl tic wut. Ti pejtelelob lajalob bajche' i bibi'lel tsucu taq'uin yic'ot c'ʌnc'ʌn taq'uin, che'en.

¹⁹Jini cha'an lac Yum Dios woli' yʌl: Cha'an ti' caj tsa' wen p'ojli la' jontolil, jini cha'an mi caj c much'quiñetla ya' ti Jerusalén.

²⁰Che' bajche' winicob mi' yotsañob ti c'ajc jini tsucu taq'uin yic'ot c'ʌnc'ʌn taq'uin cha'an mi' yulmesañob, che' ja'el joñon mi caj c tempañetla cha'an mic meletla tic mich'ajel.

²¹Mi caj c tempañetla. Mi caj c wujtañetla yic'ot i c'ʌc'al c mich'ajel. Che' jini mi caj la' sʌq'uesʌntel yic'ot c'ajc yilal.

²²Che' bajche' mi' sʌq'uesʌntel tsucu taq'uin ti c'ajc, che'ʌch mi caj la' sʌq'uesʌntel ja'el. Che' jini mi caj la' ña'tan la' Yumon mu' bʌ cʌq'uetla ti wocol tic mich'ajel, che'en lac Yum.

²³Tsa' tili i t'an lac Yum ba' añon:

²⁴I yalobil winic, subeñob jini israelob: “Ti' yorajlel c mich'ajel ma'anic mi caj i sʌq'uesʌntel la' lumal. Lajal mi caj i sujtel che' bajche' colem bʌ i tiquiñal pañimil.

²⁵Come mi' temob i t'an jini x'alt'añob la' cha'an. Che' bajche' bajlum mi' chuc i we'el, woli' tsʌnsañob winicob cha'an mi' chilbeñob i chubʌ'an yic'ot i lum. Jini cha'an cabʌlobix jini meba' x'ixicob ti la' lumal.

²⁶Jini motomajob mi' ñusañob c mandar. Mi' bib'esañob c Templo yic'ot jini ch'ujul bʌ j c'aba'. Junlajal jach mi' q'uelob jini sʌsʌc bʌ yic'ot jini bibi' bʌ. Ma'anic mi' p'isob ti wenta i q'uiñilel c'aj o. Ti pejtelelob mi' ts'a'leñob j c'aba'.

²⁷Lajalob la' yumob bajche' bʌte'el ts'i' mu' bʌ i chuc i we'el. Mi' tsʌnsañob winicob cha'an mi' xujch'ibeñob i chubʌ'an.

²⁸Lajalob jini x'alt'añob la' cha'an bajche' jini mu' bʌ i bomben i pat otot che' tsuculix. Mi' lon subob chuqui mach isujmic. Mi' lon alob: Che'ʌch woli' yʌl lac Yum Dios, lon che'ob, anquese ma'anic chuqui woli' yʌl lac Yum.

²⁹Ti pejtelel pañimil an tic'laya yic'ot xujch'. Jini p'ump'uño' bʌ mi' tic'lañob i bʌ. Mi' chilbeñob i chubʌ'an jini ñajt bʌ ch'oyolob.

³⁰Tsac lon sajca juntiquil toj bʌ i pusic'al yujil bʌ coltaya i wentajlel i ts'ajquil jini tejclum cha'an mi' mʌctan c mich'ajel cha'an la' mul, pero mi juntiquilic tsac taja.

³¹Jini cha'an ts'ʌcʌl mi caj la' toj la' mul. Wersa mi caj la' wubin wocol. Mi caj c jisañetla tic mich'ajel”. Che' yom ma' subeñob, che'en.