Read Chol Ezequiel 28 Bible Online

Ezequiel 28 - Chol bible

Ezequiel 28

¹Tsa' tili i t'an lac Yum ba' añon.

²I yalobil winic, suben jini ñuc bʌ yumʌl ti Tiro: “Che'ʌch woli' yʌl lac Yum Dios: Tsa' lon chañ'esa a bʌ. Tsa' wʌlʌ: Joñon juntiquil dioson. Mic buchtʌl ti' buchlib Dios wʌ' ti ojlil colem ñajb, lon che'et. Ya winiquet jach, mach diosetic, pero ti a pusic'al ma' lon ña'tan dioset.

³Ma' wʌl ñumen cabʌl a ña'tʌbal bajche' Daniel. Ma'anic chuqui wisi mucul ti a tojlel.

⁴Tsa' mejli a tempan cabʌl a chubʌ'an cha'an cabʌl a bʌxlel yic'ot a ña'tʌbal. Tsa' tempa cabʌl oro yic'ot plata ti' yotlel a chubʌ'an.

⁵Cha'an mañajet ti trato tsa' mejli a tempan cabʌl a chubʌ'an. Che' bʌ tsa' oñ'a a chubʌ'an, tsa' chañ'esa a bʌ.

⁶Jini cha'an lac Yum Dios woli' yʌl: Ti' caj a mul cha'an wola' laj a bʌ bajche' Dios,

⁷a wilan mi caj c choc tilel ti a contra winicob ñajt bʌ ch'oyolob yujilo' bʌ jisaya. Mi caj i bots'ob i yespada cha'an mi' ju'sañob a pusic'al yic'ot a ña'tʌbal, cha'an mi' jilel a ñuclel.

⁸Mi caj i chocob ochel ti mucoñibʌl. Mi caj a chʌmel che' bajche' mi' chʌmelob winicob ti' yojlil colem ñajb.

⁹¿Mu' ba caj a chʌn sub a bʌ ti dios che' mi' tsʌnsañet? Come winiquet jach, mach diosetic ti' tojlel jini mu' bʌ i lowet.

¹⁰Che' bajche' mi' chʌmel jini chocbil bʌ winic, che'ʌch mi caj i tsʌnsañetob jini winicob ñajt bʌ ch'oyolob, come joñon tsa cʌc'ʌ c t'an”, che'en lac Yum Dios.

¹¹Tsa' tili i t'an lac Yum ba' añon:

¹²I yalobil winic, tsictesʌben jini rey ti Tiro jini wocol mu' bʌ caj i yubin. Suben: “Lac Yum Dios woli' yʌl: Jatet wen a t'ojol, cabʌl a ña'tʌbal.

¹³Tsa' ajniyet ti Edén ya' ti' pʌc'ʌb lac Yum. Tsa' ch'ʌlʌ a bʌ yic'ot uts'at tac bʌ xajlel: jini cornerina, topacio, jaspe, crisólito, berilo, ónice, zafiro, carbunclo, esmeralda, chucbil bʌ ti oro. Tsa' laj aq'uentiyet che' bʌ tsa' mejliyet.

¹⁴Ñuc bʌ ángelet, yajcʌbilet cha'an ma' cha'len cʌntaya. Joñon tsac wa'chocoyet ya' ti ch'ujul bʌ wits c cha'an. Ya' tsa' ajniyet. Joyolet ti xajlel tac am bʌ i c'ʌc'al, tsa' cha'le xʌmbal.

¹⁵Wen uts'at tsa' ñusa q'uin che' bʌ tsa' mejliyet jinto tsa' cha'le mulil.

¹⁶Ti' caj a wo'lel ti chubʌ'añʌl, tsʌytsʌyña a pusic'al tsa' cha'le mulil. Jini cha'an, ángel mu' bʌ a cha'len cʌntaya, wolic choquet loq'uel ti ch'ujul bʌ wits c cha'an, cha'an bibi'et. Wolic choquet loq'uel ti' yojlil jini xajlel tac woli bʌ ti lejmel.

¹⁷Come tsa' chañ'esa a bʌ cha'an a t'ojol jax. Tsa' soco a ña'tʌbal cha'an a ñuclel. Jini cha'an tsac chocoyet jubel ti lum cha'an mi' q'uelob jini reyob ti pañimil peq'uesʌbilet.

¹⁸Tsa' jisa a c'ʌjñibal, come cabʌl tsa' mula taq'uin. Mach tojic tsa' cha'le choñoñel yic'ot mʌñoñel. Jini cha'an tsac tsuc'u c'ajc ti a tojlel cha'an mi' jisañet cha'an ma' sujtel ti tʌñil c'ajc ti' tojel i wut pejtel pañimil.

¹⁹Woli' toj sajtel i pusic'al pejtelel a cʌñʌyo' bʌ ti pañimil cha'an a jilibal. Mi' cajelob ti bʌq'uen che' mi' q'uelob. Mach chʌn tsiquiletic ti pejtelel ora”, che'en lac Yum.

²⁰Tsa' tili i t'an lac Yum ba' añon: I yalobil winic, sutq'uin majlel a wut ti' tojel Sidón. Tsictesʌbeñob jini wocol mu' bʌ caj i yubiñob.

²²Subeñob: “Lac Yum Dios woli' yʌl: Wʌle wolix j contrajiñet Sidón. Mach jalix mi caj c pʌs c ñuclel ti a tojlel che' mic jisañet. Che' mic pʌs c bʌ ti ch'ujul ti a tojlel mi caj i ña'tañob ti pejtelel pañimil Yumʌlon.

²³Mi caj c choc tilel jontol bʌ c'amʌjel yic'ot soldadojob mu' bʌ caj i jisañet. Jini lojwemo' bʌ ñolocña mi caj i cʌytʌlob ti calle. Che' jini mi caj i ña'tañob Yumʌlon.

²⁴Che' jini, ma'anix mi caj i chʌn jejq'uelob ti ch'ix yubil israelob che' bajche' ti yambʌ ora che' ts'a'lebilob ti pejtelel lum.

²⁵Mi caj c cha' tempan jini israelob ya' ti' lumal Jacob tsa' bʌ cʌq'ueyob. Mi caj c cha' pʌyob loq'uel ba' pam pujquemob. Che' jini mi caj i q'uelob ti pejtelel pañimil ch'ujulon ti' tojlel c cha'año' bʌ.

²⁶Ma'anix mi' cajelob ti bʌq'uen ya' ba' chumulob ti' lumal. Mi caj i wa'chocoñob i yotot. Mi caj i melob i ts'usubil. Ñʌch'ʌl mi caj i chumtʌlob. Mi caj i ña'tañob i Yumon, i Dioson, che' bʌ tsa'ix ujti c jisan i contrajob tsa' bʌ i tic'layob”, che'en.