Read Chol Ezequiel 27 Bible Online

Ezequiel 27 - Chol bible

Ezequiel 27

¹Tsa' tili i t'an lac Yum ba' añon: I yalobil winic, uc'tan Tiro yic'ot ch'ijiyem bʌ t'an.

³Suben bajche' mi caj i yujtel jini ñuc bʌ tejclum am bʌ ti' ti' colem ñajb, ba' mi' cha'leñob choñoñel mʌñoñel jini ch'oyolo' bʌ ti cabʌl lum: “Lac Yum Dios woli' yʌl: Ma' lon al: Ma'anic yambʌ i t'ojol bʌ tejclum ti pañimil che' bajche' joñon, che'et.

⁴Tsa' ñajt'esa i mojón c'ʌlʌl ti ojlil ja'. Wen i t'ojol jax tsa' wa'chocontiyet.

⁵Lajalet bajche' colem barco melbil bʌ ti wen bʌ te'. Ya' ti Líbano tsi' ch'ʌmʌyob tilel jini ch'ujte' cha'an mi' melob a chumte'lel.

⁶Tsi' c'ʌñʌyob c'olol te' am bʌ ti Basán cha'an mi' melob remo tac. I bojte'lel a wotot tsi' meleyob ti fino bʌ te' tilem bʌ ti' ti' ja' ya' ti Quitim.

⁷Jini lich'il bʌ pisil ti barco tsi' joch'oyob ti yʌjyʌx bʌ puy tilem bʌ ti Egipto. Melbil a bandera ti yʌjyʌx pisil tilem bʌ ti' ti' ja' i c'aba' Elisa.

⁸Tilemob ti Sidón yic'ot ti Arvad a winicob mu' bʌ i cha'leñob e'tel ti colem barco tac. Ch'oyolob ti Zemer jini yujilo' bʌ i toj'esʌntel majlel jini colem barco.

⁹Jini xñoxob ch'oyolo' bʌ ti Gebal tsi' wen meleyob barco ame ochic ja'. Ti pejtelel pañimil mi' chocob tilel colem barco tac but'ul bʌ yic'ot i cuch cha'an mi' chombeñet.

¹⁰Jini persajob yic'ot año' bʌ ti Lud, yic'ot Fut, jiñobʌch a soldadojob tsa' bʌ i coltayet ti guerra. Tsi' yʌq'uet i mʌctijib a tajn yic'ot a jol cha'an ma' q'uejlel ti ñuc.

¹¹Ch'oyolob ti Arvad yic'ot ti Helec jini xcʌntayajob año' bʌ ti pam ts'ajc. Ch'oyolob ti Gamed jini soldadojob mu' bʌ i yajñelob ti chan bʌ q'ueloñib. Wen i t'ojol jax i mʌctijibob ti' ñʌc' ts'ajc i wenta i ch'ʌjlib cha'an uts'at ma' q'uejlel, che'en.

¹²Jini ch'oyolo' bʌ ti Tarsis tsi' chombeyet plata, tsucu taq'uin, sʌsʌc taq'uin, yic'ot plomo tac, come wen chumulet. Tsi' mʌñʌyob a chubʌ'an.

¹³Che' ja'el Javán, Tubal yic'ot Mesec tsi' cha'leyob mʌñoñel ti a tojlel. Tsi' choñoyob winicob x'ixicob yujilo' bʌ e'tel yic'ot latu melbil bʌ ti c'ʌnc'ʌn taq'uin.

¹⁴Jini año' bʌ ti Togarma tsi' chocoyob tilel caballo wen yujil bʌ ajñel yic'ot mula.

¹⁵Jini año' bʌ ti Dedán mi' c'otelob ti choñoñel ba' añet. Ti pejtelel tejclum tac am bʌ ti' ti' colem ñajb mi' tilelob ti choñoñel yic'ot mʌñoñel. Mi' tojob a chubʌ'an yic'ot i bʌquel i yej tsimin, yic'ot ébano.

¹⁶Che' ja'el Edom mi' cha'len mʌñoñel ba' añet. Mi' ch'ʌmbeñet tilel perla yic'ot púrpura, yic'ot joch'bil tac bʌ bujcʌl, yic'ot lino bʌ pisil, yic'ot letsem tac bʌ i tojol te', yic'ot coral bʌ xajlel, yic'ot rubí.

¹⁷Judá ja'el yic'ot año' bʌ ti' lumal Israel mi' ch'ʌmob tilel chab, aceite, yic'ot bálsamo yic'ot trigo ch'oyol bʌ ti Minit yic'ot ti Panag.

