Read Chol Ezequiel 24 Bible Online

Ezequiel 24 - Chol bible

Ezequiel 24

¹Che' ti diciembre che' bolomp'ejlix jab tsa' cʌjchi majlel jini rey Joaquín, tsa' tili i t'an lac Yum ba' añon.

²I yalobil winic, yom ma' ts'ijban i q'uiñilel ili tsic, come ti ili tsic jini rey ti Babilonia tsa'ix i joy mʌcta Jerusalén.

³Subeñob ti lajiya jini xñusa t'añob: “Lac Yum Dios woli' yʌl: Ch'ʌmʌ tilel jump'ejl olla. Jete ja' ti c'ajc.

⁴Yajcan ochel i bʌc'tal we'elʌl, pejtelel i ya' yic'ot i quejlab.

⁵Yajcan jini ñumen uts'at bʌ tiñʌme' cha'an ma' wotsan ti p'ejt. Ac'ʌ si' ti' yebal p'ejt cha'an jal ma' ch'ʌx jinto mi' yechmʌl i bʌc'tal ti' bʌquel.

⁶Come lac Yum Dios woli' yʌl: ¡Obol a bʌ Jerusalén! come mi' cha'leñob tsʌnsa jini ya' bʌ chumulob. Lajalet bajche' jini p'ejt maxto bʌ anic tsa' loq'ui i bibi'lel. Laj loc'san i bʌl jini p'ejt. Mach yomic yajcʌbil ma' loc'san.

⁷Come ti pam xajlel tsa' bec'beyob i ch'ich'el jini tsʌnsʌbilo' bʌ. Ma'anic tsa' beq'ue ti lum ba' mi' mujlan jini ts'ubejn.

⁸Tsaj cʌyʌ jini ch'ich' ba' bec'bilix ti' wut winicob ba' mi' techbeñon c mich'ajel.

⁹Lac Yum Dios woli' yʌl: ¡Obol jax a bʌ, Jerusalén, cha'an awujil cabʌl tsʌnsa! come mi caj c jisañet.

¹⁰La' otsʌntic cabʌl si' cha'an mi' wen chʌc'an. Wen ch'ʌxʌ jini we'elʌl. Che' jini jochtesan jini p'ejt. Pulu i bʌquel.

¹¹Che' jocholix jini p'ejt ac'ʌ ya' ti c'ajc cha'an mi' wen ticwan, cha'an mi' pulel i mal. Che' jini mi caj i loq'uel i bibi'al. Mi caj i c'ajlel loq'uel i ta'.

¹²Lolom pejtelel jini e'tel. Mach loq'uic i ta' anquese wen ticʌw jini c'ajc.

¹³Che' bʌ tsac ña'ta c sʌq'uesañet ma'anic tsa' jac'beyon. Ma'anic tsa' cʌyʌ a bibi'lel. Mach a womic a sʌq'uesʌntel. Jini cha'an ajñen ti a bibi'lel jinto ma' taj c mich'ajel. Bʌbʌq'uen mi caj a wubin.

¹⁴La' Yumon. Tsa cʌc'ʌ c t'an. Pejtelel chuqui tsa cʌlʌ mi caj c mel. Ma'anic mi caj c p'untañet. Mi caj c sutq'uibeñet a jontolil. Mi caj a lu' toj”, che'en lac Yum Dios.

¹⁵Tsa' tili i t'an lac Yum ba' añon ja'el:

¹⁶I yalobil winic, wʌle mi caj c chilbeñet a wijñam mu' bʌ i yʌq'ueñet i tijicñʌyel a pusic'al, pero mach ma' mel a pusic'al. Mach ma' cha'len uq'uel yic'ot tsic pusic'al.

¹⁷Yom ma' tic' a pusic'al ame tsictiyic a ch'ijiyemlel. Cʌchʌ a jol yic'ot i cʌjchil, lʌpʌ a zapato che' bajche' a tilel. Mach ma' mos a wut ti rebozo che' bajche' mi' melob x'uq'uelob. Mach ma' c'ux waj yic'otob. Che' tsi' yʌlʌ lac Yum.

¹⁸Ti sʌc'ajel tsac subeyob jini tejclumob. Che' ti ic'ajel tsa' chʌmi jini quijñam. Che' bʌ tsa' sʌc'a pañimil, tsac mele che' bajche' tsa' subentiyon.

¹⁹Jini tejclumob tsi' c'ajtibeyoñob: Tsictesʌbeñon lojon isujmlel jini woli bʌ a mel, che'ob.

²⁰Joñon tsac jac'beyob: Lac Yum Dios tsi' wʌn subeyon cha'an mic subeñetla, israelob: “Lac Yum Dios woli' yʌl: Mi caj c jisan jini i t'ojol jax bʌ c Templo, i yejtal i p'ʌtʌlel la' tejclum. Mi caj i tsʌnsʌntelob ti espada la' walobilob mu' bʌ i cʌytʌlob ti tejclum.

²²Che' jini mi caj la' mel che' bajche' woli' mel Ezequiel. Ma'anic mi caj la' mos la' wut ti rebozo che' bajche' mi' melob x'uq'uelob. Ma'anic mi caj la' c'ux jini waj mu' bʌ i c'uxob jini ch'ijiyemo' bʌ.

²³Ma'anic mi caj la' joch i cʌjchil la' jol yic'ot la' zapato. Ma'anic mi caj la' cha'len uq'uel. Pero mi caj la' jisʌntel yic'ot cabʌl wocol cha'an ti' caj la' mul. Ti jujuntiquiletla mi caj la' cha'len ajcʌn.

²⁴Che' bajche' tsi' mele Ezequiel che'ʌch mi caj la' mel. Che' mi' yujtel ili wocol ti la' tojlel, mi caj la' ña'tan la' Yumon la' Dioson”, che'en lac Yum.

²⁵Jixcu jatet, i yalobil winic, ña'tan ba' ora mic chilbeñob i tijicñʌyel yic'ot i ñuclel i pusic'alob yic'ot pejtel i yalobilob,

²⁶ti jim bʌ ora mi caj i c'otel i pejcañet juntiquil winic woli bʌ ti puts'el loq'uel ti Jerusalén. Mi caj i subeñet chuqui tsa' ujti.

²⁷Ti jim bʌ ora mi caj c cha' aq'ueñet a t'an cha'an mi mejlel a pejcan. Che' jini mi caj a pʌsbeñob ti lajiya chuqui mi caj i yujtel. Ti jim bʌ ora mi caj i ña'tañob Yumʌlon. Che' tsi' yʌlʌ lac Yum.