¹⁸Jini año' bʌ ti Damasco mi' ch'ʌmob tilel vino tilem bʌ ti Helbón yic'ot wen sʌsʌc bʌ i tsutsel tiñʌme' tilem bʌ ti Siria.

¹⁹Che' ja'el Dan yic'ot Javán mi' ch'ʌmob tilel puy, yic'ot tsucu taq'uin, yic'ot cassia, xojocña bʌ nichim, yic'ot canela mu' bʌ i tajob ti Arabia.

²⁰Dedán mi' choc tilel jini wen i t'ojol bʌ pisil cha'an i tejp'il montura tac.

²¹Che' ja'el Arabia yic'ot jini ñuco' bʌ i ye'tel ti Cedar mi' ch'ʌmob tilel i tat tiñʌme' yic'ot i tat chivo.

²²Jini xchoñoñelob ti Sabá yic'ot ti Raama mi' ch'ʌmob tilel yajcʌbil bʌ i ts'ʌcal bʌl ñʌc'ʌl, yic'ot wen uts'at tac bʌ xajlel yic'ot oro.

²³Jini Harán, Cane, yic'ot jini xchoñoñelob ti Sabá yic'ot ti Asiria, yic'ot ti Quilmad, mi' cha'leñob trato a wic'ot.

²⁴Pejtelel ili winicob mi' cha'leñob mʌñoñel ba' añet. Mi' choñob yʌjyʌx bʌ pisil joch'bil tac bʌ yic'ot wen uts'at tac bʌ pisil, yic'ot jini an tac bʌ i puyil i ti'.

²⁵Colem barco tac tilem bʌ ti Tarsis mi' cuchob tilel chubʌ'añʌl. Mi' wen tempʌyel chubʌ'añʌl ya' ti' yotlel.

²⁶A yumob che' bajche' xñijca barcojob woli' choquet majlel ti colem ñajb ba' mi caj a jajts'el ti tsʌts bʌ ic'. A yumʌntel mi caj i jilel che' bajche' mi' jejmel barco.

²⁷Pejtelel a taq'uin yic'ot a choñoñel yic'ot a chubʌ'an mi caj i sujp'el ochel ti' yebal ja' yic'ot xñijca barco tac, yic'ot jini mu' bʌ i toj'esañob majlel barco tac. Ti jim bʌ q'uin mi caj a junyajlel jilel yic'ot pejtel a winicob mu' bʌ i cha'leñob mʌñoñel, yic'ot a soldadojob mu' bʌ i cha'leñob guerra, yic'ot pejtelel x'e'telob a cha'an.

²⁸Cha'an ti c'am bʌ i yoñel jini xñijca barcojob mi' cajelob ti bʌq'uen jini año' bʌ ti' ti' ja'.

²⁹Ti ñajtʌl mi caj i tilelob ti barco c'ʌlʌl ti' lumal Tiro cha'an mi' q'uelob bajche' tsa' jili.

³⁰Ñajtʌ tsiquil i yoñel che' mi' yuc'tañob. C'am mi caj i cha'leñob uq'uel. Mi caj i mujlañob i jol ti ts'ubejn. Mi caj i ñoltʌlob ti' tʌñil c'ajc.

³¹Mi caj i jujchiñob i jol, mi caj i lʌpob coxtal. Mi caj i cha'leñob ch'ijiyem bʌ uq'uel yic'ot tsic pusic'al.

³²We'ecña mi caj i yuc'tañetla. Mi caj i yʌlob: ¿Am ba yambʌ ñuc bʌ tejclum che' bajche' Tiro tsa' bʌ jili ti colem ja'? che'ob.

³³Ti pejtelel pañimil tsi' tajayob i tijicñʌyel ti a tojlel che' bʌ tsa' chocbeyob majlel colem barco but'ul bʌ yic'ot pejtelel chuqui tac yomob. Jini reyob ti pañimil tsa' ochiyob ti rico cha'an a chubʌ'an che' bʌxet ti choñoñel.

³⁴Pero wʌle jisʌbilet ya' ti' yebal jini colem ñajb yic'ot pejtelel jini x'e'telob a cha'an yic'ot a chubʌ'an.

³⁵Pejtelel jini chumulo' bʌ ti' ti' colem ñajb woli' q'uelob pero wocol mi' ñopob. Tsiltsilñayob ti bʌq'uen, sʌctuc'an i wut.

³⁶Pejtelel jini xchoñoñelob woli' yʌlob bʌbʌq'uen jax bajche' tsa' jiliyet. Ma'anix mi caj a chʌn wa'chocontel”. Che' tsi' yʌlʌ lac Yum.